“Nu Yesusag wana palirop nimiri nundam nimi wana yeng neneptangtopne mo ulamseng kom,” aro ambatsiogha
15
1 Nuri wana Yesusag khapto palirop nimi wamap tanena, nundam nimi wana yeng neneptangtopne mo uanep kom. Ora nimiri Yesusag wana palirop aghana, “Ane sik uanep to, kom to,” aro wana wag tangtop tanena, nu wana khaptop nimiri ulamnepneog wamlangena, sin wabahin koma, “Yepsukap,” aro ulamukap. 2 Nu nimi niri nungkabo yepsinepne agha, “Mikip nenelamsukap,” aro walinge agha ulamukap. 3 Undo unulamukap sen nena, tam nene sembe. Kristus ponekori babe eldamne yeng neneptangtopne mo ulamog kom. Eldamne yeng neneptangtop komne uaogne sembe septop nimi nhondi mome toro palilamogti, “Nimiri an san tilipto lelamangne nene nanag timbaneo,” aro mome toro pibog.4 Wene aro mome toro pibog pagha tanena, Allah Yubu ni samenag mome toro palilamekne neneko nu el nenero ambatsiropne sembe mome toro pibek. Allah Yubu enekori nu wana mikip nenero wenelamsilne pere agha nuri babe, “Wana maropne paiamneri, walinge tipto ulamneri, amik wali wamnun,” seneropne agha nang-nang aro tiro wamnep.
5 Nari a'un sembe molbarelamsinne, “Allahri nimi wenero wana mikip nenelamsilne ponekori a'un yeplamsilenge pere agha a'un wana maro paiamlulom. A'un wana maro paiapmundi, a'un Kristus Yesusag wana palirop nimiap ma'aptangtopne sunsunum uro seneragna nhonog uro talulom,” aro molbarelamsin. 6 Undo unulapmun tanena, a'un wana seneragna nhonog uro talapmundi, yubu lilim nhonog uro yubu nikne lero Allah paliag nenero omeklamlulom. Elna nu Saelba Uhiropne Yesus Kristus poneko Ili Allah wamla.
7 “Allah paliag nenero omektoba nubu talul,” aro Kristus ponekori a'un taluro ma'alamsil saog uro, a'un mamun babe ma'aro kibildalamlulom. 8 Nari yubu lemnange nene, Kristus poneko yaog nena, “Allahri samenag Yahudi nimi sikinisag yaboag salag lero pibogpa, sik uro yabilul,” aro mome toro pibekne sunsunum uro Kristus eldamne arukna neneptaog. Arukna neneptangka Yahudi nimiri kon karepto ul piropne sunsunum uro nelepto uaog. 9 Yahudi nimi sembe eldamne arukna neneptaog aghana, “Allahri sinag yareag senelamsilne sembe Yahudi sisa kom nimiri babe kipto omeklamukang,” aro arukna neneptaog. Tam nene sembe samenag nimiri Allahag lebogne mome toro paliropne,
“Ane sembe An si paliag nenero nimi mog so'o tala-tala wamang nimi whingag omeklangkenun.
An si paliag nenero sepna pere agha omeklangkenun,”
aro mome toro pibog.
10 Nen nhonag samenag mome toro paliropne,
“Allah Elmabo wana awi ulamsilne saog uro,
A'un mog so'o tala-tala wamlom nimi babe sinap nhon wana awi uro wamlulom,”
aro mome toro pibog.
11 Nen nhonag mome toro paliropne,
“A'un Yahudi sisa kom nimi niri nu Saelba Uhiropne poneko omeklamsut!
A'un mog so'o tala-tala wamlom nimi niri El omekto paliag nenalamsut!”
aro mome toro pibog.
12 Nen nhonag Allah yubu silimu tiptopne Yesaya ponekori,
“Isai ponekori mangarobari mangaroba mangaptanepne nubunge lag talul.
Lag taleri, ‘Nimi mog so'o tala-tala wamang nimi saelbamsinun,’ aro walel ingkilul.
Mog so'o tala-tala wamang nimiri, ‘Nu yepsilul,’ aro Elag wana pairo tilamukang,”
aro mome toro pibog.
13 A'un sembe molbarelamsinnena, “A'undi Allahag, ‘Yepsilul,’ aro tilamlomdi, Elag wana palilamlomne sembe Allahri a'un yepsilul. Yepsilul nena, a'un wana aingniro mamun ma'abahileba, wana awi maikno a'undi wanaag to'op tahilul. A'un wana aingniro awi seneropne to'op tale andarina, Allah Eldamne Yame Walingeri mikipne pere agha a'undi wanaag, ‘Nu wali nembahilul,’ aro tiro seneropne a'unag siriro la'inalamlul,” aro molbarelamsin.
Paulusti nimi mog so'o tala-tala wamang nimiag Yesus yubu walinge ambatto tongolamsiogha sembe
14 Nangkabo, nari wanaag a'un sembe sik senelamnange, a'un Roma nimi wanaag walingeog to'optangto to'obol dalamlaba, walia lero ulamlom. A'un wana heksiro el uro wamlomdi, a'un mamun wali uro yubu ambatto el neneldalamnep. 15 Undo wali wamlom aghana, nari mome toro pairop yubu eneag, “A'un ekon tamunag,” aro yubu tam nhon-nhon lag phoro yubu mikip uro ambatsin. Yubu mikip uro ambatsinne nene, Allahri wana yorolamsilneag agha nari sa'oag, 16 “Nari Yubu walinge mog so'o tala-tala wamang nimiag yubu ambarel phululam,” aro Allahri awe tatneog. Awe tatneogpa, “Allahri awe tol tongolamsene,” seneropne agha Kristus Yesus arukna tahi. Nari yubu ambatto tongolamsin nena, “A'un Yahudi kom nimi tala-tala wamlom nimi Allah Eldamne Yame Walingeri a'un, ‘Naringe,’ aro wepto weamsilul. Wepto weamsileba, memnang Allah sembe pairopnangdi wali-waliaba tarelamlonga saog uro, nari babe nari yubu ka'elapmunne pere agha a'un Allah whingag poa pihinun. A'un poa phineba, ‘Wali tatnelamba tomnun,’ aro Allah wana yeng ualul,” aro yubu ambatto tongolamsin.
17 Ane sembe na Kristus Yesusap ma'aptangkamnamne pere agha Allahri awe tolamnange neneko sembe, “Walinge tolamna,” aro wana awi ulamnel. 18 Nadamne maiptahanenge na sunurop komdi, ot Kristus ponekori na pere agha ulamlange mo yubu lemnun. Nari yubu ambarelamsinneap ulamnangeap Kristus ponekori na pere agha ulamlaba, Yesus yubu walinge nene Yahudi kom nimi tala-tala wamang nimi tanekori ka'elamang. 19 Allah Eldamne Yame Walinge mikipne pere agha kekneba ulamnori, nimiri uanep komne ulamnonge toman Kristus yubu walinge ambarel palamsin. Allah Yame Walingeri mikip nenelamnelne agha, as soro kalurop as Yerusalem babe, Ilirikum so'oag kanerop so'oag babe, ni anabiag urop so'oag babe Kristus yubu walinge teknero nimi ambatto tongolamsin. 20 Nari wanaag, “Yubu walinge ambatto tongolamsisene,” senelamnange neneko, ora nimiri so'o nhonag sam Kristus yubu ambarelahiek tanena, tanekoag ambarel phisi kom. Tanekoag ambarel phisi kom nena, “Ora nimiri yubu yangaropne alibag waelbaneag,” aro so'o anekoag wa'ina ambarel phisi kom. Ot sin Kristus si anam ka'erop kom nimiag, “Ambatto tongolamsisene,” aro ambatto tongolamsisiri ulamna.
21 Samenag ka'erop nimiag ambarel phisi kom aghana, Allah yubu silimu tiptopne nhondi mome toro pibogne sunsunum uro ambarel palamsin.
“Sin El sembe samen ambarelahin komag wamang nimiri ibukang.
Sin samen ka'erop kom nimiri ni wali seneragto el taukang,”
aro mome toro pibog. 22 Mome toro pibogne nene sunsunum uro ambatto tongolamsin ane sembe, na a'un Roma nimiag kemelahisene senelamna. Aghana punpun tiptoba nhon-nhon uro yabalamoba, anam yanep kom ulamla.
“As Roma nimi kemel phinun,” aro Paulusti seneraglamogha
23 Samenag agha hengkun taibuka taubuka ulamog abeneko, nari a'un, “Kemelahisene,” senelamna aghana, ambatto tongolamsinne sembe pa'asea orog. Wene sin ka'erop kom nimi wamang so'o nen nhonag wa'ina ambarel phinep kom saog wamla. 24 Ane sembe na Spanyol so'o palamne abeneko pere, nari a'un “Kemelahisene,” seneropne agha a'unag yanun. A'un Roma nimiag yaneri, ik etpare hale aro wamsebe senelamna. Wamebeba awi nari wanaag to'op taneleba, a'undi na tipto palamnunne olog yepnehom, tanena pinun. 25 Ane amik yanun aghana, anam yan komag wene na as Yerusalem sip, “Allahri weptop kelmabo me yepsinun,” aro pinuan. 26 Sin yebel phinun nena, Allahri wepsirop kelmabo me as Yerusalem wamang nimi nusamag kwema ulamsil. Sinag kwema ulamsil nimi sembe Makedonia nimiap Akhaya nimiapti ka'elamongdi, “Wana yengag agha yepsukapti tarel phululam,” aro kal ma'al poloro wimbaong. 27 Sindi wana yeng seneropne agha tatsiongne nene sunsunum. Sin as Yerusalem nimiag tatsinepneog wamlangena, tam nene sembe. Allahri sin Yahudi nimiag samenag, “Taluro saelbahiropne nhon pognun,” aro salag lero pibog. Salag pibogti, sinag tatsinepne neneko pogto Yahudi sisa kom nimiag babe tatsiog. Undop pagha tanena, wene Yahudi nimi kwema ulamsilba, wali-waliaba so'oag uropne Yahudi sisa kom nimiri saeag talamlange neneko babe pogto Yahudi nimiag yeptoba tatsinep, taneogna sunsunum uropne wamla. 28 Samen Yahudi nimiringe meptaogne pongoro lag taogti, wene wana maubao. Wana mauropne nene keknep talba, Yahudi nimiag samoro, “Kembaukang,” aro tarel phinun. Komopto tatsineri, Spanyol sip palamne abeneko a'un kemel ahinun. 29 Na el wamnange, na a'unag yanepne neneko sembe Kristus ponekori, “Ni walingeog uro yabilul,” seleba a'unag yanun.
30 Nangkabo, nu Yesus Kristus ponekori saelba ulamsil nimi wamapti, Allah Yame Walingeri o'ona senehinne nuri wanaag tarelamsil. Undo wamap ane sembe a'unag mololamsinnena, nari seklero awe tolamnange sae tiptangto tolapmundi, Allahag molbarelamnululom. 31 Allahag molbarelamnumun andarina, Yesusag wana palirop kom nimi Yudea so'oag wamang nimi tanekori, “Na omneikag,” aro sindi saeag agha pelebanelul. Nen Allahag molbarelamnumun andarina, Allahri wepsirop kelmabo me as Yerusalem wamang nimi taneko yeplamsineba, “Wali yepsil,” aro wana yeng uro tobukang. 32 Ni undo wali uro yabile tanena, “Allahri wali sembaleba, na wana yeng uro a'unag yaneri, nikag tektek papto wamukap,” aro Allahag molbarelamnululom.
33 “Allahri nimi wana aingniro ma'alamsilne ponekori a'un ni yae paiamsilul,” aro molbarelamsin. Sikne agha saekag lebap.