Matius
Ponekori Yubu Walinge Yesus Sembe
Mome Toro Pibogne
Yesus ilisang yabori mangarobari likto piogha
1
Mome ane Yesus Kristus ilisang yabori mangarobari likto palamogne agha mangap taogne sembe mome toro pimnuan.
Yesusna Daudti liksiogne agha mangap taog.
Daudna Abrahamdi liksiogne agha mangap taog.
2 Abraham ponekori elme Ishak mangkaog.
Ishakti elme Yakub mangkaog.
Yakubti elme Yehudaap,
elkabo orangeap mangkahiog.
3 Yehudari elkel Tamar toro aogti,
me phende Peresap Zerahap mangkahirek.
Peresti elme Hezron mangkaog.
Hezrondi elme Ram mangkaog.
4 Ram elme Aminadab mangkaog.
Aminadabdi elme Nahason mangkaog.
Nahason elme Salmon mangkaog.
5 Salmondi elkel Rahab tobogti,
elme Boas mangkarek.
Boasti elkel Rut tobogti,
sikinme Obed mangkarek.
Obedti elme Isai mangkaog.
6 Isairi elme Daud mangkaog.
Daud yubu sia leropne taogti,
Uriari kel pelepto tobog.
Kel enekoapti elme Salomo mangkarek.
7 Salomori elme Rehabeam mangkaog.
Rehabeam elme Abia mangkaog.
Abiari elme Asa mangkaog.
8 Asari elme Yosafat mangkaog.
Yosafatti elme Yoram mangkaog.
Yoram elme Uzia mangkaog.
9 Uziari elme Yotdam mangkaog.
Yotdamdi elme Ahas mangkaog.
Ahasti elme Hizkia mangkaog.
10 Hizkiari elme Manasye mangkaog.
Manasyeri elme Amon mangkaog.
Amondi elme Yosia mangkaog.
11 Yosiari elme Yekhonyaapa elkabo orangeap mangkahiog.
Sin wamek liag mog so'o Babel nimiri sin luknuro sae kaupto pabalamsiek.b
12 Sae kaupto Babel so'oag pabahiekti,
salelamsiek ko'o nenekoag agha,
Yekhonyari elme Sealtiel mangkaog.
Sealtieldi elme Zerubabel mangkaog.
13 Zerubabeldi elme Abihud mangkaog.
Abihudti elme Elyakim mangkaog.
Elyakim elme Azor mangkaog.
14 Azorti elme Zadok mangkaog.
Zadokti elme Akhim mangkaog.
Akhimdi elme Eliud mangkaog.
15 Eliudti elme Eleazar mangkaog.
Eleazarti elme Matan mangkaog.
Matandi elme Yakub mangkaog.
16 Yakub elme Yusup mangkaogpa,
Maria ela'ange taog.
Yusupti kel Maria kel enekori Yesus mangkaog.
Yesus ponekona,
“Kristus,”
alamapne wamla.c
17 Ane sembe Abrahamag agha nimi likto palamlari,
likna mekparenge taogpa,
Daud mangap taog.
Daudti mangarobag agha nimi likto palamlari,
likna mekparenge taogpa,
Ibrani nimi sae kaupto Babel so'oag pabahiek.
Babel so'oag pabahiekpa,
nimi likto palamlari,
nimi likna mekpare taogpa,
Kristus mangap taog.
Yesus mangap taogha
18 Yesus Kristus mangap taogne undo uro yabiog.
Yesus ilin Maria kel enekoap nengabo nhon Yusupap,
“Top tanunam,”
aro salag lero paip tangkamdekti wamdek.
Wamdek aghana,
sin abeneko anam ma'ap tan komag agha Maria kel eneko Allah Eldamne Yame Walinge mikipne pere agha me monag taog.
19 Wene me monag taog aghana,
ela'ange tanepne Yusup poneko wana porogne wamogti,
“Nari kel tanep kel eneko nimi whingag agha ali nembaneagti,
nimiag yubu ambatsin koma limneri a'ep tanunam,”
sembamog.
20 “Undo limneri,
a'ep tanunam,”
aro seneragto ulamogti,
lenda mabog.
Lenda malamog abeneko pere nu Saelba Uhiropne arukna imagne malaikat nhon el whingag lag taogpa ibog.
Malaikat ponekori Yusupag yubu ambarelamogti,
“Yusup,
an Daud sisange mangap talumne.
Ankel tanep kel Maria me monag wamlangena,
Allah Eldamne Yame Walinge mikipne pere agha me monag tao.
Ane sembe Maria topmenne sembe log sembaheng kom.
21 Mariari me nhon nengabo me mangkalul.
Me mangkaleba,
nimiri mali-malia uropneag agha eldi sin taulbahilul.
Ane sembe me eneko si,
‘Yesus,’
aro engkalulam,”
seog.d
22-23 Yesus mangaro anepne sembe samenag agha nu Saelba Uhiropneri ambarogpa,
Allah yubu silimu tiptopneri mome toro pibog.
Mome toro pibog nena,
“Tiboghae!
Saren kel nhondi me monag taleba,
me nhon nengabo me mangaro alul.
Me mangaro aleba,
me aneko si,
‘Imanuel,’
aro engero yabilul,”
aro mome toro pibog.e
Ibrani yubuag,
“Imanuel,”
aro lerop nena,
nuri yubuag,
“Allah nunap nhon wamla,”
aro lerop.
Ni ane undo uro yabalamog andarina,
samenag agha Allah yubu silimu tiptopne ponekori ambatsiogne sunsunup tanep.
24 Nu Saelba Uhiropne arukna imagne malaikat anekori wene aro arukto ambarogpa,
Yusup lenda mabogha pukogti,
yubu ambarogne sunsunum uro Maria kel eneko tobog.
25 Maria kel eneko tobog aghana,
Maria anam me mangkan komag Yusupap nikag malamdek kom.
Nikag mamna koma wamdeka me aneko mangaro aogpa,
Yusupti me aneko si Yesus engkaog.