Paulusti nimi kipsiogne
16
1 Nunipsa'el Phebe kelenekori Yesusag wana paliro winildalamang nimi Kengkrea so'oag wamang nimi taneko sembe yepto tongohirop kel wamog. Yeplamsilba, “Wali kel,” aro sekililamna. 2 Phebe keleneko a'unag yaleba, a'undi el kipto, “Nu saelba uhiropne elmangkel weptop kelme,” aro sunsunum uro kiplulom. Kelenekori nimi maikno yeplamsildi, na babe yeplamnel ane sembe, elag olog teko ulamleba, “Yeplulom,” aro a'un mololamsin.3 Akwila elkel Priskilaapti Kristus Yesus sembe nanap nhon awe nikne tolamobo. Sin abeneko kipsululom. 4 Sin abenekori yeplamnereknena, sindam nimi tebanepag agha wamdekti yeplamnerek. Ane sembe, nari sin abeneko sembe, “Wali yeplamnerong,” aro wana awi senelamsin. Na mo kom aghana, Yesusag wana paliro winiptangtop nimi mog so'o tala-tala wamang nimiri babe sin sembe, “Nu wali yeplamsirong,” aro wana awi senelamsiang. 5 Sin abenekoap Yesusag wana palirop nimi sikindi aeag winiptangtop nimiap kipsululom.
Nangkae wanaagne Epenetus poneko kiplulom. Elna Asia so'oag wamang nimi agha Kristusag wana palirop nimi samne wamla.
6 Maria keleneko whin seklero a'un sembe awe tolamoba kiplulom.
7 Na nimi sisa nikne Andronikusap Yuniasap kipsululom. Sin abeneko samenag sae kaupto kop aeag tobongkipsiekpa nanap nhon wamubu. Na anam Kristusap ma'aptan komag, sin abeneko Kristusap sam ma'aptaek. Sin Yesusti wepto pogsiog nimi paliagne wamdang.
8 Ampliatus poneko nu Saelba Uhiropne ponekoap ma'aldalamapti, o'ona sembamnange kiplulom.
9 Urbanus poneko Kristusap ma'aptangkamlari, awe nikne tolamnamdi kiplulom. Apna Stakhis, nangkae wanaagne kiplulom.
10 Apeles ponekona, el Kristusap ma'aptangto uropne mibi agha sikne wamlange poneko kiplulom.
Aristobulusti ae lom nimi kipsululom.
11 Na nimi sisa nikne Herodion kiplulom.
Sin nu Saelba Uhiropne ponekoap ma'aldalamang nimi Narkisusti ae lom nimi agha kipsululom.
12 Kelabo phende Trifenaap Trifosaap kelabo abeneko nu Saelba Uhiropne ponekoap ma'aldalamangdi, Eldi awe whin seklero tolamdang kelabo abeneko kipsululom.
Nunin wanaagne Persis keleneko babe nu Saelba Uhiropne ponekoap ma'aldalamangdi, Eldi awe whin seklero tolamla keleneko kiplulom.
13 Rufus poneko nu Saelba Uhiropne ponekori, “Nanap ma'aldalamnunam,” aro webogpa el kiplulom. Ilin babe na sembe nari kaen saog uro wanaag taogpa kiplulom.
14 Asinkritusap, Phelegonap, Hermesap, Patrobasap, Hermasap nungkabo Yesusag wana palirop nimi sinap nhon wamang nimiap babe kipsululom.
15 Philologusap, Yulia kelenekoap, Nereusap, ilipsa'elap, Olimpasap, Allahri wepsirop kelmabo me sinap nhon wamang nimiap kipsululom.
16 A'un mamun haibiltalapmundi, “Allahri wepsirop kelmabo me ma'aptangto wamap,” aro somoro togtog aro kibildalamlulom.
Sin Kristusag wana paliro winirop nimi tala-tala wamang nimiri a'un kiplamsiang.
Paulusti komoptop yubu wenero ambatsiogha
17 Nangkabo, a'un ma'aldalamlom nimi wamlomba, yubu walinge ambarelamsiek yubu ene wali ka'ero el talamlom. Undo wamlom aghana, yubu walinge sunsunum uro a'undi ul palapmun ina toman nimi phukulingineba saogne nimiri pipleri a'un a'ebahileagti, “Yae piptangkamlulom,” aro wenelamsin. Sin a'un a'ebahinep nimi taneko wail ibatsimundi koloptalulom. 18 Sin nimi a'ebahinep nimi tanekona, nu Saelba Uhiropne Kristus ponekori awe tolamang kom aghana, sindam nimiri mon sek seneropne agha ulamang. Sindi yubu lilim walinge maipsirop yubu lelamangne pere agha wana heksirop kom nimi haing kunuro ekel ina nenelamsiang. 19 A'undi Yesus yubu walinge ka'ero ulamlomne sembe nimiri yubu lero sabo talamlaba, nimi niri a'un sembe ka'elamang. Ane sembe a'undi wali ka'elamlomdi ulamlomne neneri wana awi maikno ulamnel. A'undi walia ulamnepne sembe wana heksiropneag agha ulapmundi, malingeap ma'aptan koma wamlulom.
20 Ko'o we uro wamna komag Allahri nimi wana aingniro ma'asinne ponekori phia sikini nubunge neneko a'un yan mombolag ingisapto luknubalul. A'un sembe molbarelamsinnena, “Nu Saelba Uhiropne Yesus ponekori wana a'unag yorolamsilneag agha yepto paiamsilul,” aro molbarelamsin.
21 Nanap awe nikne toropne Timotius ponekori a'un kiplamsil. Na nimi sisa nik nimi Lukiusap, Yasonap, Sosipaterap a'un kiplamsiang.
22 Paulusti yubu tipto na Tersius saeri mome toro palilamna. Nari babe nu Saelba Uhiropne ponekoap ma'aldalamapne pere agha a'un kiplamsin.
23 Nu wene wamapne Gayus ponekori nu aeag tolongoro kiplamsilba, eldi aeag malamap. Wene wamap so'oag nimi Yesusag wana paliro winildalamap ae ngainge Gayus ponekori babe a'un kiplamsil.
Eratus ponekona, as soro kalurop as eneag nimi sembe kal ma'al paia uro o'ohiropne ponekori a'un kiplamsil.
Nungkae Yesusag wana paliropne Kwartus ponekori babe a'un kiplamsil.
24 Nari a'un sembe molbarelamisinnena, “Nu Saelba Uhiropne Yesus Kristus ponekori wana a'unag yorolamsileri, yae paiamsilul,” aro molbarelamsin. Sikne agha saekag lebap.
Allah omektop yubu komopto pibogha
25 Allah omeklamsut! Nari yubu walinge Yesus Kristus sembe ambarelamsin yubu eneko pere agha El mori a'un khapto sekitsinepne poneko wamla. Yum-yum samenag agha lilirobag tognoroba wamog aghana wene lag nembaog. 26 Wene lag taognena, Allah ya'ag uropne ponekori aruksirop yubu sunsunum uro Eldi yubu silimu tiptop nimiri lag nenero mome toro palilamek. Lag nenero mome toro palilameknena, Allahrina, “Nimi mog so'o tala-tala wamang nimiri ka'elamikti, Na Allahag wana palilamukang,” aro el nenelamsiogpa, mome toro palilamek. 27 El mo Allah wana hektopne wamlaba, Yesus Kristus pere agha El mo ya'ag uro kipto omeklamebe paghabog omeklamukap.
Sikne agha saekag lebap. Abenda.