1korinte Ma 10

Ke me dimma ne Israyela vya ma ne ke ful pul zi go to

1 Ná vya ma, mbi ɓyare go aŋ ka dale fare mbe pal to, nee bá ma pet pḭr kulbi nama se, a kale maŋgaɗam ga̰l yuwam pul se. 2 Nama sḛ ma pet a ke baptisma pḭr zi, ne maŋgaɗam ga̰l yuwam pul se dagre ne Musa. 3 Nama sḛ ma pet a zam kaŋzam ge O̰yom ne ge ɗu. 4 Nama sḛ ma pet a njot mam ge O̰yom ne ge ɗu. Ago a ka njot mam ge njal ge O̰yom ne ge ne ka ɗame nama, njal mbe ka Kris. 5 Amma naa gḛ ne nama buwal zi a be ke Dok sḛ tuli to, da ne pe no nama siya gá ful pul zi no. 6 Kaŋ mbe ma no a ke ne da pe nama ga fare sḭ nee ta, ndwara go na kaage nee ke ene ne sone pe dimma ne nama sḛ ma ne ke go to. 7 Saŋge me ta naa ge uware kaŋ sḭḭm ma dimma ne naa a̰me ma ne nama buwal zi ne ke go to. Dimma ne a ne njaŋge go: «Ɓase ma ka se ndwara zam kaŋzam ne njotɗa, go̰r go a ɗage digi ke vḛso.» 8 Ho̰ me nee ta ke zina dimma ne naa a̰me ma ne nama buwal zi a ne ho̰ ta kerra ɗo, dam ge ɗu pul zi a su no naa dudubu wara azi pare ataa go to. 9 Kugi me nee Kris dimma ne naa a̰me ma ne nama buwal zi a ne kugi na ɗo, bom hṵ nama uzi no go to. 10 Sṵ me ta dimma ne naa a̰me ma ne sṵ ta ɗo, bage burmi naa pe hṵ nama uzi no go to.

11 Kaŋ mbe ma no a ke nama ndwara go nama ka fare sḭ ne nee pe, a njaŋge nama ndwara yuwale nee ge ne mbo zaman pe aya zi ma no. 12 Ne pe no ɗe, bage ne dwat go na mḛ ne go digi, na e na ndwara kwaɗa, na dé to. 13 Pe herra ge ne ɓol aŋ ma pet a dimma ne ge ne ɓol naa pet go me. Dok a bage ne koy wak tuli ne, mbo ya̰ pe herra waɗe aŋ pal to, amma swaga ge aŋ ne det pe herra zi, mbo hon aŋ ge in na, ne viya̰ ge aŋ ba ɓur ne na zi ya uzi.

14 Ne pe no ɗe, mbi naa ge laar wanna ma, abe me ta uzi ne sḭḭm kerra go. 15 Mbi jan aŋ fare dimma ne naa ge ŋgaraŋ ma go, aŋ sḛ ma ndi me fare ge mbi ne jan mbe pe. 16 Kop wak busu ge nee ne e wak busu na pal, te be ba̰a̰n ne swama ge Kris ne to’a? Katugum ge nee ne siɗi na se, te be ba̰a̰n ne sḛ duur ge Kris ne to’a? 17 Ne jo̰ katugum ɗu, nee gḛ go ga puy, nee sḛ duur ge ɗu, ago nee pet nee var ta katugum ge ɗu mbe.

18 Ndi me Israyela vya ma: nama ge a ne zam kavaar ge a ne tyare nama duur ma, a te be ba̰a̰n ne twal tuwaleya to’a? 19 A be go mbi jan go, kavaar ge a ne tyare nama ne sḭḭm ma pe, ko kaŋ sḭḭm mbe ma sḛ da ne hamba to. 20 Amma kaŋ ge a ne tyare ma, a tyare nama hon o̰yom ge seŋgre ma, a tyare nama hon Dok to. Mbi ɓyare go, aŋ ka ba̰a̰n ne o̰yom ge seŋgre ma to. 21 Aŋ ne pool ge ɓan kop ge Bageyal ne ma ne kop ge o̰yom ge seŋgre ma ne njotɗa dagre to, aŋ ne pool ɓan kaŋzam ge Bageyal ne ma ne kaŋzam ge o̰yom ge seŋgre ma ne zamma dagre to. 22 Nee ɓyare twa̰se Bageyal na ke yil ɗaa? Nee waɗe na da ne pool ɗaa?

Ke me kaŋ ma pet ne uware Dok pe

23 Kaŋ ma pet a mbya kerra, amma kaŋ ma pet a mbar mbar to. Kaŋ ma pet a mbya kerra, amma kaŋ ma pet a sin naa digi to. 24 Na kaage ndu ɓyare kwaɗa ne tene pe to, amma ge naa ge may ma ne. 25 Kaŋ ge daage pet ge a ne e nama yatɗa ne suk zi, ne haŋgal fiya se halas pe, za me nama be ge ele pe. 26 Ago suwar ma ne kaŋ ge ne na pul zi ma pet, a ge Bageyal ne ma ne.

27 Kadɗa ndu ge ne ho̰ fareba to tol aŋ ya ɗo, aŋ vin na tolla, kaŋ ge daage pet ge na sḛ ne hon aŋ zamma, za me na be ge ele fare pe, ne haŋgal fiya se halas pe. 28 Amma kadɗa ndu a̰me jan aŋ ya go: «A kavaar ge a ne tyare na hon kaŋ sḭḭm ma duur ne.» Za me na to, ne ndu ge ne jya̰ aŋ fare mbe pe, ne haŋgal fiya se halas pe. 29 Mbi jan go: «Ne haŋgal fiya se halas pe» no ɗe, mbi jan da ne haŋgal ge aŋ ne to, amma ge ndu ge may ne. Kyaɗa suli ge mbi ne ba e ndu ge may ɓol yál na o̰yom zi ɗaa? 30 Kadɗa mbi gwan ne gugu kerra kaŋzam ge mbi ne zam pal ɗe, kyaɗa a ba ka or mbi pe ne kaŋ ge mbi ne gwan ne gugu na pal pe ɗaa? 31 Kaŋ ge aŋ ne zam ma, ko kaŋ ge aŋ ne njot, ko kaŋ ge daage pet ge aŋ ne ke, ke me nama pet ne uware Dok pe. 32 Ka me kaŋ syal koo ne ndu a̰me pe to, ko ne Yuda ma pe, ko ne Grek ma pe, ko ne ɓase ge Dok ne ma pe to. 33 Dimma ne mbi go me, mbi ɓyare go mbi ka tuli kaŋ ma zi pet, ne naa ta pet me, be ge ɓyare kwaɗa ge mbi ne pe to, amma ge naa ɓase ne pe, ne da pe nama ɓo máya.