1 Korintus
Horok Lirna La'an
Nonolu kota Korintus namwali kote man lap lolo noho Akhaya. Lere manin Korintus ka rauroin Makromod Lalap makun, hir hoikani la ra'uli rasa'a noho makromon nammori la radedem rir hini'i wenewhe ailanna wake'e. Paulus eni ri dedesne man loikaru Lira Wawa'an laa ri Korintus, la nano Paulus nin wanakunu ri Korintus nammori akinhe naili'il Makromod Yesus (HN. 18:1-11). Paulus namharedi Korintus mene ri ida naran Apolos mai (HN. 18:24-19:1). Apolos eniyeni nauroin wakuku la wakunu warei. An min lolo onne leke wakuku manin Korintus enihe (1Kor. 3:6).
Nakawedi wollo wo'ira, ri Kristen man minle Korintus rir na'ukankani aile de hir hi'i horok aku laa Paulus. Ende Paulus walha rir na'ukankani lolo horok eniyeni. Paulus dernedi nahenia hirira hini'i wenewhe nammori ka namlolo haenihi, de an nounaku hi yon hi'i ha man ailanna onne maa hi'i ha ma namlolo wali'ur. An kuku sala hi ono hi ka ramwali mahaku me'e, ono heruwali ra'aheni hir lernohi Apolos, heruwali ra'aheni lernohi ri namehin, la heruwali ra'aheni lernohi ai, penia ida ma ka namkene noro ida me'e (1:10-12; 3:1-6). An nounaku hi panaeku ma na'onno noro ri man ho (pnk. 7), noro panaeku namehin nammori haenihi.
Panaeku ma na'onno lolo Paulus nin nounaku enie: An wakuku hi leke hi rauroin hini'i wenewhe man wa'an la rauroin hi'ihehewi ri ma akin naili'il Makromod Lalap, ida man mori wawa'an noro ida.
Horok Ihin
2. Paulus kuku sala manin Korintus ono hirira hini'i wenewhe ailanna wake'e, la ida kan mori wawa'an noro ida (1:10-6:20).
3. An wakunu panaeku ma na'onno ri man ho (pnk. 7).
6. An wakunu panaeku ma na'onno ra'an romun leke na'ori honorok hi Makromod Yesus Nin makmaki (11:17-34).
7. An wakunu hi'ihehewi Roh Kudus nala woroin ma na'onno ri ma akin naili'il Yesus (pnk. 12-14).
8. An wakunu hi'ihehewi ri Kristen man maki mori wali'ur lere man mai (pnk. 15).