Pogsiog Nang 3

Petrusti nimi yan malinge wali nembaogha

Ik nhon sum heng sin tanep peram Yahudi nimiri sop-sop Allahag mololamek ko'o enekoag Allahri Mem Ae aramag Petrusap Yohanesap walelamdek. 2 Walero palamdekpa, nimi nhon yan malia mangkaekpa, elkabori sop-sop keyapto pail pang, yang pang ulamek saog uro sumene babe pail piek. Nimi yan malinge eneko, “‘Allahri Mem Ae aramag yubu lebukap,’ aro wa'ilamik nimiri saeag wamlea molbahilul,” aro leka Allahri Mem Ae aramag kanero toropne ina siramag pail palamek. Pail palamek ina siram neneko si, “Ina Siram Walinge,” nenekoag elkabori pail palamek. 3-4 Petrusap Yohanesap, “Allahri Mem Ae aramag wa'inunam,” aro yalamdeka yan malinge ponekori ipsiogti, “Kamna kaptoba tatnururom,” aro molbahiog. Molbahiogpa kembarekti Petrusti, “Nangkae, nunag kembahi,” seog. 5 “Nunag kembahi,” seogpa nimi yan malinge ponekori, “Nanag olog tatnurukanga wamla,” aro kembahiog. 6 Kemelamsiogpa Petrustina, “Kamna kaptoba emasap perakap anag tatkenepne orog wamla. Aghana nanag wamlange anag tatkenun nena, Allahri webogne Kristus poneko si Yesus Nazaretne engeropne ponekori wali nembaghelul. Wene anag ambarelangken nena, ‘Sekmendi palame’,” seog.

7 Wene seogti, Petrusti el poneko sae sirikneag agha toro sekirog. Toro sekirog abeneko pere el poneko yan nginikom agha pinep saog wamogpa, yan no'op mikip taog. 8 Mikip taogpa, lopna agha sekelingkiogti, yang pang ulamog. Elap sin phendeap Allahri Mem Ae aramag wa'alamekti, yengdi sunukto Allah omeklamog. 9 El yan wali taogti, Allah omek-omek palamogpa, nimi ni tanekori el ibek. 10 Ibek nimi tanekori, “El yan maliri Allahri Mem Ae aramag, ‘Ina Siram Walinge,’ peramag pukamlari, nimiag mololamsilba, ia ulamap nimi eneko,” aro kemelamek. Kemelamekti, “Welaro yan wali tal,” aro, “Yaghe,” senena wanaag lolbahiog.

Nimi yan malinge poneko wali taogha sembe Petrusti yubu ambatsiogha

11 Ipsiek nimi maikno tanekori, “Yaghe,” alamekpa nimi yan malinge agha wali taogne ponekori Petrusap Yohanesap salelamsiogti, nhon palamek. Palamekti Allahri Mem Ae aramag sip imag agha solorobag si “Salomo” aneko wa'iek. Wa'iekag aneko nimi ni, “Yaghe, mane agha ual,” aro merero teknel wa'alamek. 12 Teknel wa'alamekpa, Petrusti nimi maikno tanekoag yubu lelamogti, “Nangkabo a'un Israel nimi, sa'a sembe a'un lo'om aro, ‘Mane agha uro yabil,’ aro nunag kemelamsilom? A'undi senelamlom nena, ‘Sin Allah senenne sunsunum uro walia aghabog urop nimiri sindinge mikipneag agha nimi ane wali nembarangpa, yan ingiro palamla,’ senelamlom te? 13 Nunisag yaboap, Abrahamap, Ishakap, Yakubap paia uhiropne Allah ponekori elme Yesus poneko paliag nembaog. Aghana el poneko Pilatus tarel piomba eldi, ‘Sae lobitnun,’ aro tam karebao aghana, a'undi Pilatus whingag, ‘Nimi ene nuringe kom. Sae lobitlulam kom,’ seom. 14 Allahri wepto aogne walinge aghabog sik uro lero uropne poneko sembe Pilatusti, ‘Sae lopnun,’ aro ulamo aghana a'unna, ‘Karong,’ alamomdi nimi ohiropne poneko sembe, ‘Sae lobatsululam,’ seom. 15 Ya'ag kamag uro unne tam saleropne poneko a'undi olobomba, Allahri nimi teptopne nusamag agha el poneko kamag nembao. Undo unuaonge nuri ibobonge ambarelamsiap. 16 Wene yan wali talne eneko a'un elne wamla. A'undi ililamlomne ponekori Yesus siag wana palilamlange toman agha yan wali tal. Yesusag wana palilamlange toman agha el siag kekhaektopne sembe yan malinge eneko a'un nhin whingag yan mikip talne ililamlom,” seog.

17 Petrusti wene aro ambarelamsiogti, “Nangkabo, a'un saelbamsiang nangap, a'undi ulamlomneap, Allahri samenag, ‘Undo uro yabilul,’ aro seneraghogne sembe a'un ekondi, Yesus olobomne nene na el. 18 A'un ekon aghana, ulamomne pere agha Allahri samenag el wamogti, ‘Undo uro yabilul,’ aro ambatsiogne sunsunup taog. Allahri weptopne Kristus poneko, ‘Seklebalul,’ aro Allahri samen eldi yubu silimu tiplamek nang ni pere agha ambatsiogpa, ‘Mome toro pibekne sunsunup tale,’ aro Allahri wanaag agha wene sembaogti uaog. 19 Ane sembe a'undi malia ulamlomne, ‘Allahri kom nembalul,’ aro malia seneragto ulamlomne lipsimundi, nen samoro Allahag yingkina eldi senenne salero ulamlulom. Undo unulapmun andarina, a'undi malia uroba lupsilulba, wali uro seneraglamsu. 20 Wali uro seneraglapmun andarina, nu Saelba Uhiropne ponekori el whingag agha wana keyagman nembahileri, Yesus samenag wero pibogne Kristus poneko a'unag nen poglul. 21 El poneko imag wamnepneog kekman, Allahri el nen poglul. Samenag Allahri Eldamneri yubu silimu tiptop nang sol walingeag ambatsiogpa, mome toro pibekne sunsunum uro, ‘Nia mangkina Allahri wendog nembalul,’ aro mome toro pibek. Allahri, ‘Wene nia mangkina wendog nembanun,’ sembale sum eneko mo Yesus samenag wero pibogne poneko nen poglul. 22 Samenag Musari ambarelamsiogti, ‘Nu Saelba Uhiropne Allahri a'unkabo Israel nimi nusamag agha eldi yubu silimu tiptopne na saog uropne nhon sekitlul. Eldi ni yubu lelamlea a'undi wali uro ka'eamlulom. 23 Uro yabilul nena, nimi etneri Allahri yubu silimu tiptopne ponekori yubu lelamlea ka'eamle kom tanena, nimi eneko kom nembahinep,’ aro ambatsiog. 24 Samenag Allahri yubu silimu tiplamek nang Samuelag agha, eldi lero amik wamek nangag agha, ni nangdi uro yabinepne sembe lelamek. Uro yabinepne sembe lelamek nena, wene og Yesusag uro yabionge sembe lebek. 25 Samenag Allahri eldamneri yubu silimu tiplamek nangag yubu nikne salag lero ambarelamsiogne a'un sembe lebog. Samen a'unisang Abraham ponekoag agha Allahri salag pibog nena, ‘Andi mangarobari mangkahyikne pere agha nari nimi sisa ni tala-tala wamikne walingena tatsinun,’ seog. Salag pibog yubu nene a'un sembe lebog. 26 Ane sembe Allahri elme sekirogti, nu Yahudi nangag poghogpa, nunag samenag yaog nena, ‘Walia ulamsinun,’ aro yaog. Eldi wali uahinep nena, ‘Samenag yoaba ulamlomne lipsululom,’ aro a'un mikip nembahinep,” aro Petrusti ambatsiog.