Naa ge ne ɓo logom ge Dok ne ma
7
1 Go̰r kaŋ mbe no go, mbi kwa maleka ma anda mḛya dunya keŋ ge anda ma go, a tele saam ge anda ma be kwalla suwar pal, ko maŋgaɗam ga̰l yuwam pal, ko uwara a̰me pal. 2 Mbi kwa maleka a̰me ge ɗogle mborra ne ham ya ne logom ge Dok ge ndwara ne na tok go, ne ka̰l ndaar, oy maleka ge anda ge a ne ho̰ nama pool nama ke suwar ma ne maŋgaɗam ga̰l yuwam yál ma go: 3 «Ke me suwar, ko maŋgaɗam ga̰l yuwam, ko uwara ma a̰me to, ɗiŋ nee e logom ge mo̰r ge nee Dok ne ma sḭ́ḭ́l go gale ɓya.» 4 Mbi za̰ isiya ge nama ge a ne e logom nama ta ma ne: naa dudubu kis para wara anda para anda ne pehir ge Israyela vya ma ne zi mwaɗak.5 Ne pehir ge Yuda ne zi, naa dudubu wol para azi ge a ne e nama logom,
ne pehir ge Ruben ne zi, naa dudubu wol para azi,
ne pehir ge Gad ne zi, naa dudubu wol para azi,
6 ne pehir ge Aser ne zi, naa dudubu wol para azi,
ne pehir ge Neftali ne zi, naa dudubu wol para azi,
ne pehir ge Manasa ne zi, naa dudubu wol para azi,
7 ne pehir ge Simeyon ne zi, naa dudubu wol para azi,
ne pehir ge Levi ne zi, naa dudubu wol para azi,
ne pehir ge Isakar ne zi, naa dudubu wol para azi,
8 ne pehir ge Zabulon ne zi, naa dudubu wol para azi,
ne pehir ge Yusuf ne zi, naa dudubu wol para azi,
ne pehir ge Bayami ne zi, naa dudubu wol para azi me.
Tabeya ma hool gan ndwara zḛ
9 Go̰r kaŋ mbe ma no go, ndi, mbi ndil naa tabeya, ɓase ge nama ne kat ge be ndu day isi nama to, a ka da ne pehir ma zi ya pet, ne hir ma, ne ɓase ma, ne wak farra ma zi ya pet me. A mḛ́ hool gan ndwara zḛ, ne tame vya ndwara zḛ me ne ba̰r saal taɗak bama ta, ne tumur kaw ma bama tok go. 10 A ka ndage bama ka̰l oyya go: «Máya mbo da ne Dok ge ne ka ne hool gan pal ma ne tame vya ta ya!» 11 Maleka ge ne mḛ́ ver hool gan se ma pet, ne naa ga̰l ge sabar ma, ne kaŋ dolla ge anda ma, a kubi bama ndwara se hool gan ndwara se, a gur Dok ndwara se, 12 a ka jan go: «A go! Siya̰leya, ne hormo, ne zwama, ne gugu gwanna, ne doreya, ne pool, ne pateya a ge nee Dok ne ma ne doŋ pe ma ne doŋ pe ma! A go!» 13 Ndu a̰me ɗu ne naa ga̰l ge sabar mbe ma buwal zi jan mbi go: «Naa ge ne ka̰ ba̰r ga̰l saal mbe ma wuɗi ma ne ɗaa? A mbo da ne da ya ɗaa?» 14 Mbi gwan ne na janna go: «Mbi Bageyal, a mo kwa ne.» Na sḛ jan mbi go: «A ndage da ne yál njotɗa ge ɓaŋlaŋ zi ya, a usi bama ba̰r ga̰l ma, a há nama saal taɗak swama ge tame vya ne zi. 15 Da ne pe no, a mḛ ne hool gan ge Dok ne ndwara se no, a ke na temel no ɗaal ne gyala ge na zok ge mbegeya zi. Bage ne ka ne hool gan pal mbo kulbi nama na gur zi. 16 Kyamal mbo ke nama to bat, mam njuwal mbo ke nama to bat, gyala ma ne na holgeya mbo til nama to bat. 17 Ago Tame vya ge ne mḛ́ ne hool gan tuŋsi zi mbo kat bage koy nama ne, mbo gene nama mbo mam so̰o̰l ge ndwara wak ya. Dok mbo tigɗi nama mḭḭm ma ne nama ndwara go uzi.»