Roma 9

Allahri nimi wepsiogne sembe ambatsiogha

Na Kristus ponekoap ma'ap tangto wamnari orolena yubu ambatsin koma ot sikne agha yubu ambarelamsin. Nari wanaag seneraglamnange Allah Eldamne Yame Walingeri el wamlari, “Sikne leplam,” aro nari wanaag ambarelamnelba, yubu ambarelamsin. 2 Nari wana ikin sirik ulamneldi, sop-sop wana saplamnel. 3 Wana saplamnel nena, nangkabo nanisag Israel ponekori mangaroba mangarobari mangkahiek nimi sembe wana saplamnel. Sin Israel nimi taneko Kristusap a'eptangto wamangba, “Sin yo'obahinepne yo'obahileag aro nana agha lunuptanep andarina, sin taulbahiso,” sembamna. 4 Sin Israel nimi samenag Allahri, “Nari kelmabo me taukang,” aro weplamsiogti yoplamsiog. Eldi imang wareroba sinag lag nenelamsiog. Allahri sinap yubu nikne saekag lebek. Allahri aruksirop yubu Musa pere agha sindi saeag pibog. Allahri awe tolamekti omeklamekpa, “Undo-undo tatsineri yeplamsinun,” aro sinag salag pibog. 5 Sikinisagti likto mangkahiek nimi agha Kristus poneko mangkaekpa, mog so'oag nimi nongag lag taog. Kristus poneko eldamne nia mangkina salelamlange poneko Allah wamla. El mo ya'ag omeklamukapne wamla. Sikne agha saekag lebap.

6 Allahri samenag Israel nimiag, “Undo-undo walia tatsineri yeplamsinun,” aro salag pibog. Wene aro salag pibog aghana, Kristus yaogpa, sindi el kibek komne sembe, “Salag pibogne nene wene angaro yabil,” sembanep te? Undo sembaheng kom! Angaro yabil kom alamnangena tam nene sembe. Allahri Israel nimi tapto wepsiog nimina, ot sin Israel ponekori likto mangkahiog nimi agha kom. 7 Abraham elmabo babe. Abrahamdi likto mangkahiog nimi ni sembe Abrahamdi nimi yina likto piropne senep kom. Ni likto mangkahiogne elmabo alamap kom aghana, Allahri lebogne sunsunum uro, “Anme Ishak pere agha andi nimi yina likto pilul,” aro salag pibog. 8 Wene seogne nenena, Abraham nongdi likto mangkahiog nimi taneko Allah elmabo taukang kom. Allahri nimi eneko sembe, “Nari kelmabo me,” senelamsil nimina, ot sin Allahri salag pibogne sunsunum uro lag nembahile kelmabo me taneogna, sin nimi taneko sembe, “Abrahamdi nimi yina likto piropne,” sehileba Allahri kelmabo me taukang. 9 Allahri salag lebogne neneko ane. “Nari lerop sum eneko ankel Sara kel enekori me nengabo me mangaro aleba, wamtumunag samoro yanun,” seog.

10 Salag pibogne nene nhonog kom. Amik sum babe Abraham elme Ishak ponekori elkel tobogpa, Ribka kel eneko me monag taog. Me monag wamogpa, me phende monag wamdekpa mangkahiog. Me phende abeneko sikini Ishak ponekona, nunisag babe wamla. 11-12 Me phende abeneko anam mangap tan komag, malinge babe walinge babe uan koma monag wamdek. Monag wamdekpa, Allahri sin me phende abeneko sembe, “Walinge to, malinge to uarang,” aro seneragna koma tam karebatsiog. Allahri nimi kiliro yoplamsilne ponekorina, “Undo uro yaboho,” senelamogne sunsunum uro, “Nimi tane wepsinun,” aro tam karebatsiog. Me phende monag wamdekpa, sikinin kel enekoag Allahri yubu lelamogti, “Nabinge paliag taleba, yandonge el arukna talul,” aro yubu ambarog. 13 Yubu eneko sunsunum uro Allahri yubu lebogpa, mome toro palilamogti, “Ilipsae Yakub o'ona sembamna aghana, eldo Esau na karong,” seogne mome toro pibog.

14 Wene seogne sembe nuri sa'a sukap? “Allahri sik komne uaog,” aro nuri yubu lemnep te? Undo wene sembaheng kom! 15 Tam nene sembe Allahri Musa ponekoag yubu lelamogti,

“Nimi etneag yareag sembanenge, naba nari wanaag agha.

Nimi etneag o'ona sembanenge babe, naba nari wanaag agha,” seog.

16 Wene seog tanena, Allahri nimi weplamsil nena, nimiri wanaag yeng seneropne agha nimi weplamsil kom. Nimiri wali uro ul piropne agha babe Allahri nimi weplamsil kom. Ot elba eldi wanaag agha yareag senelamsilne sunsunum uro nimi weplamsil. 17 Nimi weplamsilne nene sembe Allahri Firaun ponekoag yubu lelamogne Musari mome toro pibog. Allahri Firaunag yubu lebogne ane:

“Nari an sekitkehinge, tam nene sembe.

‘Na mikipne an pere agha lag tale andarina, mog so'o tala-tala nimiri nari si lelamikpa, nubu talul,’ aro sekitkehi,”

seogne Musari mome toro pibog. 18 Wene seog tanena, nimi etneag Allahri, “Yareag sembandi, undo unuahane,” senelamla tanena, nimi enekoag yareag seneropne agha ulamlul. Apna nimi etneag, “Wana kasmi aropne nembanun,” senelamla tanena, nimi eneko wana kasmi aropne nembanep.

19 Wene aro yubu lemnaba, a'un nimiri nanag samoro hailamnumundi, “Allahri, ‘Undo uro yaboho,’ seneropne nimiri kom senep kom. Ane sembe sa'a sembe nunag tam piplul?” aro wene sembanep.

20-21 Wene sembanep aghana, an mog so'oag nimi etne wamlamdi, Allahag haim-haim alamlulam? Sunumna nhon sumbatsinun. Nimi nhondi so'o olog tomnari, so'o nenekoag agha mag tero liroba nhon-nhon sumban. Mag tero liroba sunuropne ponekona, el mori so'o saelbandi, elba eldi wanaag agha sumban tanena, ane sunsunum te? Mag liroba nhon sumbanep nena, “Ot mag liroba anda wamla,” aro el ponekori nhon sumbanep. Mag tero liroba nhon sumbanep nena, “Wali sirikne o'omne talul,” aro nhon sumbanep. Aghana el saeri sumbahoba, so'o agha mag liroba enekori yubu lelamnari, sunuropne ponekoag, “Sa'a sembe undo sumbaneom,” aro haibanep te? Undo wene aro haibanep kom.

22 Ane saog uro Allahri uanepne sembe lemnuan. Allahri seneraglamsori, “Nari wana yo senenneap mikipneap nimi ni whingag lag tahisoba, el taheng,” aro seneragnep. Wene aro seneraglamsori, sunsunum uro nimi nhon-nhon sembe, “Nari wana yo sinag paiamsineba tebaukang,” aro tam karebatsinep. Aghana opsin koma wana mamsonge agha lipsisoba, ko'o we uro pohoba, amik opsinep. 23 Undo uahinep aghana, Allahri nen seneragna nhon seneraglamnep nena, “Mog so'oag nimiri el talamikti, tup nenehiroba sikne ot nari imang warerobag mo wamla aro el taukang,” sembanep. Wene aro seneraglamsori, sunsunum uro nimi nhon-nhon tanekoag yareag senelamsisori, “Paliag nembahineri, imang warerobag nhon wamukap,” aro wero paiamsinep. 24 Wero paiamsinep nimi tanekona, eldi nu yopsiog nimi sembe lemna. Yahudi nimi mo, “Nanag yahut,” aro yopsiog kom aghana, yog nimi sisa mog so'o tala-tala urop nimi babe yoplamsil. 25 Allahri tam nene sembe lebogpa, Hosea ponekori yubu tipto mome toro pibogne ane:

“Sin wene nari nimi kom aghana amik, ‘Nari nimi,’ senun.

El wene o'ona sembamna komne amik, ‘Nari o'ona sembamna nimi,’ aro engero pimnun,”

seogpa mome toro pibog.

26 Allahri nen yubu lebogpa, nhonag mome toro pibog nena,

“Sin mog so'o nhonag wamang nimiag, ‘A'un nari nimi kom,’ aro ambatsisi aghana,

amik sin nimi tanekona, ‘Allah Kamag Uropne ponekori kelmabo me,’ aro engero pihilul,”

seogpa mome toro pibog.

27 Tanena Allah yubu silimu tiptopne Yesaya ponekori Israel nimi sembe yubu haum aro lelamogti,

“Israel nimi kirik a'angkea mag laut longorop mag abolag lalaptoba a'ilbanep kom saog wamang aghana,

sin Israel nimi taneko agha ot nimi ologha taulbahilul.

28 Tam nenena, nu Saelba Uhiropne ponekori, ‘Uanun,’ seogne

men phea mog so'oag sik uro uitlul,”

aro haum seogti mome toro pibog.

29 Yubu ene sunsunum uro Yesayari samenag yubu lelamogti,

“Imap so'oap Saelba Uhiropne Mikip Sirikne ponekori nu sembe nimi yina likto piropne nhon yae pipsiso kom tanena,

Sodom nimiap Gomora nimiap tebaek saog uro nu tebanep,” seog.

“Israel nimiri Kristusag wana palilamek kom,” aro ambatsiogha

30 Wene seogne sembe sa'a sukap? Anena, nimi sisa Yahudi kom nimiri, “Wana porog nimi nenep tahane,” semban koma ero palamek kom aghana, Kristusag wana paliropne pere agha sin nimi taneko wana porog nimi nembahiog. 31 Ot Israel nimiri, “Wana porog nimi nenep tahabe,” aro aruksirop yubu saelba ul palamek aghana, wana porog nimi neneptan koma wamang. 32 Sa'a sembe undo uro yabinep? Sin Israel nimiri ul palamek nena, Kristusag wana paliro ul palamek kom aghana, sindam nimiri ul piropne agha, “Wana porog nimi nenep tahane,” aro ul palamek. Anena, sindi ul palamek nena, nimiri ina palamloba, kirikag puri tikto phukul ingkinep saog ulamek. 33 Sindi Kristusag wana paia urop komne sembe Allahri samenag yubu lebogpa, mome toro palilamogti,

“Kembahut! Sion so'o tanekoag kirik mebiamnaba, nimi palamikag kirik anekoag puri tikto phukul ingkinep.

Nimi etneri elag sikne aro wana palilamle tanena, ali talul kom,”

seogpa mome toro pibog.