MAKTUB GE
AZI
GE
BITRUS NE
Fare pala hageya
Ge Maktub ge azi ge Bitrus ne zi Bitrus ŋgay tene go a tol na Siman Bitrus, na mo̰r, ne bage temeya ge Jeso Kris ne. Bitrus njaŋge na maktub ge azi mbe hon naa ge hon fareba ma pet (1:1).
Bitrus jan fare da ne naa ge ne hon hateya ge hale ma. A go no, ge na maktub mbe zi, swaga ge ne ŋgay tene, ne sá̰ nama wak me (1:1-2), moɗege nama no go nama ka jwap hon fareba ge nama ne zi, nama koy hateya ge nama ne ɓo na ne naa ge ne kwa Jeso ne bama ndwara ma, ge a ne ɓo hateya ne na ta ma kwaɗa (1:3-21). A go no uwale, gace nama ge ne hon hateya ge hale ma ge ɓase ge Dok ne ma buwal zi ma no. Ago nama hateya mbe ma ya̰me naa, nama sḛ ge ne hon hateya mbe ma mbo ban uzi dimma ne naa ge zaŋgal ma ge a ya̰me ma ne ba̰ uzi go me (2:1-22). Ge (3:1-16), Bitrus ke nama kwarra go, nama ge ne cot ta ne naa ge Kris ne ma go, Jeso mbo ya to ma, nama naa ge hale ma ne, ago a ŋgat Jeso mbo mbo ya, dimma ne Dok ne ke kaŋ ma zaŋgal go. Kadɗa Jeso pala wan ya go, pala wanna ge na ne ago naa pet, nama hase, nama ɓo máya me (3:15). A go no (3:17-18) moɗege naa ge hon fareba ma no, nama wa̰ ta katɗa harcal da̰reya be ge nama ya̰ ta ya̰meya ge naa ge hale mbe ma pe go to, amma nama ka zam zḛ laar ɓyareya ge Dok ne zi.
Ne pe eya ya day, naa ge ya̰me naa ne hateya ge hale ma ya go, amma Maktub ge azi ge Bitrus ne hate nee go nee ɗḭ nee ndwara kwaɗa, na kaage nee ya̰ ta ya̰meya to, amma nee ka zam zḛ kwarra ge nee Bageyal Jeso ne zi.