Obe ma ne gwale ma
3
1 Go no me, naa zaab, gwa̰ me ne aŋ pala aŋ obe ma pe se, ne da pe, kadɗa naa a̰me ma hon fareba fare ge Dok ne ta to puy ɗe, nama dé ya ame Dok, be ne fare janna ta to, amma ne hal ge bama gwale ma ne ma ta, 2 swaga ge a kwa aŋ hal ge kwaɗa ne hormo ta. 3 Pareya ge aŋ ne na ka pareya ge duur zum to: pala mbolla ge haŋle ma, ne fool ge dinar ma parra, ne ba̰r ge bware ma kanna, 4 amma na ka pareya ge dulwak zi ge, ge ne ɗimil zi, ge be hubiya ne o̰yom ge suul ne ge be fare, na no da ne hamba gḛ Dok ndwara se. 5 Naa zaab ge mbegeya ge a ne e bama jobreya ne Dok pal ma ka pare ta zaŋgal mbe go no. A ka gwan ne bama pala bama obe ma pe se, 6 dimma ne Sara go, ka gwan ne na pala Abraham pe se, ka tol na na bageyal. Aŋ saŋge ya na vya ma, kadɗa aŋ ke kaŋ ge kwaɗa ma, be ge ya̰ ta iigiya ne fare a̰me pe to bat.7 Go no me, obe ma, ka me swaga dagre ne aŋ gwale ma ne kwarra go nama duur taŋgay. Ho̰ me nama hormo, ne jo̰ aŋ ɓol bobo ge ndwara ne joo dagre, ne da pe, fare a̰me gage kaɗeya ge aŋ ne to.
Katɗa laar wanna zi
8 Ge aya, ka me ne dwatɗa ge ɗu, ne haŋgal ge ɗu. Ka me ne laar wanna, ke me ta pe, ka me suul. 9 Gwa̰ me sone potɗa ne sone to, sáso ne sáso to. Amma e me wak busu zo, ago a tó aŋ ya da ne na pe, ne da pe, aŋ ɓó joo ge wak busu ne.
10 «Ago ndu ge ne ɓyare na laar wa̰ swaga katɗa ge tuli,
na ɓo dam ma ge kwaɗa ma,
na koy na wak ne fare janna ge sone ma go,
na koy na ɗel ne hale kunna ta.
11 Na abe tene uzi ne sone ta,
na ke kaŋ ge kwaɗa.
Na ɓyare swaga katɗa ge halas pe, na ɓyare na pe lelet.
12 Ago Bageyal ndwara ya naa ge dosol ma pal,
na togor a sorra ne nama kaɗeya ma pe za̰ya.
Amma Bageyal ndwara a ɗḭya ge naa ge ne ke sone ma pal.»
13 Kadɗa aŋ á ta ke kwaɗa ɗe, a wuɗi mbo ke aŋ sone ne ɗaa? 14 Amma kadɗa aŋ njot yál da ne dosol pe ɗe, aŋ naa ge laar saal ma ne. Kaŋ ge naa mbe ma ne sya na vo, sya me na vo to, iigi me ta to me. 15 Amma kwa me aŋ dulwak ma zi go Bageyal Kris a bage mbegeya ne. Ka me jejew hare nama ge a ne ele aŋ fare ge jobreya ge aŋ ne pal ma fare ma pe. 16 Amma na ka suul ne hormo zi, ne haŋgal ge kwaɗa, ne da pe, nama ge a ne jan fare ge sone aŋ pal ma, ne nama ge a ne sal aŋ ne mborra ge aŋ ne ge kwaɗa Kris zi pe ma, saaso wa̰ nama. 17 Ago a golgo ndu njot yál ne kwaɗa kerra pe, kadɗa na laar ɓyareya ge Dok ne ne, ge te ya njot yál ne sone kerra pe. 18 Ago Kris njó yál ndwara ɗu kikit ne sone ma pe, na ge dosol ne naa ge dosol to ma pe, ndwara gene nee ya Dok ta. A hṵ na duur go, a saŋge na kat ne ndwara ne O̰yom ta. 19 A na zi uwale, mbo oy fare ge o̰yom ge ne daŋgay zi ma ta no, 20 ndwara go nama ge zaŋgal dḛ a ne kuri Dok wak swaga ma ge ne ka wan tene jobreya gale dam ma ge Nuhu ne ka cer fak ga̰l go. A naa ŋgeɗo baŋ, naa tiimal baŋ a má ne mam se ya ne. 21 No a kḭḭm ge baptisma ne ge ne má aŋ ma̰ no ne: Usi be kaŋ ge ne fá ne duur ta to, amma ŋgay hon tene ge ndu ne ne haŋgal ge kwaɗa. Má aŋ da ne tanna ge Jeso Kris ne ta, 22 na ge ne mbo digi ya, ne ka ne Dok tok matoson pal, ge maleka ma, ne pool ma, ne pool ge ne digi zi ma ne gwa̰ ne bama pala ne na pe se.