Daalam 6

Logom ge myanaŋgal ma hageya

1 Daalam ge mbi ne zi, swaga ge mbi ne kwa tame vya hage logom ge zḛ ge ne ge ɓyalar ma buwal zi, mbi za̰ kaŋ dolla ge ɗu ne ge anda ma buwal zi ba̰yya dimma ne mam ba̰yya go, jan go: «Mbo ya!» 2 Ndi, mbi kwa tisi saal, bage ne ndwa na pal ka da ne kajamle na tok go, a hon na kadmul. Na sḛ há hal, ka mbo mbo hal naa.

3 Swaga ge ne hage logom ge azi, mbi za̰ kaŋ dolla ge azi janna go: «Mbo ya!» 4 Tisi a̰me ge ɗogle kaal kekeŋ zut ya, ndu ge ne ndwa na pala digi a hon na pool na abe katɗa ge halas ne suwar pal uzi, ne da pe naa hṵ ta. A hon na kasagar ga̰l na tok go.

5 Swaga ge ne hage logom ge ataa, mbi za̰ kaŋ dolla ge ataa janna go: «Mbo ya!» Ndi, mbi kwa tisi ge pisil, ndu ge ne ndwa na pal ka da ne kilo her dṵṵl na tok go. 6 Mbi za̰ kaŋ a̰me dimma ne ka̰l go ne kaŋ dolla ge anda mbe ma buwal zi ya janna go: «Gḛme kilo ɗu yé ka ne bware ge temel dam ɗu ne, gḛme ge fogor kilo ataa yé ka ne bware ge temel dam ɗu ne me. Amma e mo tok num ma ne oyo̰r jiya̰l ma ta to.»

7 Swaga ge ne hage logom ge anda, mbi za̰ kaŋ dolla ge anda janna go: «Mbo ya!» 8 Ndi, mbi kwa tisi bolo. Ndu ge ne ndwa na pal, a ho̰ na dḭl «Siya», táál ge siya ma ne ka kare na pe me. A hon na pool ge suwar le ɗu ne anda zi pal, ne da pe, na hṵ naa uzi pore zi, ne kyamal, ne mbogom ma, ne kavaar ga̰l ge ne suwar pal ma me.

9 Swaga ge ne hage logom ge anuwa̰y, mbi kwa naa ge a ne hṵ nama ne fare ge Dok ne pe ma, ne sayda ge a ne ka kerra pe ma kḭḭm ma ge twal tuwaleya pe se. 10 A ka oyya ne ka̰l ndaar go: «Bageyal ge mbegeya, ne ge fareba, ɗiŋ ma swaga go ga, mo ba ka wan tene be ge kun sarya naa ge ne suwar pal ma pal, ndwara gele siya ge i ne ma ɗaa?» 11 A hon ndu ge daage ba̰r saal, a jan nama go nama wa̰ ta swak ɗiŋ nama kaam ge temel ne nama ná vya ma ge a ne ɓyare hun nama dimma ne nama go ma ɓase mbya ɓya.

12 Swaga ge ne hage logom ge myanaŋgal, mbi kwa, suwar ndat ndatɗa ge ɓaŋlaŋ, gyala sebe pisil ɗeɗel dimma ne ba̰r kḭḭmi go, saba kaare kaal kekeŋ dimma ne swama go. 13 Guwa̰r ma ka fage ya suwar se dimma ne saam ne kabre fere ge be zonna to ma ya suwar se go. 14 Pḭr worge uzi dimma ne naa ne worge maktub digi go, njal ma ne til ma pet a ndage uzi ne bama swaga ma go. 15 Gan ge ne suwar pal ma, ne naa ge gak ma, ne asagar ma ga̰l ma, ne naa ge tok pool ma, ne naa ge pool ma, ne mo̰r ma, ne vya twala ma, a mbo woy ta ge njal ma ne njal ge sore busur ma pṵṵl ma zi. 16 A ka jan njal ma ne njal ge sore busur ma go: «Dó me ta ya i pal, woy me i ne bage ne ka ne hool gan pal ndwara zḛ, ne pore ge tame vya ne ndwara zḛ. 17 Ago dam ge ɓaŋlaŋ ge nama pore juliliya ne yan ja. A wuɗi mbo mḛ nama ndwara zḛ ne ɗaa?»