Roma
Nimi Sembe
Paulusti Mome Toro Pibogne
Paulusti Roma nimi sembe kipsiogha
1
1 Nangkabo, na Paulusti a'unag mome toro palilamna. Samenag Allahri na Paulus wepto yopneogti, “Yubu Walinge ambatsululam,” aro pogneog. Wepto pogneogpa, wene na Yesus Kristus arukna wamnari, ambatto tongolamsin. 2 Allah Yubu Walinge neneko samenag agha, “Undo-undo unuanun,” aro salag lekto pibog. Salag pibogpa, Allah silimu yubu tiptop nimi tanekori Allah yubu mo wepto nikag mome toro wali uro palilamek. 3 Allah Yubu Walinge, “Uanun,” alamogne neneko Elme sembe lelamog. Allah Elme ponekona, nunisag Daudti likto palamogne pere agha mog so'oag nimi nongag mangap taog. 4 Mangap taogti wamogpa, obekpa tebaog. Tebaog aghana Allah Eldamne Yame Walingeri kamag nembaogne pere agha Allahri, “Naba Name wamlange,” aro lag nembatsiog. Allahri lag nenelamsiogti, “Name enekori mikip uro saelbamsilul,” aro Elme sekirog. Elme ponekona, nu Saelba Uhiropne Yesus Kristus sembe samenag agha salag lekto pibog. 5 Nu Saelba Uhiropne Yesus pere agha Allahri nunag wana yororo wali senelamsil. Wali senelamsildi, nu weplamsildi, “Nimi tala-tala wamang nimi ambatto tongolamsumunba, ka'elamikti Elag sikne aro wana palilamikpa, El si nubu talul,” aro poglamsil.6-7 Nangkabo, a'un as kaluro sorop as Roma wamlom nimi babe Allahri o'ona sembamsildi, “Yesus Kristus ponekori saeag wamikti, Namabo taukang,” aro a'un mo wepto yopsio. A'un yopsio nimi taneko kiplamsin. “Nuni Allahap Nu Saelba Uhiropne Yesus Kristusap abenekori wana a'unag yororo walia ulamsirikti, wana aingnibahurukang,” aro molbarelamsin.
Paulusti Roma nimi sembe Allahag molbatsiogha
8 Orange anam ambatsin komag, a'un ambatsisene senelamnange tam nene sembe. A'undi Yesusag wana palilamlomdi ulamlomne sembe tala-tala wamang nimiri wali ka'elamang. Ane sembe Yesus Kristus pere agha a'un nimi nhin sembe Nuni Allah, “Wah Naniong,” aro kiplamna. 9-10 Wana nong ningkiri Allah omeklamnari, yubu walinge Elme sembe ambatto ul palamna. Nuni Allahri ililamnelba, a'un sembe ekon tanep komdi papna koma, “Yepsululam,” aro Elag sop-sop molbarelamsinba, ka'elamneldi, el wamla. Samenag agha sarikto, “Kemel phisene,” aro mololamnangena, Nuni Allahri yeng sembaleri, ina yarebatneleba, elem a'unag yanun. 11 “Eh, nangkabo-e, kemel phisene andarina, Allah Yameri na sae pere agha a'unag tatsisoba wana mikip tahom,” aro wanaag seneraglamnari Allahag mololamna. 12 Haiptahaberi nu mamun Yesusag wana paliro ua ulamapne sembe ambattangto ka'eptaheberi, wana mikip neneptahabe. 13 Nangkabo, na a'unag anam yan komag a'un ekon uro wamnep komdi, yubu ambatsinun. Samen na ora nimi tala-tala wamang nimiag ambatto tongolamsinoba, ka'elamongdi Yesusag sikne aro wana palilamang. Sindi Yesusag wana palilamangne anena luksiriro pongkaloa saogne nanag palilamnel. Ane saog uro ik sulu a'un Roma nimi babe, “Lukselelep aro pongolamlea kemel phinun,” aro sunulamno aghana, punpun tiplamlaba yanep kom.
Allah yubu walinge mikipne sembe tibin nembatsiogha
14 Allahri yubu nari sa'oag pairo pogneoba wamla. Nimi sisa Yunani nimiap, nimi sisa ora nimiap, mome el urop nimiap, ekon urop nimiap, nimi niag nari sa'oag pibog yubu eneko ambatsinepneog wamna. 15 Ane saog uro a'un as Roma wamlom nimiag babe yeng uro yubu walinge nene ambatsisene senelamna. 16-17 Yubu walinge nene Allahringe mikipne wamlaba, sikne aro wana palirop nimi ni talulamsil. Mikipne anekoag agha Yahudi nimi sam talulamsiogti, Yahudi kom nimi babe talulamsil. Anena yubu walinge anekori Allahri wana porogne lag nembarelamsildi, Elag wana palirop nimi porog nenelamsil. Porog nenelamsil andarina, amik babe Allah yubu nenekoag wana palilamukang. Tam nene sembe Allah yubuag mome toro palilamogti, “Wana porog nimiri sikne aro wana paliropne agha kamag ua ulamlul,” aro mome toro pibog. Allahringe mikipne wamlaba, Elag wana palirop nimi ni talulamsil ane sembe, nari yubu walinge neneko ambarelamsinne sembe na ali sembanep kom.
Nimiri malia uroba sembe Allahri wana yo pipsinep seogha
18 Allah poneko sikne wamla ane sembe, mog so'oag nimiri sik komneap Allahri “Uaheng,” senenne sunsunum komneap ulamang pagha tanena, Allah Imagne ponekori wana yo senehinne lag talamla. Sin sikne urop kom nimiri, “Ka'ebaukap kom,” aro Allah yubu sikne niknilamang. 19-20 Sikne niknilamang nena, Allahri samen ulamogti, “Nia mangkina sumbahisiri, ya'ag uropne mikip sirikne wamnaba, el uro wamlulom,” aro Eldamne sembe lag nembarelamsiog. Allahri nia mangkina mog so'oag uropne sumbahiog sum agha, wene wamabag babe nimiri Allah haingdi imnep kom. Nimi haingdi El imnep kom aghana, nimiri kemeropti, nia mangkina sumbaogne haingdi iropne pere agha el tanepnena, “El ya'ag uropne poneko mikip sirik wamlange, El mo mem sirikne wamla,” aro el tanep. Haingdi iropti el tanep ane sembe, nimi nhondi babe, “El sembe ekondi malia uan,” aro koloptanep kom. 21 Koloptanep komnena, nimiri haingdi iropti, “Sumbahiogne poneko wamla,” aro el tanep aghana, sindi seneragnange loba neneldalamekti, sindi wanaag inibinne aghabog seneraglamek. Allahri sumbahiogne ibekti, aghabog nimiri Elag, “Wali tatsilum,” senelamek komdi, “Allah Memne,” aro paliag nenero kiplamek kom. 22 Sindam nimi sembe, “Nu wana sepsebek aro elnang wamap,” alamek aghana, wanaag seneragna orog nimi agha neneldalamek. 23 Allah tebanep komne poneko paliag nenero kipto omekanep andagha, karong sembaekti, tebanepne agha kipto omeklamek. El tebanep komne poneko kiplamek komdi, nimiap, winangap, paghaeap, lebe aroba yogneap, “Phalamukap,” aro yame sunumna sunsunum uro saeri sunulamekti, omekto kiplamek.
24 Undo unulamek ane sembe Allahrina, “Sindi wanaag bobonge agha ‘Malinge uaukap,’ senelamangne sunsunum uro ulamikti, sindam nimi nong loba neneldalamukang,” aro lipsiog. 25 Allah yubu sikne neneko karong seekti, orolenange agha ka'elamek. Nia mangkina sumbahiogne poneko omekto kipna koma, Eldi sumbahiogti, mog so'oag paibogne agha omekto phalamsiek. Aghana El imap so'oap sumbaogne poneko agha kipto ya'ag uro omelamukap. Sikne agha saekag lebap.
26 Sindi undo unulamekne sembe Allahrina, “Sindi wanaag 'Uaukap' senenne ali neneptanepne ulamik,” aro sae lipsiog. “Ali neneptanepne ulamik,” seogne nenena, Allahri sumbahiog sumeneko, “Nengaboap kelaboap toldalamukang,” aro sumbahiog aghana, kelabo tanekori nengabo topsin koma kelaboap kelaboap mo toldalamek. 27 Toldalamek ane saog uro, sumbahiogne ponekori senenne sunsunum uro uan koma nengabori babe kelabo topsinepne topsin koma lililamekti, wanaag bobonge “Agto yaboho,” aro ulamekti, kaubuni mamun elkel ela'ange neneldalamek. Nengabori nengabo saleptangto ali neneldalamekti, sengkwanekto ulamekne taneko sunsunum uro sindam nimiag ikinne palildalamek.
28 Sindi Allah wamlange sembe ero seneraglamnep andagha, Allah loba aro karong senelamek. Allah lobange sembamekpa Allahrina, “Sindi seneragnange loba tahileba, nimiri uaheng komne ulamukang,” aro sae lipsiog. 29 Sindi wanaag seneragnange ni sik komneap, malingeap, aboapneap, yongeap sindi wanaag to'oboldalamla. Sindi wanaag maikno uro, “Ora nimi tup taikag,” aro wana malinge seneraglamsiangdi, ot nimi ya'ag ohinneap, nimiap waltananneap, pan khebahinneap, arikal nimiri yonge uropneap aghabog sindi wanaag teknero seneraglamang. Ora nimi sembe yubu malinge phoana yubu polamsiangdi, 30 san tiliplamsiang. Allah sembe karongdi, sindam nimi maiptangto ora nimi luknulamsiang. Sindam nimi omekeldalamangdi, “Malinge agha uahane,” aro seneraglamangdi, sikini sikinindi yubu babe ka'elamsiang kom. 31 Sindi wanaag seneragnange orogti, salag piptangtopne ingisaplolamangdi, yareag senehinne orogti, nimi o'ona senelamsiang kom. 32 Sin nimi taneko el wamangnena, Allahri samenag yubu sia lelamogti, “Nimiri undo salik-malik uro malia ulamik tanena tebaukang,” seognena el wamang. El wamangtiog malinge nene ulamang. Ot malia ulamang abeneog kom aghana, ora nimiri malia ulamang nimi sembe maiplamsiang.