Yesus nong a'eropne tangom agha haing omomne warebaogha
17
Wene seogpa,
ik no'opbare wameka,
Yesusti Petrusap Yakobusap,
ilipsae Yohanesap enero poa main wenge nhonag waelbaekti,
sin tombare mo wamek.
2 Mo wamekpa,
sikin whingag agha Yesus nong a'eropne taog.
Eldi whing heng tingiropba wareropne saog ulamogpa,
eldi ag wangkamogne babe imang wareropne saog uro kororo warebaog.
3 Kororo warelamogpa,
kemelamekpa Yesus wamoghag aneko Allah yubu silimu tipto ulamdek nang Musaap Eliaap lag tangom agha Yesusap nhon yubu lelameka ipsiek.
4 Yubu lelamekpa ipsiekti,
Petrusti Yesusag yubu lelamogti,
“Nai,
nu saelba uhiropne wamlamne.
Nu tane wamap nena wali.
Andi wali sembamen tanena,
ae wilindi kalun ae soro kaulbanun.
An sembe nhon,
Musa sembe nhon,
Elia sembe nhon sobatsinun,”
seog.
5 Petrusti wene alamog abeneko,
toa tibin sirikne pololonga niknilogsiogpa,
toa nusamag agha yubu lelamogti,
“Anena na Name,
nari wanaag me o'ona senelamnange wamla.
El sembe wana awi ulamnel.
Eldi yubu ka'elamlulom,”
alamogha ka'ebaek.
6 Eldi yubu ka'ero neleptop nang tanekori ka'elamekpa,
yubu lelamogha sembe log lelem u amupto so'oag malingkiek.
7 Logti so'oag malingkiek aghana,
Yesus yaogti,
sinag sae palilamogti,
“Seksut.
Log sembaheng kom,”
seog.
8 Yesusti,
“Seksut,”
seogpa sin usog ebel ingkina kemelamekpa,
sin Yesusap wamek nimi abeneko ipsiek komdi,
Yesus mo wamogha ibek.
9 Undo unuaogpa,
Yesusap elkabo wilindi tanekoap mainag agha kuluklamekti,
Yesusti irikto yubu ambarelamsiogti,
“A'undi mainag anekoa wene iplomne sembe nimi nhonag babe ambatsiseng kom.
Na mog so'oag nimi tangtopne wamna aghana,
amik tebaneri,
nimi teptopne anabiag agha nen samoro kamag tanun.
Na nen samoro kamag tane taneogna,
a'undi wene iplomne sembe hae nimi ambatsululom,”
seog.
10 Wene seogpa,
eldi yubu ka'ero neleptop nang tanekori Yesusag hailamekti,
“Wene ibapne sembe undo leplam tanena,
sa'a sembe Musari yubu amohirop nangdi,
‘Elia sam yale taneogna,
Allahri wepto poglenge poneko amik yalul,’
aro ambarelamsiang?”
aro haibaek.
11 Wene aro haibaekpa,
Yesusti samoro ambarelamsiogti,
“Elia ponekori sam yingkina,
‘Nia mangkina o'oro wali nembanun,’
aro wero uanepne sembe sik uro ambarelamsiang.
12 Ot nari a'unag ambarelamsinne,
Elia poneko samenag yingkina wamog aghana,
ekondi nimiri ibek kom.
Ibek kom aghana,
nimiri el sembe karongdi,
‘Malia uaukap,’
senenne sunsunum uro ni uaong.
Elag undo malia ulamong saog uro ko'o we uro wamna komag sindi na mog so'oag nimi tahinge babe malia ulamneikpa seklebanun,”
aro ambatsiog.
13 Wene seogpa,
eldi yubu ka'ero neleptop nang tanekori ka'ebaekti,
“Yohanes maghag pelengehiropne poneko sembe lelamla,”
aro seneragto el taek.
Yesusti phia yonge me kulomag agha yag lambaogha
14 Yesusap elkabo wilindi tanekoap nen samoro mainag agha kulukul alamekpa,
nimi maikno longol ingkina wamekag yaek.
Yaekpa nimi kabuni nhon yaogti,
Yesus whingag yabu sanukto pulingkiog.
15 Pulingkiogti yubu lelamogti,
“Nai,
nanenge me yareag sembanululam.
Naikna nong konkonoro kikipnange neneko yalamla tanena,
nenek salero malingkina ik sulu aukag wa'ang,
maghag wa'ang uro maiknoro seklelamla.
16 Seklelamlaba andi yubu ka'ero neleptop nangag,
‘Wali nembatnululom,’
aro payan aghana,
sumbangba eraruktina,
wali nembanep kom saog wamla,”
aro Yesusag ambarog.
17 Wene aro ambarogpa,
Yesusti samoro yubu lelamogti,
“Eh,
a'un nanag sik semban koma kwanekto ka'eseptanepne ulamlom nimi.
Na ko'o ik etpare a'un anabiag wamneri,
‘Nanag sik senelamseng,’
aro wana pailingkina wamnep?
Me eneko nanag ane payahut,”
seog.
18 Wene seogpa payaekpa,
Yesusti me aneko kulomag phia yonge wamogne nenekoag,
“Lambae,”
aro wenero arukaog.
Phia yonge neneko me anekoag agha yag lambaog abeneko pere,
me aneko peket wali taog.
19 Wali taogpa,
eldi yubu ka'ero neleptop nang taneko Yesusag yaekti,
Yesusap nhon mo wamek.
Mo wamekti hailamekti,
“Sa'a sembe nuri phia me eneko kulomag ua uropne neneko nuri yag lambanep kom?”
aro haibaek.
20 Wene aro haibaekpa,
Yesusti samoro ambarelamsiogti,
“Allahag wana palilamlom komne sembe phia neneko a'undi yag lambanep kom.
Nari a'unag yubu sikne agha ambatnuahinne ka'ebahut.
A'undi Allahag sikne aro wana paliropne o'ongkom sirik wamla.
Kwarang si babe o'ongkomne wamla aghana,
a'undi nen ma'aro Allahag sikne aro wana palilamsomdi,
kwarang si saog taho tanena,
a'undi sa'a-sa'a,
‘Uro yaboho,’
senelapmunneag agha nia ni uro yabinep.
A'undi wana undo sikne aro Allahag wana palilapmunneag agha yim aneag lelamsomdi,
‘Ane siba ko'oro ano sip pi,’
aro arukahom tanena,
sik uro ko'oro pinep.
21 Aghana phia yonge nene saogne yag lambahinep nena,
mo yubuag agha yag lambanep kom.
Ot kwaneng mag tero koma Allahag molona mololapmunba,
Allahri ka'ebi agha wali sele taneogna,
el mikipne pere agha yag lambahinep,”
aro ambatsiog.
Yesusti, “Ya'ag omnukang,” aro eldi yubu ka'ero neleptop nangag nen sarikto ambatsiogha
22 Eldi yubu ka'ero neleptop nang as Galilea winip taekti wamekpa,
Yesusti sinag ambarelamsiogti,
“Nimiri na mog so'oag nimi tahinge pan khero aisa nimiri saeag nembanenep sum peram tal.
23 Sindi saeag taneba,
nimiri ya'ag omneik aghana,
ik wilindip sum nen samoro kamag tanun,”
aro ambatsiog.
Yesusti wene aro ambatsiogne ka'ebaekti,
wana ikin sirik tahiog.
Allahri Mem Ae o'obanepne sembe tatsiroba Yesusti pibogha
24 Yesus eldi yubu ka'ero neleptop nangap as Kapernaum piek.
Piekti wamekpa,
Allahri Mem Ae soro o'obanepne sembe kamna kaptoba poloro paia ulamek nimi taneko Petrusag yaek.
Yaekti hailamekti,
“A'un yubu amohiropne ponekori Allahri Mem Ae soro o'obanepne sembe,
‘Dirham phende tatsululam,’
aro leropne abeneko tarelamsil to,
kom to?”
aro haibaek.a
25 Wene aro haibaekpa,
Petrusti samoro,
“Sik tarelamsil,”
seog.
Wene seogti,
aeag wa'alamogpa,
Yesusti sam Petrusag hailamogti,
“Simon,
andi senelamlamne ka'ebanun.
Mog so'oag nimi sembe yubu sia lero saelba uhirop nangdi ora nimiag,
‘A'undi saeagha wamlange karepto a'un o'obahinepne sembe nu kipsiroba tatsululom,’
aro aruklamsiangne neneko etneri saeagha tolamang?
Saelba uhirop nang tanekori sikin mabo agha tolamang to,
yog nimi agha tolamang to?”
aro haibaog.
26 Wene seogpa,
Petrusti samoro,
“Yog nimiri saeagha tolamang,”
seog.
Seogpa Yesusti,
“Wene selam tanena,
sin yubu sia lerop nangdi mabori saeagha tomnep kom saog wamla.
27 Aghana nimi tanekori wana mali nunag pipsiikag aro tatsululam.
Ane sembe,
mag longorop maghag pimendi,
‘Ikan kiliro saelbanun,’
aro si weroba piplulam.
Ikan kiliro saelbamendi,
ikan samenne neneko si ka'en kwa'abi agha si lomag kembamendi,
kamna kaptoba nhon iplulam.
Kamna kaptoba wanange ipmenne neneko,
anap nanapti tatsinepneog wamlange sunsunum uro kamna kaptoba wanange wamleba iplulam.
Topmendi sinag tarel phululam,”
seog.