“Allahringe wamna,” aro nuri ul pinepne sembe ambatsiogha
12
1 Nangkabo, Allahri nunag yareag sembamsil ane sembe, Elag sunsunum uro omekto tatnepneog wamlangena, “A'un kamag wamlomag a'undam nimiri nong ningki El sembe omekto pail palamlulom,” aro wenero mololamsin. Undo unulapmunneag agha, “Na El moringe taneba, yeng sembanelul,” aro a'undam nimi nong Elag tarel pululom. 2 Wene wamap ko'oag mog so'oag nimiri ulamangne sunsunum uro a'undi nen tipto unuaheng kom. Tipto uaheng kom aghana, a'undi wanaag seneragna wendog nembahiogne pere agha, yog nimi wendog nimi saog talulom. Undo unulapmun andarina Allahri senenne el talapmundi, walinge aro lag nembalulom. Allah wana yeng neneropne aneko ot walinge agha wamlaba, malinge nhon babe orog.3 Wene aro lemnaba, Allahri nanag wana yorolamneldi, “Yubu ene ambarel phululam,” aro nari sa'oag pibogne pere agha a'unag yubu wenero ambatnuahin. A'undam nimi wamlomne sembe wali uro seneragheldalamsut. Allahri a'unag pogto tarelamsilne sunsunum uro Kristusag wana palilamlom. Ane sembe, a'undam nimi maibildalamseng kom aghana a'undi, “Allahri nanag tareamnelne pere agha wene Elag wana paliro ua ulamna,” aro sunsunum uro seneragheldalamlulom. 4 Tam nene sembe sunumna tol pina ambatsinun. Nimi nong nhonog wamlaba, yan saeap nong orangeap babe a'ero-a'ero wamla. Nongag yan saeap nong orangeap aneko nikange urop komdi, a'ero-a'ero uanep. 5 Ane saog uro, nu Kristusap ma'aptangtop nimi wamapti, nong nhonog saog tabu. Nong enekoag nia wamlange aneko orangeap tiptangkamla. 6 Allahri nun nimiag wana yorolamsildi, a'ero-a'ero tarelamsil. Nimi nhonag Allahri, “Nari yubu silimu tipto lelamlul,” aro mikip nenero tatnep. Nimiag undo mikip nenero tatle tanena, nimi enekori wanaag, “Allahri yubu nene tatnel,” aro sik senenne sunsunum uro lelamlul. 7 Allahri nimi nhonag, “Kwema uhirop nimi wali yeplamsilul,” aro mikip nenero tatleba, wali uro nimi yeplamsilul. Ora nimiag, “Yubu amolamsilul,” aro Allahri tatleba, nimi amoro ambarelamsilul. 8 Ora nimiag Allahri, “Nimi wana mikip nembahilul,” aro tatleba, nimi wana mikip nenelamsilul. Allahri ora nimiag tarelamleri, “Eldi saeag agha kwema ulamsil nimiag yepto tatsilul,” aro nimi saeag tatleba, wanaag agha kwema ulamsil nimiag tarelamsilul. Allahri nimi nhonag, “Nimi o'oro saelbamsilul,” aro sekitleba, sol wali uro nimi saelbamsilul. Allahri nimi nhonag, “Wana yareag seneropne agha nimi yeplamsilul,” aro tatleba, wana awi uro nimi yeplamsilul.
“O'ona seneldalamlulom,” aro ambatsiogha
9 Wanaag agha o'ona seneldalamlulom. Malinge karong aro wa'eplapmundi, ot walinge agha kasmi agha saelbamlulom. 10 A'un mamun, “Naba nangkabo wanaagne” aro o'ona seneldalapmundi, ora nimi babe whingag nenero kiplamsululom. 11 A'un, “Sol mali,” semban koma, “Na Saelba Uneropne ponekoringe awe tolamna,” seneropne agha wana nubu uro sol wali uro awe tolamlulom. 12 A'undi wanaag, “Taulbahiropne ponekori yepnelul,” aro nang-nangaro wana awi uro tibogamlulom. A'un seklenne seklelapmunne pere abeneko wana pailangkalapmundi, Allahag sol wali uro sop-sop mololamlulom. 13 Allahri wepsiog kelmabo me kwema ulamsil nimi tanekoag pogto tarelamsumundi, yingkirop nimi babe salero kiplamsululom.
14 Ora nimiri, “Seklebaik,” aro a'un malia ulamsiik tanena, nimi eneko yo'obahin koma ot yubu walinge, “Wali wamlulom,” aro ambatsululom. 15 Wana awi senelamle nimiap ma'aro wana awi senelamlulom. Wana ikindi engelamik nimiap ma'aro engelamlulom. 16 A'un mamun wanaag seneragna nhonog uro ma'aldalamlulom. Metmereng sen koma nimi ologne babe sae tiptangkamlulom. A'undam nimi sembe, “Wana hektop nimi wamap,” senenneag agha maibildalamseng kom.
17 A'unag malia ulamsile nimiag samoro malia uaheng kom. Ot nimi niri kembi agha, “Ane walinge,” senepne sunsunum uro walinge agha ulamlulom. 18 A'un, “Nimi niap ma'aptahabe,” aro ulamlulom. Wana porogneag agha ora nimiap ma'aptanep tanena, tam nemban koma ma'aldalamlulom. 19 Nangkabo, a'un nari wanaag nimi wamlomne, wali ka'ebahut. Nimiri a'unag malia uahiropne samoro lumbaheng kom. Nu Saelba Uhiropne ponekori samenag lebogpa, nimiri tipto mome toro pibogti, “Na mori nimiri malia uropne lumbanun. Tam nene Naringe wamla,” seog. Ane sembe nimiri a'unag malia ulamsik tanena a'undi, “Allahri tam karebaleri, malinge lumbalul,” aro liplulom. 20 A'undam nimiri samoro malinge lumbaheng kom aghana, Allah yubuag mome toro piropne sunsunum uro,
“Anap aisa neneptangtop nimi nhon kwaneng yo ulamle tanena, kwaneng tatlulam.
Mag yo uale tanena, mag tebatlulam.
Anap aisa neneptangtop nimiag walinge ulapmenne pere agha, eldi usoghag ali neneptangtoba loloro paliropne elag talul,”
aro mome toro pibog.
21 Nimiri a'unag malia ulamikneri luknubahilul kom aro togtangto wamlulom. Samoro malinge ualulom kom aghana, a'undi walia ulapmunne pere agha malinge nene luknubalulom.