Yohanes 17

Yesusti eldamne sembe Allahag mololamogha

1-2 Yesusti wene seogti, imag tiwalengkia yubu lelamogti, “Nani, andi tam karepto piplum ko'o wene wamla. Na Anme paliag uroba kiptopne lag nembamen andarina, na Anmeri babe an paliag uroba kiptopne lag nembanun. Andi mog so'oag nimi ni saelba uhiropne mikiba anag wamlange nanag tatnelum. Mikiba tatnelum nena, nari saeag nenelamsilam nimi ni taneko, ‘Ya'ag kamag nembahilulam,’ aro nanag mikiba tatnelum. Tatnelumne sunsunum uro kiptoba an sembe lag nembanun. 3 Ya'ag kamag uro unne nenekona, an Allah taptopne ot nhonogne sin el wamsengdi, na Yesus Kristus andi pognelumne babe el wamseng tanena, sin ya'ag kamag uro wamnep. 4 Andi nanag, ‘Ulamlulam,’ aro nari sa'oag pibomne neneko nari komobi ulamnonge toman an paliag uroba kiptopne mog so'o eneag lag nembamna. 5 Nai, anam imap so'oap sumban komag anap nanap paliag wamnumuri, imang wareropneag wamnumu. Wene ane andi whingag wamne abeneko anap nanap imang wareropne nenekoag agha paliag nembanululam,” aro Allahag molbaog.

Yesusti eldi yubu ka'ero neleptop nang sembe Allahag molbarelamsiogha

6 Yesusti nen tipto Allahag molbarelamsiogti, “Nai, andi mog so'oag wamang nimi agha kiliro nari saeag pipsiom nimi taneko samenag agha andinge wamang. Andinge wamangba, nari saeag pipsiomba, sindi andi si lero omekkeropne wamlamne nari sinag lag nenero ambatsino. Ambatsinoba sinna andi yubu saelbamangdi, ul palamang. 7 Wene sin el uro wamang nena, andi ni na saeag pibomne neneko, ‘Iliri elag tarog,’ aro el taongdi wamang. 8 El taong nena, andi yubu nanag pibomne ni taneko sinag tipto ambatsino. Nari ambatsino yubu eneko ka'ero saelbamang. Sin nanag sikne aro seneraglamang nena, ‘Iliri sik uro poghogpa, Iliag agha yaog,’ aro na sembe el taongdi wamang. 9 Sinna andinge wamang ane sembe, nari sin sembe anag molona molbarelamsin. Nari mog so'oag wamang nimi ni sembe anag molbarelamsin kom aghana, ot sin andi na saeag pibom nimi taneko sembe mo molona molbarelamsin. 10 Nia mangkina nari saeag wamlange an babe ngai wamlam. Apna andi saeag wamlange na babe ngai wamna. Abeneag agha sindi na paliag wamnange kiplamneang. 11 Wene na anag yanuan. Na wamnange nen mog so'oag wamnep kom aghana, sinna mog so'oag wamang. Nai an mo sembenga orogha wamlamne, andi si nanag babe tatnelum si enekoag kekhaekto wamangneag agha sin nimi taneko paiamsululam. Paiamsimun andarina, anap nanap nhonog wamnam saog uro sin babe nhonog nenep tangkamikti wamukang. 12 Na sinap nhon ulamobori, nari sin yae paiamsinonge andi si nanag babe tatnelum si nenekoag kekhaekto wamangneag agha yae paiamsino. Nari sin yae paiamsinoag nhon babe kom taong kom. Ot nhon tatnelum nimi ka'eseptangto kom taonge nenekona, Allah Yubu mome toro pairopne sunsunup talul aro ka'eseptanepneog wamla nimi eneko mo kom tao.

13 Wene na anag yalamna. Nari ni lelamnange abene na wene anam mog so'oag wamnari, lelamna andarina, awi nari wanaag wamlange neneko ni sinag babe to'opto wamsileba, awi wamukang. 14 Andi nanag yubu pibomne neneko ambatsino. Na mog so'oag nimiri seneragto ul piropne sunsunum uro seneragto ulamna kom saog uro, sin wene babe mog so'oag nimiri seneragto ul piropneag neleptop nimi wamang kom. Ane sembe mog so'oag nimiri sin sembe hausag senelamsiang. 15 Nari anag molbarelamsin nena, ‘Sin mog so'oag wamangag anea topsululam,’ aro mololamna kom. Aghana nari anag molbarelamsin nena, ‘Phia yonge nenekori sin loba nembahileagti, yae paiamsululam,’ aro mololamna. 16 Na mog so'oag nimiri seneragto ul piropne sunsunum uro seneragto ulamna kom saog uro sin wene babe mog so'oag nimiri seneragto ul piropneag neleptop nimi wamang kom. 17 Andi yubu sikne wamlaba, sin nimi tane sikne pere agha, ‘Naringe,’ aro o'om nimi nembahilulam. 18 Andi na wepto mog so'o eneag pognelum saog uro nari babe sin wepto mog so'o eneag pogsino. 19 Nadamne, ‘Nani Allahringe mo wamna,’ aro sin sembe palil dalamna andarina, sin babe sikne pere agha an Allahringe mo taukang,” aro Allahag molbatsiog.

Yesusti elag sikne aro wana palirop nimi ni sembe Allahag molbarelamsiogha

20 Yesusti nen tipto Allahag mololamogti, “Nari anag molona molbarelamsinne neneko sin mo sembeog kom. Aghana sindi ambarelamsiik yubu ka'ebaikti, nanag sikne aro wana palilamik nimi sembe babe anag molbarelamsin. 21 Nai, nari anag molbarelamsine andarina, anap nanap nhonog uro ma'ap tangkamnam saog uro sin babe ma'ap tangto ot nhonog uro wamukang. Sin nunap babe ma'ap tangto wamik andarina, mog so'oag nimiri na sembe, ‘Ili Allahri sik uro pogholaogne wamla,’ aro seneraglamnukang. 22 Andi na paliag nenero kiptoba tatnelumne agha nari babe sinag paliag nenero kiptopne tatsino. Sinag tatsino andarina, anap nanap nhonog uro wamnam saog uro sin babe ot nhonog taukang. 23 Nanap sinap ma'ap tangkamap. Anap nanap babe ma'ap tangto wamnam. Undo wamebe andarina, sin ningki uro ma'ap tangka nhonog taukang. Sin nhonog taik andarina, mog so'oag nimiri el talamikti, ‘Ili Allahri Elme sik uro poghogti, Iliri Elme o'ona senelamla saog uro Elmeag wana palirop nimi babe Iliri o'ona senelamsil,’ aro el taukang.

24 Nai, nari anag mololangken nena, ‘Andi na saeag pipsiom nimi taneko na yaghag aneko nikag wamsebe. Nikag wamsebe andarina, anam imap so'oap sumban komag andi na o'ona sembanelumne sembe imang wareroba tatnelumne neneko ipseng,’ senelamnari anag mololangken.

25 Nai, an wana porogne poneko wamlam. Mog so'oag wamang nimiri an ekon wangkeang aghana, nari an el wangken. Apna nari nimi taneri na sembe, ‘Ili Allahri pogholaogne wamla,’ aro el wamang. 26 Narina, an si lero omekkeropne wamlamne nari sinag lag nenero ambatsinori, tipto lag nembatsinun. Lag nembatsine andarina, andi na o'ona senelamnelamne neneko sindi wanaag babe meptaleba, na babe sinap ma'ap tangto wamukap,” aro Yesusti Allahag molbatsiog.