Tolla ne saŋge ta ya Dok ta pe
2
1 Kote me ta ya digi, kote me ta digi,naa ge pe ɗogle ge be saaso ma.
2 Zḛ ge a hé eya digi,
ge dam ma kale uzi dimma ne mboor ne kwal go,
zḛ ge pore juliliya ge Bage ɗiŋnedin dé ya aŋ pal,
ge dam pore juliliya ge Bage ɗiŋnedin dé ya aŋ pal,
3 aŋ pet ge lwalwagat ge ne suwar pal ma,
aŋ ge ne ke mborra na wak yuwaleya ma pal ma,
ɓyare me Bage ɗiŋnedin pe.
Ɓyare fare ge dosol pe,
ɓyare me kat lwalwagat,
tamekyala aŋ mbo ɓur uzi
ne dam pore juliliya ge Bage ɗiŋnedin ne go.
Mḛreya ne naa ge le sya ma pe
4 Ago suwal Gaza mbo gá pṵṵl,
suwal Askalon mbo burmi uzi,
a mbo yan naa ge suwal Asdod ma gyala pala ɗar,
a mbo pur naa ge suwal Ekron ma uzi.
5 Woo ge aŋ ne,
aŋ ge ne ka ne maŋgaɗam ga̰l yuwam wak go ma,
pehir ge ne mbo ne suwal Krete ya ma.
Bage ɗiŋnedin gace fare aŋ ge Kanan, Filistiya ma suwal,
mbi mbo burmi aŋ pe uzi,
mbi mbo pur aŋ ne suwal diŋ uzi.
6 Suwal ge ne maŋgaɗam ga̰l yuwam wak go ma
mbo gá swaga zám ge kavaar ma ne,
swaga ge naa ge koy kavaar ma ne kan
bama kavaar ma ne go zamma,
ne ɗyagarta ge kavaar ma ne.
7 Suwal mbe mbo gá ne vuwal pe ge Yuda ne ge ne gá ma pe,
a mbo ka mbo koy bama kavaar ma na go,
a mbo ka digli ta gasamal suwal Askalon go.
Ago Bage ɗiŋnedin, Dok ge nama ne
mbo saŋge na ndwara ya nama ta,
mbo gwan ne nama naa ge paal ma ya.
Mḛreya ne naa ge le ham ma pe
8 Mbi za̰ sáso ge Mowab ma ne,
ne cotɗa ge Ammon vya ma ne
ne ka cot mbi ɓase ma,
a ka fyaɗe bama suwal warbe ma se.
9 Ne pe no, ne jo̰ mbi da ne ndwara,
ka̰l ge Bage ɗiŋnedin, Bage naa ge mbal pore ma ne,
Dok ge Israyela ne:
Mowab mbo saŋge dimma ne suwal Sodom go,
Ammon vya ma mbo saŋge dimma ne Gomor ma go,
a mbo gá swaga don kabubu, ne swaga yo̰l baŋ,
suwal ge ne burmi uzi ne ndwara dedet.
Mbi ɓase ge ne gá ma mbo pál nama,
a mbo ame nama suwal ma.
10 No a potɗa ge nama ne ne
ne pala ga̰l ne nama ne pe,
ago, a sá Bage ɗiŋnedin,
Bage naa ge mbal pore ma ne ɓase ma.
11 Bage ɗiŋnedin mbo e nama sya na vo,
mbo burmi dok ge ne suwar pal ma uzi pet,
pehir ma pet, ko ge ne swaga kaal ya ma,
a mbo cwage na ndwara se,
ndu ge daage na swaga go.
Mḛreya ne naa ge le mbii ma pe
12 Amma aŋ ge Kuch ma me,
mbi mbo hun aŋ uzi ne mbi kasagar.
Mḛreya ne naa ge le kuu ma pe
13 Mbo mḛre naa ge le kuu ma,
mbo burmi suwal Asiriya uzi,
mbo saŋge suwal Ninive babur,
dimma ne ful pul ge babur viŋ go.
14 Mbo gá swaga katɗa ne kavaar ma pe,
kavaar hir ge daage mbo gá kat na go.
Tukturi ma ɓanna ne comcore
mbo gá dwamma na zok ge siŋli ma zi,
naa mbo gá za̰ nama fyaso ma zok ndwala ma go.
Zok wak ma mbo mbugi uzi,
zok wak kaal ge ne uwara sedre ma mbo gá kwaya̰l go.
15 No a kaŋ ge ne mbo ɓol suwal ge ne
ka ndil tene waɗe na kaam ne
na ge ne ka jan tene go: «A mbi ne ɗeŋgo!»
Te gwan burmi uzi kyaɗa?
Gá ya swaga katɗa ge kavaar ma ne.
Ndu ge daage pet ge ne kale na go, cwaɗe na wak,
ka pisigi na pala.