Yohanes 10

Yesusti pham dombaap, pham domba paia urop nimiap sunuro ambatsiogha

Yesusti sunumna ambarelamsiogti, “Nari yubu sikne agha ambatnuahin. Pham domba leka toro paia uhirobag nimiri ina siram toman wa'in koma leka toman walero wa'irop tanena, nimi eneko haoghaba tohiro nimiringe saeagha pelepsirop nimi wamla. 2 Aghana pham domba leka toro paia uhirobag aneko ina siram toman wa'irop nimina, pham domba yae paia uhiropne poneko wamla. 3 Paia uhiropne poneko wa'inepne sembe ina siram yae urop nimi enekori ina pa'abanba, pham domba tanekori ngaingeri yubu lilim ka'ea uropti, eldi pham si a'ero-a'ero engehiropne ka'eamnaba, eldi yopto poa la'anihirop. 4 Eldinge pham domba ni taneko poa lambahindi, el menangal palamnaba, pham domba taneko eldi yubu lilim ka'ero, ‘Nani,’ aro el urop ane sembe, elag nelepto yingkirop. 5 Pham domba tanekori ora nimiri yubu lilim ka'ebi agha, nimi ekonneri yubu lilim sembe pham domba tanekori sinag nelebahin koma merebanep,” seog. 6 Yesusti sunumna nene ambatsiog aghana, nimi tanekori eldi yubu ka'ebaekti, wanaag olog seneraghek kom.

Yesusti, “Na pham domba paia uhinne walinge wamna,” seogha

7 Seneraghek komne sembe Yesusti nen tipto yubu lelamogti, “Nari yubu sikne agha ambatnuahin. Nana pham domba sembe na ina siram wamna. 8 Na wamna komag sin samenag yingkirop nimi taneko haoghaba tohiro nimiringe saeagha pelepsirop nimi yalamek aghana, pham domba tanekori sindi yubu ka'elamsiek kom. 9 Na wali wamnebag ina siram wamna. Nimi etne na pere agha wa'ile tanena, nimi eneko wali talul. Wali urobag anekoa yang pang ulamleri, wali tero wamnebag iplul. 10 Haoghaba toro yingkirop nimina, ‘Haoghaba tomneri, ya'ag opsineri, loba nembahinun,’ seneropne mo sembe yingkirop. Aghana na yahingena, ‘Nimi kamag wamikti, sinag teko wamna koma wamukang,’ aro yahi.

11 Na pham domba paia uhinne walinge wamna. Pham domba paia uhiropne walingeri ulamnep nena, ‘Tebahanea babe pham domba taulbahinun,’ aro ulamla. 12 Nen nimiri, ‘Pham domba yae wamsinenge sembe kamna tatneheng,’ aro yae wamsinep. Aghana pham domba eldamneringe kom tanena, ngainge eldamneri pham domba paia uhiropne saog wamnep kom. ‘Kamna tatneheng,’ aro yae wamsinep nimi enekori kemelamleba, pai kam yonge yalogleba, iple tanena, pham domba taneko laplobi agha merero pinep. Laplobi agha pihileba, pai kam yongeri pham domba oro pabileba, nenne talup tangto anden-anden tanep. 13 Pham domba yae wamsin nimi eneko laploa merero pihinep nena, ‘Kamna tatnukang,’ aro ua uropti, pham domba taneko sembe seneragsin koma laploa pihinep.

14-15 Na pham domba paia uhinne walinge wamna. Naniri na el wamnelba, wamna saog uro nari babe Nani el wamna. Ane saog uro nari pham domba taneko el wamsinba, sindi babe na el wamneang. Nari sin sembe ulamnangena, ‘Tebahanea babe pham domba naringe taulbahinun,’ aro ulamna. 16 Pham domba orange babe naringe wamang aghana, sin wamangag anam ma'ap tangto wimbamang kom. Sin babe nari taluro poa yahinepneog wamla. Nari yubu lilim ka'eamikpa, poa yahineba, pham domba winip tangtoba nhonog ma'ap taikpa, sin paia uhiropne nhonog wamnun. 17 Na Naniri o'ona sembamnel nena, ‘Na tebane andarina, nen kamag nenep tanun,’ aro ulamnange sembe na Naniri o'ona sembamnel. 18 Nimi nhondi babe na kamag wamnange nanag agha taluro tomnep kom. ‘Na tebanun,’ aro nari wanaag agha palil dalamna. Na Naniri arukto mikiba nanag tatneogpa, nari saeag wamla. Mikiba nanag pibogne agha, ‘Na tebanun,’ aro palil dalamneri, mikiba nanag pibogne agha na nen kamag nenep tanun,” aro ambatsiog.

19 Yesusti wene alamogne sembe Yahudi nimi nubunang nen sin mamun yubu nenep tangka lel dalamek. 20 Sin nimi maiknori yubu lelamekti, “Phia el kulomag wa'ioba, el nenek salelamlaba lelamla. Sa'a sembe eldi yubu lelamlange ka'elamlom?” alamek.

21 Aghana nenneri lelamekti, “Nimi kulomag phia yonge wa'isin nimiri lerop yubu saogne lelamla kom. ‘Phia mikibari nimi haing uropne kwelekahinba ipsinep,’ alamlom te?” alamek.

Yahudi nimiri Yesus sembe karong aro wa'epto yag lambaeka

22 As Yerusalem aneko son li wamog. Ko'o enekoag Yahudi nimiri sani yoro telamekne, sikinisa yabori samenag, “Allahri Mem Ae lomag walingeog wamlul,” aro sembenga yag lanaro ina kubekne sembe nimi tanekori seneragto ulamek. 23 Allahri Mem Ae aramag ae imag aghabog sorop ae nhon si “Salomo” engeropne wamogpa, Yesus aneko yabalamog. 24 Yabalamogpa Yahudi nimi nubunang Yesusag yaekti, warekto longol aek. Warekto longol aekti, yubu lelamekti, “Nuri an sembe, ‘Ambatsiso,’ senelamapne neneri nu wana limilamsilba, etsum agha lag nenero ambatsululam? Anna Allahri wepto pogtopne Kristus poneko wamlam tanena, andi yubu tibin uro ambatsululam,” seek.

25 Wene seekpa, Yesusti sinag samoro yubu lelamogti, “Nari a'unag ambarelamsino aghana, a'undi nanag sikne aro seneraglamnelom kom. Nari awe, ‘Na Nani si nubu talul,’ aro welamnonge nenekori na etne wamnange lag nenep tangto keknel dalamna. 26 Keknel dalamna aghana, a'unna pham domba naringe wamlom kom ane sembe, a'undi nanag sikne aro seneraglamnelom kom. 27 Pham domba naringe tanekori nari yubu lilim ka'elamneang. Nari sin ililamsindi, el wamsinba, sindi nanag neleplamneang. 28 Nari sinag ya'ag kamag uro unne tareamsinba, sin ya'ag uro wamikti, ka'eseptaukang kom. Nimi nhondi babe pham domba naringe taneko na saeag agha pelepto topsilul kom. 29 Pham domba taneko Naniri na saeag pibog. Nia mangkina wamlangeag agha el mikip sirik saogne nhon babe wamla kom. Nimi nhondi babe Naniri saeag agha sin pelepto topsinep kom. 30 Nanap na Naniap ot nhonog wamnam,” seog.

31 Wene seogpa, Yahudi nimi tanekori nen kirik tobekti, “El kirikti obukap,” aro ulamek. 32 “Obukap,” aro ulamekpa, Yesusti sinag samoro yubu lelamogti, “Na Naniri, ‘Awe toplulam,’ aro na saeag pibo awe nari walia maikno a'un whingag lag nenero ulamno. Walia tomnonge huropne sembe a'undi na kirikti opnuanelom?” aro haibahiog.

33 Wene aro haibahiogpa, Yahudi nimi tanekori samoro, “Andi walia ualamne sembe kirikti opkukap kom. Nuri an, ‘Kirikti opkukap,’ aro ulamap nena, an nimi so'oagne wamlam aghana, andi yubu leropneag agha Allahap nhon sansano nenep talamne toman agha Allah san tilipto leplam. Allah san tilipto leplamne sembe, ‘Opkukap,’ aro ulamap,” seek.

34 Wene seekpa, Yesusti samoro sinag yubu lelamogti, “Aruksirop yubu a'undi saelba ulamlom yubu anekoag Allahri yubu lebogne wamlangena,

‘Nari a'unag yubu lelamsiri, “Allah mikiba wamlom,” sehi,’

aro mome toro pibogne wamla kom te? 35 Nu el wamap nena, Allahri yubu mome toro pairopne neneko nhon lupto yabinep komdi, ya'ag wamnepneog wamla. Sin Allahri yubu ka'erop nimi taneko sembe, ‘Allah mikiba wamlom,’ aro engkahiog. Wene aro engkahiog aghana, 36 na Naniri, ‘O'omne,’ aro wepneogti, mog so'oag pogneogne sembe nadamneri, ‘Allah Elme wamna,’ alamna tanena, a'undi nanag, ‘Allah san tiliplamlam,’ aro lemnep te? 37 Nani na pogneogne ponekori awe nari tolamsene kom tanena, a'undi nanag sikne aro seneraglamnohom kom. 38 Aghana nari yubu leropne a'undi sikne aro seneraglamnep komne babe, na Naniri awe nari tolamna tanena, nari ulamnange neneko kembi agha sikne aro seneraglamnululom. Andarina a'un el uro wamlulom nena, Nani nanap ya'ag ma'ap tangto wamlaba, na Naniap ya'ag ma'ap tangto wamnange seneraglamlulom,” aro ambatsiog.

39 Wene seogne sembe sindi nen, “El saelbaukap,” aro ulamek aghana, el kilip tangom agha la'imbom seog. 40 Yesus nen samoro mag Yordan kauro Yohanesti samenag nimi mag sinag pelengelamsioghag aneko yaogti wamog. 41 Nimi maikno el wamoghag aneko yalamek. Yesusag yingkina sin mamun yubu lelamekti, “Allah mikibari Yohanes pere agha ulamla senenne kekneba nhon babe uaog kom aghana, Yohanesti nimi eneko sembe ambatsiog yubu ni ot sikne lebog,” aro wene alamek. 42 Wene alamekti, nimi maikno wamekne tanekori Yesusag sikne aro seneraglamek.