Nimiri Allah yubu lipsieka (3:1-13)
3
1 Allah Nuni ponekori nia mangkina sumbaogne taneko agha, paiag urop lebe aroba olog ekonpog, phae nhon wana olog hektopne wamog. Phae anekori kelabo anekoag hailamogti, “Allahri, ‘Kal wana ni tane teheng kom,’ aro ambatsil, te?” aro haibaog. 2 Wene seogpa, kelenekori, “Kom! ‘Kal so'o eneag wamlange wana ni telamturom,’ seo. 3 ‘Ot nusamag wamlange neneog salena babe saelbaheng kom, tena babe teheng kom. Tirumun sum a'unag agha tepna lag talul,’ seo,” seog. 4 Wene seogpa, phae anekori, “A'unag agha tepna lag talul kom,” seog. 5 Seogti, “Allahri leplange nene, ‘Kal wana ane tirikti, Na Allah saog uro wamdikti, “Malinge nene, walinge nene,” aro wana hekahileag,’ aro yubu orolena lebo,” seog.6 Wene seogpa, kelenekori kal “Tururom kom,” seog kal eneko kemelamogpa, kal aneko wana wali wamogpa kembaogti, “Kal wana ane teneba wana hekto yabinilul,” sembaog.
Wene sembaogti, kal wana aneko tagto teog. Teogti, ela'ange babe tarogpa teog. 7 Terekti, abeneko kemel talamdekpa, kabeog wamdek. “Kabeog wamnam,” aro wana hekahiogpa, kal ara ma'al wiptekti enekarek. 8 Ae sinag ae pho alamogpa, Allah Nuni poneko awe anekoag palamogha lilim ka'ebarekti, sin phende abeneko Nuniri ipsileag aro kal liliag tognol talamdek. 9 Tognop tarekti, wamdekpa, Allah Nuni ponekori nengabo anekoag, “Tala wamlam?” aro yobog. 10 Yobogpa, nengabo anekori, “An aweag yalamlama lilim ka'ebandi, kabeog wamna aro aliri tognol talan,” seog.
11 Wene seogpa, Allahri, “An kabeog wamlam aro etneri ambatkel?” seogti, “Kal wana teheng kom senne neneko telam, te?” aro haibaog. 12 Haibaogpa, nimi nengabo anekori lelamogti, “Kelabo anap wamturom aro tatneomne nenekori kal wana aneko tatnelba, tendi wamna.” 13 Seogpa, Allah Nuni ponekori kelabo aneko hailamogti, “Sa'a sembe kal wana ane telam?” seog. Wene seogpa, kelenekori, “Phae aneri yubu neplamneldi, ‘Tululam,’ selba ten,” seog.
Allahri Adamap Hawaap tam pibogha (3:14-21)
14 Wene seogpa, Allah Nuni ponekori phae anekoag yubu lelamogti, “Andi yubu orolenange leplamba, tam nubunge anag palilamna. Nia mangkina lebe aroba taneko, ot an aghabog so'o ina mon moagti lelepto palapmendi, so'o leng-lenga aghabog tero wapmendi, tebalulam aro yo'olangken,” seog. 15 Yo'olangken seogti, “Nari salag lelamnari, anap keleneap aisa neneptangto wamturom aro salag palilamna. An anmaboap, kelene elmaboap isa orobog wamtumundi, andi, ‘Keleneri elmabo nhon yan pubuag si sapsinun,’ aro ulapmenba, eldi andi usog solapto olangkilul,” seog.
16 Wene seogti, Nuni ponekori kelabo anekoag yubu lelamogti, “An me monag poroapmenba, an me mon maikno telangkilul. Me mangaro anep peram me mon ogti indolamlulam. Andi ana'ange sembe wana maikno seneraglamlulam, aghana eldi arukna nembangkilul,” seog.
17 Wene seogti, Nuni ponekori nengabo anekoag, “Andi ankel yubu ka'ebalamdi, kal wana teheng kom senonge telamba, andi awe welapmenne mali talamlul aro yo'olamna. Andi awe kilim weyang alapmendi, welapmenne melapmenneog tero wapmendi tebalulam. 18 Yo yoaba, alogha pongkaleba, paiag mo pongoroba aghabog tero wamlulam. 19 Awe welapmendi, whin yangkalangkel ebog tero wapmendi, tebalulam. An nong so'o agha sumbahiana tebamendi, samoro so'o talulam,” seog.
20 Wene seogpa, “Kelabo aneko nimi ni kamag tanep nimi sikinin talul,” aro ela'ange Adamdi Hawaa engkaog. 21 Engkaogpa, Allah Nuni ponekori sin phende sembe lebe aroba kon agha ag wetnero enekitsiog.
Adamap Hawaap Eden so'oag agha yag lambahiogha (3:22-24)
22 Allah Nuni ponekori yubu lelamogti, “Wene sin nimi phende abeneko Nu saog uro tarangdi, ‘Malinge nene, walinge nene,’ aro wana hekto yabihil. Sin teban koma ya'ag kamag wamdikag aro, nimiri teropba nimi ya'ag kamag urop kal wana eneko turukang kom,” seog. 23 Sembaogti, Eden awe so'oag aneko yaglamsiogti, “Nari sumbahisi so'o enekoag welamlul,” aro nimi abeneko yag lambahiog. 24 “Nimiri teropba nimi ane ya'ag kamag urop kal peramag babe pirikag, tena babe tirikag,” aro Allah arukna malaikat Eden so'oag anekoa heng walelingkirobag sip sekitsiog. Sekitsiogne, yae ua unneap, mal tomeag auk pog taktak aropne lemeng-lamang aropne sekitsiog.