Matius 16

Farisi nangap Saduki nangapti Yesusag, “Kekneba nhon ualulam,” seeka

(Markus 8:11-13; Lukas 12:54-56)

Farisi nimiap Saduki nimiap, “El mibukap,” aro Yesusag yaek. Yaekti elag mololamekti, “Imagne ponekori sik uro an pere agha ulamla tanena, kekneba nhon uro lag nembatsululam,” aro ambarek.

2 Wene aro ambarekpa, Yesusti sinag samoro yubu lelamogti, “A'un so'o aneag wamlom nimiri tiwalengelamlomba, heng puruklamlaba, im uwong ulamla tanena a'undina, ‘Wene ae ebare wamnual,’ alamlom. 3 Ae lukun kweleklamlaba, im uwong ulamla tanena, ‘Sumene mag tinual,’ alamlom. A'undi imag tiwalengki agha, ‘Mag tininual to, ebare wamnual to,’ aro seneragto tam karebanep. Aghana a'un wene wamlom ko'oag uro yabalamlange kembi agha Allahri wene ulamlange kekneba sembe seneragto tam karebanep kom wamla. 4 Nimi wene ko'o ene likto palamlange Allah wail ibare agha yo sirik nimi wamang. Sindi nanag kemelamneangdi, ‘Kekneba nhon nunag lag nembatsululam,’ alamang aghana, undo unuanun kom. Ot sin whingag uro yabileba, el nembahinepne kekneba nhonog wamlul nena, Yunus ponekoag uro yabiogne saog uro sin whingag uro yabileba, sin el nembahinepne kekneba talul,” seog. Yesusti wene agha lebogti, sin anekoa laploa pihiog.

Roti waelbalul aro yamoropneag sunumna tol pina Yesusti Farisi nangap Saduki nangap sembe lebogha

(Markus 8:14-21)

5 Mag alip toman mag sin kauro tara sip piekti, Yesusti yubu ka'ero neleptop nang tanekori, “Kwaneng roti toro libap kom,” aro el taek. 6 Yesusti sinag yubu lelamogti, “Haing whi uro togtangkamlulom. Sin Farisi nimiap Saduki nimiap tanekori seneragto ulamang nena, ‘Kwaneng roti waelbalul,’ aro yamoroba saog wamlaba a'undina, ‘Nunag taleag,’ aro yae up tangkamlulom,” seog.

7 Yesusti sinag wene aro ambatsiogpa, sin mamun lel dalamekti, “Nuri kwaneng roti toro libap komne sembe wene aro lepla,” aro yubu lelamek.

8 Sindi wene alamekne sembe Yesus el taogti, yubu lelamogti, “Sa'a sembe a'undi kwaneng roti orogne sembe tam nembamlomdi, yubu lelamlom? Nanag wana palilamlom kom te? 9 Wene babe a'un olog seneragto el talom kom te? Kwaneng roti lambare agha nimi teng-tengne (5.000) khebatsino. Teongba kwaneng phelektopne poloro pibomdi, kau wiroba nubunge etpare libaomne sembe ekon talom te? 10 Apna kwaneng roti saekpare agha nimi teng-tengne (4.000) khebatsino. Teongba kwaneng phelektopne poloro pibomdi, kau wiroba nubunge etpare libaomne sembe ekon talom te? 11 Welaro a'un seneragna koma wamlom? Nari wene aro lemnange kwaneng roti sembe lemna kom. Aghana Farisi nimiap Saduki nimiap abenekori seneragto ulamangne, ‘Kwaneng roti waelbalul,’ aro yamoroba saog wamla. Ane sembe, ‘Nunag taleag,’ aro a'undam nimi yae up tangkamlulom,” seog. 12 Wene aro ambatsiog taneogna, wana hekto yabihiog. Sindi wanaag seneraglamekti, “Kwaneng rotiag yamoro winiropne sembe lepla kom, aghana Farisi nimiap Saduki nimiapti yubu ambatto wana tohinne sembe lepla,” aro el taek.

Petrusti Yesus sembe lag phoro lebogha

(Markus 8:27-30; Lukas 9:18-21)

13 Yesus palamogti, as Kaisarea-Filipi so'o peramag piog. Pioghag anekoa eldi yubu ka'ero neleptop nang hailamsiogti, “Nimiri lelamangdi, na mog so'oag nimi tahinge sembe etne alamang,” aro haibahiog.

14 Wene aro haibahiogpa, samoro ambarelamekti, “Nimi nenneri an sembe, ‘Yohanes maghag pelengehiropne nen kamag taonge poneko ane,’ senelamangdi yubu lelamang. Nenneri, ‘Elna samenag Allah yubu silimu tiptopne Elia poneko samoro kamag taogne wamla,’ senelamangdi yubu lelamang. Nenneri, ‘Yeremia to, samenag Allah yubu silimu tiptopne yogne to kamag taogne wamla,’ senelamangdi lelamang,” seek.

15 Wene seekpa, Yesusti nen hailamsiogti, “Aghana a'un morina na sembe etne senelamnelom,” aro haibahiog.

16 Wene aro haibahiogpa, Simon Petrusti samoro lelamogti, “Anna, Allah kamag uropne ponekori Elme wamlam. Eldi an wepto pogkeogne Kristus wamlam,” seog.

17 Wene seogpa, Yesusti elag samoro yubu lelamogti, “Simon Yunus elme an wana awi uro wali wamlulam. Andi leplamne nene mog so'oag nimiri el nembatkelneag agha leplam kom, aghana Nani Imagneri el nembatkelba leplam. 18 Nari anag babe ambatnuaghenne, anna Petrus, ‘Kas kirik,’ aro si engeropne wamlam. Nanap ma'ap taik nimi winil dalamika kas kirik ene alibag anea sekililamsinun. Nimi winip tangtoba sekililamsinenge nenekona, tepna yalamlengeri babe irikto luknubalul kom. 19 Nari andi saeag mikipne tatkene andarina, mog so'oag nimi Imagneri saelba ulamsil nimi tanep ina kubatsululam. Imagneri tam karepto lobarekamlenge mog so'o eneag babe andi, ‘Nimiri hae uanep to, kom to,’ aro lobare-karelamsululam. Imagneri tam karepto kaubamlenge mog so'o eneag babe andi ‘Sikne to, kom to,’ aro kaubatsululam,” seog.

20 Wene seogti, eldi yubu ka'ero neleptop nang iriklamsiogti, “Na sembe, ‘Allahri wepto poghol aogne Kristus wamla,’ aro nimi nhonag babe lag phoro ambatsiseng kom,” seog.

Yesusti el seklero tebanepne sembe ambatsiogha

(Markus 8:31—9:1; Lukas 9:22-27)

21 Wene aro lelamek sum enekoa Yesusti alnibaogti, eldi yubu ka'ero neleptop nangag el amik seklebanepne sembe tibin nenero ambarelamsiog. Yubu ambarelamsiogti, “Na as Yerusalem pineba, nu Yahudi nimi wenehirop nimiap, memnang Allah sembe palirop nang sikini yaboap, Musari yubu amohirop nangapti nanag malia ulamneikpa, na seklebanepneog wamla. Ya'ag omnukang aghana, ik wilindip sum nen samoro kamag tanun,” aro alniro ambatsiog.

22 Wene seogpa, Petrusti Yesus sae kiliro kaeag sip poa piogti, “Undo lepseng kom,” aro alniro wembaog. Wenelamogti, “Nai, nu saelba uhiropne wamlam. Imagneri anag yareag sembangkel. Anag undo uro yabilul kom,” seog.

23 Wene seogpa, Yesusti taongkom agha Petrusag yubu lelamogti, “Phia sikini nubunge Satanasti yubu leplamne nene na whingag sip nemban koma wailag sip nembae! Andi leplam nena, na ina pinebag puri tikto phukul ingkineba saogne leplam. Allahri seneragtopne leplam kom aghana, nimiri seneragtopne agha leplam,” seog.

24 Wene seogti, eldi yubu ka'ero neleptop nimi tanekoag Yesusti yubu lelamogti, “Nimi etneri, ‘Na Yesusag nelepto nhon palamnunam,’ senelamle nimi enekona, eldamneri wanaag seneragtopne lipsileri, eldi wanaag agha, ‘Nimiri na kalag sipto ya'ag omneika babe, na wana khapto Yesusag neleplamneri, siptop kal nene sa'olamnun,’ senelamle taneogna neleplamnelul. 25 Nimi etneri, ‘Na mog so'o aneag wali wamnun,’ aro seneragto ulamle tanena, nimi eneko el kamag wamnepne ka'eseptalul. Aghana nimi etneri, ‘Na wali wamnepne sae limneri, tebahanea babe Yesusap ma'ap tanunam,’ aro seneragto ulamle tanena, nimi eneko ya'ag kamag uro unne elag talul. 26 Wene aro lemnangena, nimi nhondi nia mangkina mog so'oag wamlange toro saleropne toman agha eldamne kamag uro unne loba nenep tanep. Nimiri undo unuanep tanena, ‘El tupne wamla,’ sembanep te? Apna nia mangkina saeag wamnaba, sa'aag agha, ‘Kamag uro unne kamna kapto tomnun,’ aro tomnep? 27 Wene aro lemnangena, mog so'oag nimi tangtopne poneko amik yale sum eneko, Ili Imagne ponekori imang wareroba elag lekneamleba, eldi arukna imagnang malaikatap nhon yalul. Yaleba mog so'oag nimiri uroba sunsunum uro nimi a'ero-a'ero lunuro tatsilul. 28 A'un tane wamlom nimiag yubu sikne agha ambarelamsin. A'un tane sekamlom nimi nhon-nhon anam teban komag, mog so'oag nimi tangtopne ponekori mog so'oag nimi saelba uhiroba yaleba, a'un nhon-nhondi iplulom,” seog.