MAKTUB GE
ANABI NAHUM
NE
1
1 Fare gaceya suwal Ninive pal. Maktub daalam ge Nahum ndu ge suwal Elkos ne.Laar ol ma ne kwaɗa ge Bage ɗiŋnedin ne
2 Bage ɗiŋnedin, a Dok ge yil ne, a bage ne ke giliya ne,
Bage ɗiŋnedin a bage ne ke giliya ne, a bage laar ol ne,
Bage ɗiŋnedin a bage ne gele tene ne na naa ge huur ma ne,
na sḛ wan na naa ge ho̰l ma na dulwak zi.
3 Bage ɗiŋnedin dṵṵl pore kerra zi, na pool a ɓaŋlaŋ,
Bage ɗiŋnedin ya̰ be mḛre ndu ge ne sone zi to.
Swaga ge na sḛ ne kale,
saam mandal ge ɓaŋlaŋ ŋgurmi digi,
pḭr a kuci ge na koo ne abe na digi ne
4 Na sḛ mḛre maŋgaɗam ga̰l yuwam, fya̰ digi,
maŋgaɗam ma pet a fya̰ digi,
swaga zám ge suwal Basan ne ma ne njal Karmel looɗe uzi,
uwara ge ne murum ge Liban ne zi ma wak looɗe uzi.
5 Njal ma a ndat na ndwara zḛ,
njal ge sore busur ma ɗese uzi,
na ndwara se, suwar iigi digi
naa ge ne suwar pal ma pet a iigi poseya ne na.
6 Pore juliliya ge na ne zi, a wuɗi mḛ na ndwara se ne ɗaa?
Laar ol ge na ne zi, a wuɗi kat ne ndwara ne ɗaa?
Na pore kerra dimma ne ol ɗaabeya go,
njal ma gul uzi na ndwara zḛ.
7 Bage ɗiŋnedin a kwaɗa,
dam ge yál ma zi, na sḛ swaga woy ta ne.
Dol na ndwara nama ge ne woy ta na zi ma pal,
8 ko iigiya ge ɓaŋlaŋ ma zi.
Burmi suwal Ninive pe dolla uzi,
yan na naa ge ho̰l ma pe ɗiŋ mbo taal ge siya ma ne se ya.
Mḛreya ge suwal Yuda ma ne Ninive ne:
Ge Yuda ne
9 Aŋ dwat go Bage ɗiŋnedin wuɗi ne ɗaa?
A na burmi kaŋ ma uzi ne pet,
yál njotɗa ge ɗogle mbo gwan gwan’a to.
10 A dimma ne kore ge ne san se kakak go,
a njot jiya̰l ɗiŋ a fere.
A mbo til uzi kucup dimma ne dṵso fiya̰l go.
Ge Ninive ne
11 Mo Ninive, Ndu ge ne dwat sone Bage ɗiŋnedin pal,
ndu ge ne saare fare ge sone kakatak,
ndage ja ne mo zi ya.
Ge Yuda ne
12 Bage ɗiŋnedin jan go:
Ko katɗa aŋ naa ge ho̰l ma ɓase gḛ ne pool puy ɗe,
a burmi uzi, nama pe mbo á.
Kadɗa mbi e aŋ njot yál puy,
mbi mbo gwan e aŋ njot yál ne go̰r ta to.
13 Se no, mbi zur aŋ ya ne aŋ naa ge ho̰l ma tok go,
mbi sá aŋ ya digi.
Ge gan ge Ninive ne
14 Bage ɗiŋnedin gace mo fare janna go:
Mo mbo gwan ɓol hir ge ba tol mo dḭl to bat,
mbi mbo burmi mo dok ge cerra ma ne ge ɗeereya ma
ne zok ge mo dok ma ne zi uzi.
mbi mbo al mo taal siya,
ne jo̰ mo be gwan gá a̰me pe to.