Roma 2

Allahri nimi niri uanepne tam karebanepne sembe ambatsiogha

Ane sembe ka'ebahut! A'un mog so'oag nimi agha nimi nhondi nimi nhonag, “Uaho komne ual,” aro tam karepto palilapmun tanena, andam nimiri babe, “Na malia urop kom nimi,” aro kolop tanep kom. Andi babe malia nikne ulamlam ane sembe, ora nimiag tam karepto palilapmen tanena, andamneag babe ikinne timbalul. 2 Nu el wamap nena, nimiri malia uropne nene sembe Allahri sikneag agha sunsunum uro tam kareplamla. 3 Ane sembe Allahri anag ualulne sembe seneraglamlulam. Andi babe mog so'oag nimiri malia ulamangne saog uro ulamlam aghana, ora nimiri malia uropne sembe, “Uaho komne ual,” aro tam karepto palilamlam. Tam karepto palilamlam aghana andi, “Allahri nanag ikinne pelengkatnelul kom,” senelamlam te? 4 Allah ponekori maikno uro wana pailingkina, “Mog so'oag nimiri nen nari seneragnange samoro saelbamseng,” aro wana walingeag agha opsin koma lalilamsil. Eldi maikno uro, “Nanag samoro yaukang,” aro wana walingeag agha ulamlange neneko andi seneragna koma teba'en senelamlam te? 5 An usog mikipti wanaag, “Saombanun kom,” senelamlamne agha andamneag ikinne maikno loloro palil dalamlam. Allahri porog uro tam kareptop sum lag nenelamle sum eneko yo maikno anag piplul. 6 “Tam karebanun,” aro lag nenelamle sum eneko, “Nimiri a'ero-a'ero uropne sunsunum uro lunuro tatsilul.” 7 Nimi etneri seneraglamleri, “Allahri nanag, ‘Wali uaom,’ aro kipneleba, ya'ag kamag wamnun,” senenneag agha wana khapto walia ulamle tanena, Allahri nimi enekoag ya'ag kamag uro wamnepne tatlul. 8 Ot nimi etneri, “Nanagha paliagne tanun,” senelamleri yubu sikne wa'epto eplobi agha, sik komne ulamle tanena, Allahri nimi eneko wanaag yo sembaleri wabalul. 9 Nimi etneri malia ulamle tanena, Allahri nimi eneko wabaleri, seklenneap ikinneap nimi enekoag piplul. Nimi sisa Yahudi nimiag sam pipleri, Yahudi kom nimiag babe piplul. 10 Aghana Allahri walia urop nimi niag, “Wali uro urop nimi,” aro kipsileri, wana aingnibahilul. Yahudi nimi sam kipsileri, Yahudi kom nimi babe kipsilul. 11 Allahri ualul nena, “Nimi nubunge to, ologne to,” semban koma Allahri seneragna sunsunum uro ualul.

12 Nimi etneri Musari aruksirop yubu ekonneag agha malia urop tanena, aruksirop yubu neneko el tan koma malia uropne sembe tebaukang. Aghana nimi etneri Musari aruksirop yubu ka'ebi agha malia urop tanena, Allahri nimi eneko tam karebi agha, “Musari aruksirop yubu ni sunsunum uro uaog kom,” aro tam karebaleri piplul. 13 Allahri nimiri uropne sembe tam karebalul nena, “Wana porog nimi,” aro kipsilul nimina, Musari aruksirop yubu mo aori ka'elorop nimi agha kom, aghana Musari yubu sunsunum uro urop nimi sembe, “Wana porog nimi,” sehilul. 14 Ot sin Yahudi kom nimi Musari aruksirop yubu ekon. Ekon aghana, sindam nimiri ul piropne Musari yubu sunsunum uro ul pirop tanena, Musari yubu ekon aghana, sindi wanaag, “Nene wali, nene mali,” senenne babe wamla. Sindi, “Nene wali, nene mali,” aro seneraghongkia sunsunum uro ul pirop. 15 Sin nimi tanekori undo ul pirop tanena sindi, “Nene sik, nene mali,” aro el tangtopne sindi wanaag el tahinep. “Nene sik, nene mali,” aro seneragnangeag agha el talamsilba, Allahri tam kareptop sum eneko sindam nimiri seneragnange nenekori, “Malinge uahiri, sikne babe uahi to,” aro haingdi irop nimiri sikne lag nenero ambatsiloa saog talul. 16 Allahri tam kareptop sum eneko nimiri tognoroba lag nembaleri, tam karebalul. Nari yubu walinge ambarelamsin nena, Kristus Yesus poneko pere agha tam karebaleri piplul.

Yahudi nimiri Musari aruksirop yubu salelameka sembe yubu lebogha

17 Wene a'un Yahudi nimi, “Na Yahudinge wamna,” senel dalamlom nimiag yubu ambarelamsin. Musari aruksirop yubuag a'undi wana palilamlomdi, “Allah poneko Nuni nuringe wamla,” aro maibil dalamlom. 18 Musari aruksirop yubu ambatsiropne ka'elamlomba, Allahri senenne, “Nene wali, nene mali,” aro el wamlomdi, “Yubu nene sikne,” alamlom. 19 Ora nimi sembe a'undi, “Haing urop nimi saog wamangdi, inibinag sale whiro urop nimi wamang,” senelamlom. “Nundam nimiri sin sae kiliro tibin warebahisebe taneogna, el wamnep,” aro sik senelamlom. 20 A'undam nimi sembe seneraghal dalamlomdi, “Nundam nimiri Musari aruksirop yubu salelamapti, el unneap sikneap nunag wamlaba, sin ekon nimi olog mabo saog nimi amolamsiap,” senel dalamlom. 21 A'undi ora nimiag, “Musari yubu amolamsiap,” aro nimi amolamsilom aghana, yubu eneko a'undam nimi wanaag olog el talamsil kom te? A'undi nimiag, “Haoghaba topsiseng kom,” aro ambarelamsilom aghana, a'undi nimiringe haoghaba topsinep te? 22 A'undi, “Ora nimiri nengabo kelabo haogha topsiseng kom,” alamlom aghana, a'undi nimiri kelabo haogha topsinep te? A'undi wanaag, “Nimiri saeri sunuro mema pharopne nene mali,” senelamlom aghana, wali-waliaba nimiri pharop ae tanekoag palilamangne a'undi haoghaba tomnep te? 23 A'un Yahudi nimiri, “Musari aruksirop yubu nunag mo wamla,” aro maibil dalamlom aghana Musari, “Phibaheng kom,” aro iriksirop yubu eneko philamlomneag agha Allah si mombolag nenelamlom. 24 A'undi Allah si mombolag nenelamlomne nene sembe samenag mome toro pibogne yubu tagto palilamna. “A'un Yahudi nimiri unulamlomne agha, Yahudi kom nimiri Allah si san tiliplamang,” aro mome toro pibog.

25 A'un Yahudi nimiri, “Allah elmabo wamap,” aro kere kon kareplamlom nena, “Nu peleplamsil,” senelamlom. Sik, Musari aruksirop yubu ni wali uro ulamsom taneogna, kon karepto ulamlomne nenekori a'un yepsinep. Aghana Musari, “Phibaheng kom,” aro iriksirop yubu eneko philamlom tanena, a'un kon karepsiropne yepsinep kom. Iriksirop yubu phiban tanena, kon kareptop kom nimi saog nenep tanep. 26 Aghana kon kareptop kom nimiri wali uro Musari aruksirop yubu sia lebogne sunsunum uro ulamseng tanena, sin nimi taneko sembe sin kon kareptop nimi saog nenep tanepba Allahrina, “Na namabo,” sembahinep. 27 A'un Yahudi nimi kon karepsiropne Musari aruksirop yubu salelamlomdi ulamlom. Aghana Musari aruksirop yubu mome toro pibogne ni sunsunum uro ulamlom kom tanena, sin nongag kon karepsirop kom nimiri a'unag tam pibukang. Sin nimi taneko nongag kon karepsirop kom nimi aghana, Musari aruksirop yubu wali uro ulamseng tanena, a'unag tam palilamsengdi, “Iriksirop yubu philamlum,” aro a'unag tam pibukang.

28 Allahri nimi kemelamsil nena, “Nimi Yahudi sisa nimi to, kom to? El nongag kekneba kon kareptoba wamla to, kom to?” aro nhon paliag nhon mombolag nenelamsil kom. 29 Nongag kemelamsil kom aghana, Allah Yameri nimiri wanaag, “Naringe,” aro kon karepto ualoa saogne kekneba ulamlaba, nimi enekori, “Allahringe wamna,” senel tananneag agha Yahudi nimi taptopne tanep. Anena mome toro pairopneag agha uro yabirop kom aghana, Allah Yameri uro yabinep. Nimiri nimi eneko sembe, “Wali ualam,” aro kipnange orogha babe Allahri, “Wali ualam,” aro kipnep.