Kristusti wepto pogsiog nimiri ua uropne sembe ambatsiogha
4
Wene aro lemna pagha tanena,
nimiri nu sembe seneraglamsiikti,
“Kristus umag awe torop nimi wamangba,
Allahri samenag tognoro pibog yubu eneko wene sindi saeag piboba,
paia uro o'olamang,”
aro nu sembe seneraglamseng.
2 Allahri nimiri saeag,
“Paia uro o'obahilulom,”
aro pibog tanena,
nimi tanekori ot sunsunum uro sol wali,
wali uro ulamnepneog wamla.
3 Aghana nari ambatto tongolamsinne sembe a'undi tam kemero seneraglapmunne babe,
ora nimiri na sembe tam kemero karebatneikne babe,
nene sembe nanag tam nubunge kom.
Nadamne sembe babe na tam karebel dalamna kom.
4 Na mori ulamnange sembe nari wanaag,
“Ot porogne agha ulamna,”
senelamna.
“Porogne agha ulamna,”
senelamna aghana,
nu Saelba Uhiropne poneko el mori nari ulamnange sembe sikne el wamlari,
tam karebatnelul.
5 Ane sembe nu Saelba Uhiropne anam samoro yan komag a'undi tam karebatsiseng kom.
El yale sum eneko ni inibinag tognoro wamlange tibin nenero warebatsileri,
nimiri wanaag yeng seneropne lag nembalul.
Tibin warero lag nembale sum eneko Allahri nimi a'ero-a'ero,
“Walia ulamlam,”
aro kipsiropne tatsilul.
6 Nangkabo,
ae soropneap awe weropneap abenekoag sunumna tol pina sumbatsinne nadamneap Apolos ponekoap sembe sumbatsin andarina,
nu pere agha el talulom.a
El talamlulom nena,
nimiri lelamangne,
“Allah Yubuag mome toro pibogne phelekto uaheng kom,”
aro yubu lelamangne el talamlulom.
El talapmundi,
nimi nhon paliag nenero,
nhon mombolag nenero maibil dalamseng kom.
7 Wene maiptaheng kom aro lemnange nenena,
andamne sembe,
“Na paliag wamna,”
seneptangkamlam tanena,
nimi etneri tam karebi agha an paliag nembaghel?
Ni anag wamlange orangeri anag tatkeong.
Orangeri anag tatkeong tanena,
andamne paliag nenep tangka,
“Na mori uan,”
aro maibil dalamloa saog ulamlamne nene sunsunum te?
8 A'undam nimi sembe senel dalamlomdi,
“Nuri yeng seneropne nunag ni wamlaba,
teko orogti,
tup nimi wamap,”
senel dalamlom te?
A'undam nimi sembe,
“Nunna nubu nimi wamapti,
yubu sia lero saelba ulamsiap,”
aro ulamloa saog ulamlom.
Aghana nu Yesusti wepto pogsiog nangap a'unap nhondi saelba ulamsinep kom te?
Yaghe,
nari wanaag senelamnange,
a'un sik uro yubu sia lero saelba ulamsom andarina,
nu babe nubu nimi tahaberi,
a'unap nhon nuri saelba ulamsisebe.b
9 Nari wene aro lemnange nenena,
a'undam nimi sembe,
“Nubu nimi wamap,”
senel dalamlom.
Senel dalamlom aghana,
Allahri nu wepsiogti,
“Yesusti yubu ambatto tongolamsululom,”
aro pogsiog.
Nu undo pogsiog nimi sembe nimi whingag Allahri lag nembatsiogpa,
nu haing sek uro kemelamsiang sembamna.
Nu mog so'oag nimi whingag wamap nena,
nimiri nu luknuhiro haing sae kaupsilongdi,
kiliro pabahina ya'ag olamsinba,
kemero longolamsilong saog nimi tebanep saog nimi wamap.
Nu wene wamapne nia mangkina whingag Allahri nu lag nembatsiogpa,
nimiri babe,
Allah arukna imagnang malaikatti babe,
nu wene wamapne kemero longolamsilonga saog wamap.
10 Nuri Kristus yubu ambarelamsiapne sembe mog so'oag nimiri nu sembe,
“Limituk nimi,”
senelamsiang aghana,
a'un mo Kristusap ma'ap taomne agha el urop nimi taom te?
Nu sembe nimiri,
“Mikip uro urop kom nimi,”
senelamsiang aghana,
a'un mo mikip nimi taom te?
A'un agha nimiri paliag nenero kiplamsiang aghana,
nu mo sembe loba aro ulamsiang.
11 Samenag agha babe,
wene wamapne babe kwaneng yoap,
mag yoap ulamsilba,
nuri nongag wangaro anepne babe teko ulamsil.
Nimiri nu arikala ulamsiangba,
aingniro wamna koma as nhonag pang,
nhonag pang ulamapti,
12 whin seklero nu mo saeri awe tolamap.
Nimiri nunag san tiliplamsiangba,
sinag samoro,
“Wali wamlulom,”
aro kiplamsiap.
Nimiri nu,
“Seklebaik,”
aro ulamsiangba,
nu wana pailingkina ulamap.
13 Nimiri nu sembe yubu lololamsiangba,
nuri nimi wana mikip nenero ambarelamsiap.
Nunna nimiri karong aro malinge toboglopsinepne saog uro ulamsiangdi,
mog so'oag nimiri nu sembe elel senelamsiangdi wa'eplamsiangba,
wene babe undo wamap.
14 Wene aro mome toro pimnange nene,
“A'un ali nembahinun,”
aro mome toro pimna kom aghana,
“Nari wanaag mabo el nembahinun,”
aro a'un wenelamsin.
15 Nari sam a'unag Yesus yubu walinge ambatsisiba,
ka'ebalumne pere agha a'un sembe na a'uni saog tahi.
Ane sembe a'un Kristusap ma'ap tangto wamlom nimi sembe amohiro yae paia uhirop nimi teng-tengne wamnep aghana,
na mo a'undi naiyong tahi.
16 Na a'uniyong wamna ane sembe,
“Nari ulamnange sunsunum uro a'undi babe nelepto ulamlulom,”
aro wenelamsin.
17 “A'undi nari ulamnange sunsunum uro nelepto ulamlulom,”
aro name wanaagne Timotius a'unag pogno.
El nu Saelba Uhiropne ponekoap ma'ap tangtopne wamlari,
ot sikne agha sol wali,
wali uro ulamla.
Nari yubu Yesusag wana paliro winil dalamang nimi tala-tala wamang nimiag ambarelamsinne sunsunum uro a'unag yubu tipto ambarel ahilul.
Nari Kristusap ma'ap tangtop ina agha ul palamnange sembe babe,
ambarelamsin yubu eneko babe a'unag el nenelamsilul.
18 A'un nimi nhon-nhondi a'undam nimi maibil dalamlom.
Maibil dalamlom nena,
“Paulus nunag yalul kom,”
senelamloa saog uro maibil dalamlom.
19-20 Aghana nu Saelba Uhiropne ponekori yeng sembaleba,
elem uro a'unag yanun.
Allahri nimi saelba ulamsila neneko ot yubuag agha saelba ulamsil kom aghana,
mikipneag agha saelba ulamsil.
Ane sembe a'unag yaneba,
a'un maibil dalamlom nimiri yubu lelamlomne mo ka'ero el tanun kom aghana,
“Allahri a'unag mikipne paiamla to,
kom to,”
aro el tanun.
21 Na a'unag yaneba,
a'undi na sembe,
“Nelagha ualul,”
aro yeng senelamlom?
Na a'unag yaneri,
kameri oro wembahiloa saog uro yanun to,
win-win aro wanaag agha o'ona senehiro a'unag yanun to?