“Mog so'oag nimi sembe tam karepto saelba uhirop nangdi yubu ka'ebalulom,” aro ambatsiogha
13
1 Nu mog so'oag nimi wamapne sembe Allahri nimi weplamsildi, “Nimi so'o eneag yubu sia lero tam karepto o'obahilulom,” aro nimi a'ero-a'ero sekililamsil. Saelba uhiropnang ni wamang nena, Allahri sekitna koma waelbanepne nhon babe wamla kom. Ni mog so'o eneag saelba uhiropnang Allahri sekitsiogpa, yubu sia lero tam karepto saelba ulamsiang. Ane sembe a'un nimi niri nu saelba uhiropnangdi yubu sia lelamangne ka'elamsululom. 2 Mog so'o ene saelba uhiropnang yubu sia leropnang Allahri sekililamsil. Ane sembe nimi etneri, “Sindi yubu ene ka'ebahane kom,” aro yubu ingisaplamle tanena, Allahri sekitsiropne ingisaplamlul. Undop pagha tanena, tam kareptop nimiri wana yo pipsinepne sindam nimiag apto anep. 3 Sin saelba uhiropnangna, walia urop nimiag wana yo pipsinep kom aghana, sin malia urop nimiag wana yo pipsinep. Ane sembe saelba uhiropnang sembe walia urop nimiri log sembaheng kom. Mog so'o saelba uhiro yubu sia leropnangdi a'unag tam palihinne karong sembapmun tanena, ot walinge agha ulapmunba, sindi kipsinepneogne nene sembe log sembalulom kom. 4 Allahri saelba uhiropnang sekitsiogpa, sin Allah arukna wamangne, “Mog so'oag nimi taneko wali paiamsiikti, yepsukang,” aro sekitsiog. “Paiamsukang,” aro sekitsiogpa, Allah arukna wamangdi, “Nimi yonge salero opsukap,” aro ulamang. Tam nene sembe nimi opsinep karog Allahri sindi saeag tatsiog. Ane sembe, a'undi malia ulapmun tanena, log senelamlulom. 5 A'un nimina, “Sin umag yubu ka'ero ulamsebe,” senelapmun kom tanena, sindi a'unag wana yo pipsinep. Yo pipsinepne sembe mo kom, aghana a'undi wanaag, “Nene sik, nene mali,” aro seneragnange el talamsil. Ane sembe, a'undi wanaag seneraglapmundi, “Sin umag yubu ka'ero ulamsebe,” aro seneragnepneog wamla.6 Sin so'oag nimi saelba uhiropnang Allahri sekitsiogpa, El arukna wamangdi, so'oag nimi sembe tam karepto o'olamsiang. Ane sembe a'unag, “A'undi saeag agha nunag kipnange pogto tatsumunba, a'un sembe tam o'obaukap,” aro aruklamsiangne sunsunum uro tarelamsilom. 7 A'un sa'oag kamna kareploroba wamlaba, a'undi uanepneog wamlangnena, nimi enekoag kareploroba tatsinepne sunsunum uro tatsululom. A'un saelba uhiropnangdi a'unag, “Nu sembe kipnangeap, a'un o'ohiropne sembengeap nunag tatsululom,” aro aruklamsiik tanena tatsululom. Allahri, “Sin umag wapmundi kipsululom,” aro sekitsiog tanena, sin umag wapmundi, sunsunum uro kipsululom.
“Naba nangkabo wanaagne,” aro o'ona seneptangtopne sembe ambatsiogha
8 Nimiringe kareploroba wamla tanena, ni komopto lumbalulom. Ot a'undi lunuro komobanep komnena, papna koma sop-sop o'ona seneldalamlulom. Nimiri ora nimi tapto o'ona senehirop tanena, Musari aruksirop yubu ni eneko yubu tam nhonag kaupto wamlange wali uro saelba urop. 9 Musari aruksirop yubu mome toro pibog yubu enekoag,
“Nimiringe nengabo kelabo pelebahiseng kom,”
“Nimi opsiseng kom,”
“Nimiringe haogha topseng kom,”
“ ‘Nimiringe naringe wamso,’ sembaheng kom,”
aro mome toro pibog. Ni yubu eneap aruksirop yubu orange mome toro pibogneap, ni eneko yubu tam nhonag ni kaupto wamlangena, “Andamnang nong ningki o'ona seneptangkamlam saog uro andi so'oag nimi babe o'ona sembamsululam,” seneropne agha mome toro pibog. 10 Nimiri o'ona senehirop nimiag malia uahinep kom. Ane sembe, nimiri ora nimi tapto o'ona senelamsil tanena, “O'ona seneldalamlulom,” seneropne agha Musari aruksirop yubu ni eneko yubu tam nhonag kaupto wamlange wali uro saelba ulamla.
11 A'un mamun o'ona seneladalapmundi, nu wene wamap ko'o ene sembe seneragto el tangto wamlulom. Nu talulamsilne ponekori komopnag taulbahilul sum eneko peram tal. Nu samenag Yesusag wana palilamububa, Eldi nu taulbahinep sum eneko olog ko'o we uro wamog aghana, wene peram tal. Taulbahilul sum peram tal ane sembe, “Kwahing nen uahileag,” aro a'undam nimi kamoldalamsut! 12 Inibin nene palamlaba, wene kwelekanep saog wamla. Ane sembe, nu samen inibinag palamuburi ulamubunge nene lipsiberi, tibin wareropne seng enekamebe ina agha pelebeldalamukap! 13 Nimiri inipnag ulamangne, mag yonge along teropti nenek salehirop nimi neneptangtopneap, “Wanaag bobonge agto yaboho,” seneropne agha nengabo kelabo salik-malik saleptangtopneap, mon sek uro, “Naringe taho,” seneropneap, nimiap waptangtopneap ulamang. Undo inipnag unulamang saog uaheng kom aghana, ali neneptan koma yo'obi uanepne sunsunum uro ulamlulom. 14 A'un nongagna, nu Saelba Uhiropne Yesus Kristus ponekoap ma'aptangtopne agha a'un nongag kauptangkamlulom. Andarina a'undi wanaag, “Bobonge agto yaboho aro undo unuahane,” aro nong yeng neneropne elamlulom kom.