Viya̰ ge hale O̰yom ge Dok ne ma ne o̰yom ge hale ma pe
4
1 Naa ge laar wanna ma, ho̰ me fareba o̰yom ma ta pet to, amma kugi me o̰yom ma kugi, ndwara kwa pe go nama ge Dok ne ma ne ko de. Ago anabi ge hale ma gḛ a wat ja dunya zi. 2 No a kaŋ ge ne ŋgay aŋ ne go na O̰yom ge Dok ne ne: O̰yom ge daage pet ge ne vin go Jeso Kris mbo ya duur zi a ge Dok ne ne, 3 amma o̰yom ge daage pet ge ne vin Jeso to, a ge Dok ne ne to. A o̰yom ge Bage ho̰l ge Kris ne ne, na ge aŋ ne za̰ go na mbo ya go. Se no yan ja dunya zi.4 Vya ma, aŋ ɗe, aŋ ge Dok ne ma ne, aŋ hal nama ya go, ne da pe, na ge ne aŋ zi a ga̰l waɗe na ge ne dunya zi. 5 Nama sḛ ma, a ge dunya ne ma ne, ne da pe a jan fare ge dunya ne, dunya za̰ nama no. 6 Nee ɗe, nee ge Dok ne ma ne. Ndu ge ne kwa Dok za̰ nee za̰, ndu ge Dok ne to, za̰ nee to. Da ne no ta, nee ba kwa o̰yom ge fareba ma ne o̰yom ge hale.
Dok a laar wanna
7 Naa ge laar wanna ma, nee laar wa̰ ta, ne da pe laar wanna a ge Dok ne ne. Naa ge ne laar wanna ma pet a Dok vya ma ne, a kwa Dok kwa. 8 Ndu ge ne laar wanna to, be kwa Dok to, ne da pe Dok a laar wanna. 9 Laar wanna ge Dok ne dya̰ tene nee ta da ne no ta: Dok teme na vya ge ɗu kikit ya dunya zi, ne da pe nee ka ne ndwara ne na ta. 10 Laar wanna ya no mbe zi: a be nee laar wa̰ Dok ne to, amma a na sḛ laar wa̰ nee ne, teme na vya ya no dimma ne tuwaleya go ne pore nee sone ma pe.
11 Naa ge laar wanna ma, kadɗa Dok laar wa̰ nee mbe go ɗe, mbya go nee sḛ ma laar wan ta me. 12 Ndu a̰me be kwa Dok to bat. Kadɗa nee laar wan ta ya, Dok ya nee zi, na laar wanna a mbyatɗa tap nee zi me. 13 Ne no ta nee ba kwa go nee ya na zi, na sḛ ya nee zi me: Ho̰ nee na O̰yom. 14 I ɗe, i kwa, i jan no go Báá teme na vya ya ndwara na ka Bage máya ge dunya ne. 15 Ndu ge daage pet ge ne vin go Jeso Dok vya ne, Dok ya na zi, na sḛ ya Dok zi me. 16 Nee ɗe, nee kwa kwa, nee ho̰ fareba go, Dok laar wa̰ nee gḛ ge be to. Dok a laar wanna: Ndu ge ne laar wanna zi ya Dok zi, Dok ya na zi me.
17 Ne no ta, nee ba kwa go nee da ne laar wanna mbyatɗa tap, nee ne vo dam sarya go to. Ne da pe nee sḛ ma dimma ne na go ge dunya mbe no zi. 18 Vo ne laar wanna zi to bat, amma laar wanna ge mbyatɗa tap ban vo uzi. Ago vo ŋgay go mḛreya ya go, ndu ge ne vo be det ya kat ne laar wanna ge mbyatɗa tap to.
19 Nee ɗe, nee da ne laar wanna, ne da pe na sḛ laar wa̰ nee zaŋgal ne. 20 Kadɗa ndu a̰me jan go: «Mbi laar wa̰ Dok», amma ka kwane na ná vya, a ndu ge hale ne. Ndu ge na laar ne wan na ná vya ge na ne kwa na ne na ndwara to, na laar wan Dok ge na ne kwa na ne na ndwara to ma gyana ɗaa? 21 No a wak honna ge nee ne ɓo ne na ta ne: Ndu ge na laar ne wa̰ Dok, na laar wa̰ na ná vya me.