Sumbaogha 4

Kaindi ilipsae Habel obogha (4:1-16)

1 Wamdekti, Adam neneko elkel Hawaap mapdekpa, Hawa me monag taogpa nengabo me mangaro aog. Nengabo me mangaro aogti, “Nani Allahri yeplamneldi nengabo me tatnel,” aro me si Kain engkaog. 2 Kain mangaro aogti ilipsae Habel babe mangaro aog. Mangkahiogpa, me abeneko nubu tarekti, Habel neneko pham mo'oropne wamogpa, Kain neneko awe wenne wamog. 3 Wamdekti, Kain nenekori, “Nani Allah sembe mhong towalengkimnun,” aro aweag mebogne nenne tobogti aukag tabog. 4 Tabogpa, Habel nenekori babe elenge pham domba taneko samenag mangaptaogne mesah yagne nhon tobogti Ili Allah sembe tabog. Tabogpa, Ili Allahri, “Habeldi taplange wali,” aro Habel sembe awi sembaog. 5 Aghana Kaindi aukag tabogne sembe karong sembaog. Ane sembe Kain yo sembaogti, whing mali taog.

6 Whing mali taogpa, Allahri Kainag, “Sa'a sembe yo talamdi whing mali talamlam?7 Andi walia uahomdi whing sepsebek uro wamsom. Andi, ‘Yonge uanun,’ sembalamba, malinge an wanaag wa'al anal. Malinge nenekori an wanaag aluklangkel ana malinge seneraglamlamne nene lipsiri hekto wame,” seog.8 Wene seogpa, Kain nenekori ilipsae Habelag, “Aweag pununam,” seogpa, pirekti, aweag anekoa Kaindi ilipsae Habel ya'ag obog.9 Obogpa, Allahri Kainag yubu lelamogti, “Anipsae Habel tala wamla?” seogpa, Kaindi, “Na ekon. Na sop-sop naipsae yae wamsene, te?” seog.

10 Wene seogpa, Allah yubu lelamogti, “Sa'a sembe tamna nene ualam? Anipsae eneng so'oag yingkilne nenekori nimi yubu saog uro Nanag lelamlange neneno. Anipsae eneng yingkilne andi babe tognobanep kom,” seog. 11 Wene seogti, “Anipsae ya'ag oplamne eneng mog so'oag yingkilana an so'o eneag wamlulam kom aro yo'olangken. 12 Andi awe weltolapmenne, sa'a-sa'a melapmenne, pongona babe pongkalul kom. Ane sembe aingniro wamna koma ina pu alapmendi, as nhonag pang yang ulamlulam,” seog.

13 Wene seogpa, Kain nenekori Ili Allahag ambarelamogti, “Nani, yaghe! Tam nanag piplamne nene ikin maiknori, nari pomnep kom saog wamla. 14 Andi, ‘Na whingag wamleag,’ aro so'o walinge nene agha yag lambanelamba, aingniro koma wamneri as nhonag pang yang ulamneri wamneba, nimiri imnikti opnukang,” seog. 15 Wene seogpa, Allahri, “Wene selamba, Nari yubu lelamnari, ‘Nimiri an opkikpa toro tipto Nari sindi nimi saekpare opsinun,’ alamna,” seog. Wene seogti, “Nimiri talaba ibikti obikag,” aro Allahri Kainag kekneba pibog. 16 Kekneba pibogpa, Kain neneko Ili whingag agha lambaogti, Eden so'o laplobi agha heng walelingkirobag sip piogti, mog so'o Nod aro engerop so'oag pina wamog.

Kaindi mangarobari mangaroba sembe pibogha (4:17-24)

17 Kain neneko elkelap maptekpa, elkel keleneko me monag taogpa, nengabo me mangaro aogti si Henokh engkaog. Wamekti, Kain nenekori as kaluro sorop as sobaogti, elme si sunsunum uro as Henokh si engkaog. 18 Henokh elme Irad, Irad elme Mehuyael, Mehuyael elme Metusael, Metusael elme Lamekh mangaro yabiog. 19 Lamekh nenekori kelabo phende topsiogne Adaap Silaap topsiog. 20 Ada nenekori Yabal mangaro aog. Yabaldi mangaroba mangarobari tanekori pham maikno pia ulamekti as nhonag tea ko'oa ulamek. 21 Yabal ilipsae taptoba si Yubal nenekori mangarobari mangaroba pingkong ona elnang wamekti, ma'i lom toman phoaro lenne el wamek. 22 Lamekhti kel Sila keleneko elme Tubal-Kain mangaro aogpa, eldi mangarobari mangaroba awena besiap kirik tembagaap nhon saogha nhon saogha sununnang wamek. Tubal-Kain elipsa'el si Naama wamog.

23 Lamekh neneko kelabo phende topsiogne abenekoag maiptangto sepna seplamogti,

“Nimi nengabo nhon olog uro opneogha sembe nari ya'ag opsi.

Meneng sisua ologha sembe me nengabo nhon ya'ag olopsi.

24 Kain omnepne sembe Allahri, ‘Nimi saekpare lunuro opsinep,’ seog.

Undop agha tanena, omneikne sembe lunuro nimi teng wilindi opsinep,”

aro seplamog.

Setap Enosap sembe mome toro pibogha (Kej. 4:25-26)

25 Adamap elkel Hawaap nikag maptekpa, kel enekori me nhon mangaro aog. Mangaro aogti, “Kaindi Habel obogpa me mangaro hane komne agha Allahri Habel lunumna tatnel,” aro me aneko si Set engkaog. 26 Set nenekori me nengabo me nhon mangaro aogti si Enos engkaog. Enos wamog li ko'o eneag agha “Nuni Allah mema singkikne,” aro si lena imbaek.