MAKTUB GE
AZI
GE
BITRUS NE
Wak sanna
1
1 A Simeyon Bitrus, mo̰r, ne bage temeya ge Jeso Kris ne njaŋge maktub hon nama ge ne ɓo hon fareba ge siŋli dimma ne nee go me ma ne ge dosol ge nee Dok ne zi, ne nee Bage máya Jeso Kris zi. 2 Kwa a̰se ma ne halas ka zuliya bindik aŋ pal ge kwarra ge Dok ne zi, ge nee Bageyal Jeso zi me.Tolla ge det ya hon fareba go
3 Ne jo̰ pool ge Dok ne ho̰ nee kaŋ ge daage pet ge ne e nee katɗa ne ndwara, ne ke mborra ge jwap Dok zi me, e nee kwa Bage ne tó nee ya ne pool ge na ne, ne haŋgal kwaɗa ge na ne ta me. 4 Ne nama ta, a ho̰ nee wak tuli ge siŋli gḛ ma ne ge ɓaŋlaŋ ma, ne da pe, aŋ dé ya abe ta uzi ne kaŋ ge hubul ge dunya ne ma ta, ndwara det ya kat ne dir ge Dok ne. 5 Ne no mbe pe ɗe, á me ta kan ge hon fareba ge aŋ ne pal haŋgal ge kwaɗa, ge haŋgal kwaɗa pal kwarra, 6 ge kwarra pal wan ta, ge wan ta pal dṵṵl fare ma zi, ge dṵṵl fare ma zi pal ke mborra ge jwap Dok zi, 7 ge ke mborra ge jwap Dok zi pal laar wan ná vya ma, ge laar wan ná vya ma pal laar wanna. 8 Ago kadɗa kaŋ mbe ma no ya aŋ zi, a ka zuliya me, a mbo ya̰ aŋ baŋ be ge aŋ ke temel to to bat, a mbo e aŋ zamma zḛ ge kwarra ge nee Bageyal Jeso Kris ne zi. 9 Ago ndu ge ne kaŋ mbe ma no to, a ɓaal ne, kwa swaga uzi ya kaal to. Vyale vyale go a usi na sone ge zaŋgal ma ya go. 10 Ne pe no ɗe, ná vya ma, á me ta waɗeya koy tolla ge Dok ne tó aŋ, ne talla ge ne tá aŋ me. Swaga ke go mbe no, aŋ mbo det sone zi to bat. 11 A go no, a ba hage viya̰ aŋ ndwara zḛ ge aŋ ba wat muluk ge ɗiŋnedin ge nee Bageyal ne Bage máya Jeso Kris ne zi.
12 Da ne pe no, mbi vot aŋ pala ne fare mbe ma no ɗaɗak, aŋ kwa nama kwa, aŋ ka ya fareba ge ne se no mbe zi. 13 Amma mbi ndi go na dosol, tek ge mbi gale ne duur mbe no zi, mbi vó aŋ pala digi aŋ ba ka dwat fare mbe ma pal. 14 Mbi da ne kwarra, dimma ne nee Bageyal Jeso Kris ne ŋgay mbi na go, swaga ge mbi ya̰ duur mbe no ga gwa. 15 Amma mbi mbo á tene tyatyat ge go, mborra ge mbi ne go̰r aŋ ɓo viya̰ ge vot ta pala ne fare mbe ma no.
Fare janna ge ndu ge ne kwa Jeso ne na ndwara ne
16 Ago, i be bole sigir ge tuli ge naa ne isi nama ɗo, i e aŋ kwa pool ma ne gwanna ge nee Bageyal Jeso Kris ne no to, amma i kwa ɓaŋlaŋ ge na ne da ne i ndwara fa̰. 17 Ago ɓo hormo ma ne pool da ne Dok Báá ta, swaga ge Bage ne pool ge ɓaŋlaŋ ne ndage na ka̰l janna go: «Ndu mbe no a mbi vya ge laar wanna ne, na ge mbi sḛ ne ke tuli ne na.» 18 ka̰l mbe no, i sḛ ma za̰ na ne digi zi ya. I ne nama ka dagre ge njal ge mbegeya pala digi.
19 Uwale, i mḛ i koo ya fare ge anabi ma ne pal. Ke ya kwaɗa aŋ dol aŋ ndwara nama pal. A dimma ne kwaya̰l ge ɗuli ol ne ne zen ne tṵ zi go ɗiŋ mbo cya̰wak pala, ge guwa̰r ga̰l ge cya̰wak pala zen aŋ dulwak ma zi. 20 Kwa me gale ɓya go, fare janna ge daage ge anabi ma ne ne maktub zi ndu sol na pe wanna ne na pala to. 21 Ago, fare janna ge anabi ma ne be mbo ya da ne laar ɓyareya ge ndu dasana ne ta to, amma a O̰yom ge mbegeya ɓya̰ na ya naa dasana ma zi ne, a jan fare ne Dok ta no.