11
1 Bole me mbi dimma ne mbi sḛ ne bole Kris go me.
Ndu son ma ne ndu gwale Dok ndwara se
(Efe 5:22-25, 1Tim 2:8-14)
2 Mbi dore aŋ ne aŋ ne dwat ne mbi kaŋ ma zi pet pe, ne aŋ ne koy hateya ge mbi ne ho̰ aŋ ma pet pe me. 3 Mbi ɓyare go aŋ kwa fare mbe no: Kris a ndu son ga̰l ne, ndu son a ndu gwale ga̰l ne, Dok a Kris ga̰l ne me. 4 Ndu son ge daage pet ge ne ke kaɗeya, ko ge ne waage fare ge Dok ne pala kulbiya hon na ga̰l hormo to. 5 Amma ndu gwale ge daage pet ge ne ke kaɗeya, ko ge ne waage fare ge Dok ne pala suli hon na ga̰l hormo to, a dimma ne na ne só na pala sot go. 6 Kadɗa ndu gwale kulbi na pala to, na só na pala uzi! Kadɗa na saaso ge ndu gwale pala ka kotɗa, ko sotɗa ɗe, na kulbi na pala se. 7 Ago ndu son ne pool ge kulbi na pala mbḛ to, ne jo̰ na sḛ kḭḭm ne hormo ge Dok ne. Amma ndu gwale a hormo ge ndu son ne. 8 Ago a be ndage ndu son da ne ndu gwale zi to, amma a ndage ndu gwale da ne ndu son zi. 9 A be dol ndu son da ne ndu gwale pe to, amma a dó ndu gwale da ne ndu son pe. 10 Da ne pe no, ne maleka ma pe, ndu gwale ka ne kaŋ ge ne ŋgay pool ge na ne ge na pala digi. 11 Amma ge Bageyal zi, ndu gwale ne pool kat be ndu son to, ndu son ne pool ge kat be ndu gwale to me. 12 Ago kadɗa a ndage ndu gwale da ne ndu son zi, ndu son tó da ne ndu gwale zi me, kaŋ ma pet a mbo da ne Dok ta ya.
13 Aŋ sḛ ma kṵ me sarya gale: a kwaɗa go ndu gwale kaɗe Dok pala suli ɗaa? 14 Kwarra ge nee ne ma sḛ te hate nee go na saaso ne ndu son pe ge na ya̰ na pala susu donna twala to’a? 15 Amma a hormo ne ndu gwale pe ge na kat ne pala susu twala, ago a ho̰ na pala susu dimma ne na kaŋ kulbi pala go. 16 Kadɗa ndu a̰me da ne dwatɗa ge ɗaŋgre fare mbe, i be ha̰le ke go to, ko ɓase ge Dok ne ma.
Ba̰a̰n ge Bageyal ne
17 Ne no pe, swaga hon aŋ wak no go, mbi dore aŋ to, ago aŋ koteya ma da ne zam zḛ pe to, amma ne dageya pe. 18 Zḛ ɓya, mbi za̰ ne go go, swaga ge aŋ ne ɓol ta koteya, varseya ma ya aŋ buwal zi, mbi hon fareba fare mbe pal tyatyat to. 19 A kwaɗa go varseya ma ka aŋ buwal zi, go no, a ba kwa naa ge fareba ma ne aŋ buwal zi. 20 Swaga ge aŋ ne kote, a be ne zam kaŋzam ge Bageyal ne pe to. 21 Ago swaga zamma go, ndu ge daage har tene zam na kaŋzam, go no naa a̰me ma gá ne kyamal, ge may ma fere digi me. 22 Aŋ yàl ma ge aŋ zam kaŋzam ma ne njotɗa ma nama diŋ to ɗaa? Aŋ sen ɓase ge Dok ne ma, ko aŋ kan saaso naa ge ne a̰me to ma pal ɗaa? Mbi jya̰ aŋ gyana ɗaa? Mbi uware aŋ ɗaa? Ne no pe, mbi uware aŋ to.
23 Ago mbi ame da ne Bageyal ta, a na ge mbi ne zwagre na hon aŋ: Ɗaal ge a ma̰ ɓyan Bageyal Jeso naa tok go, he katugum, 24 swaga ge ne gwa̰ ne gugu, siɗi na se, jan go: «No a mbi duur ne, na ge ne aŋ pe. ke me na, aŋ ka dwat ne mbi.» 25 Uwale, go̰r zamma go, he kop, jan go: «Kop mbe no a wak tuli ge giya̰l swama ge mbi ne zi, swaga ge daage go ɗaɗak ge aŋ ne njot na, aŋ ka dwat ne mbi.» 26 Ago swaga ge daage go ɗaɗak ge aŋ zam katugum mbe no, aŋ ne njot kop mbe no, aŋ waage siya ge Bageyal ne, ɗiŋ na gwan’a.
27 Ne da pe no ɗe, ndu ge daage pet ge ne zam katugum, ko ge ne njot kop ge Bageyal ne ne na viya̰ go to, da ne fare ne na pal ge duur ne swama ge Bageyal ne ta. 28 Ndu ge daage na hale na dulwak, na ba ɗage zam katugum ne njot kop gale. 29 Ndu ge ne zam, ko ge ne njot, be ge wan duur pe to, kun tene sarya swaga zamma ne njotɗa go. 30 Da ne pe no, a ɓol naa ge moy ma ne looɗol ma gḛ ne aŋ buwal zi no, naa a̰me ma su no me. 31 Kadɗa nee sḛ ma hale ta pe ya, Dok ne pool kun sarya nee pal to. 32 Amma Bageyal kun sarya nee pal ndwara yuwale nee, ne da pe, na kaage a wa̰ nee ne fare poseya ne dunya ma to. 33 Ne pe no ɗe, ná vya ma, swaga ge aŋ ne kote ne zamma pe, da̰re me ta. 34 Kadɗa ndu kyamal, na za na diŋ ya, ne da pe, na kaage koteya ge aŋ ne zwa fare ya aŋ pal to. Kaŋ ge ne gá ma, mbi mbo nṵsi nama swaga ge mbi ne mbo mbo dḛ ja go.