Ezekel 47

Mam so̰o̰l ge zok ge mbegeya ne

1 Ndu mbe gene mbi ya zok ge mbegeya wak go. Ndi, mbi kwa mam ne soya ne zok ge mbegeya wak pe se ya. Ago zok ge mbegeya wak saŋge ndwara ham. Mam mbe ka só mbo zok ge mbegeya le mbii, twal tuwaleya le ge mbii ge go. 2 Ndu mbe gwan ne mbi ya zum ne zok ge mbegeya wak le ge kuu ge ne, koŋle mbi gulum go̰r zum ya ɗiŋ mbo ne mbi viya̰ wak ge ham ge ya. Mam ka so so̰o̰l mbo le mbii. 3 Ndu mbe wat ya zum mbo ndwara ham ne táál na tok go. Ŋgay swaga tok pyaso ŋgayya dubu ɗu, e mbi tot mam pul. Mam mbe wan mbi mbi koo fool go. 4 Gwan ŋgay ta dubu ɗu, e mbi totɗa, mam wan mbi mbi koo rusu go. Gwan ŋgay ta dubu ɗu, e mbi totɗa, mam wan mbi mbi swaga pe zi. 5 Gwan ŋgay ta dubu ɗu, mam mbe saŋge mam so̰o̰l ge be ge mbi gwan day tot na to. Ago mam mbe eme digi, ge ndu on na on, kat ge be ge ndu gwan tot na tot to. 6 Jan mbi go: «Mo ndu dasana, mo kwa ya go’a?» Mbo ne mbi uzi ya, gwan ne mbi ya mam so̰o̰l mbe wak go. 7 Swaga ge mbi ne gwa̰ ya, mbi kwa uwara ma gḛ ge be to mam mbe wak ma go jwak. 8 Jan mbi go: «Mam mbe mbo só so̰o̰l mbo ndwara ham ya, mbo det baal pul se ya, kale mbo dol tene maŋgaɗam ga̰l ge yuwam pul se ya. Swaga ge ne mbo dol tene ya maŋgaɗam ga̰l ge yuwam pul se ya, na mam mbo saŋge tuli. 9 Swaga ge daage pet ge mam mbe ne mbo detɗa go, kavaar ge daage pet a mbo zuli ta se la̰y, sii ma mbo zuli ta se me. Swaga ge mam mbe ne det go, mbo saŋge mam ma tuli, mbo hon kaŋ ma ndwara me. 10 Ne En-Gedi go ɗiŋ mbo En-Eglayim ya, naa ge swat soso ma mbo gá zen bama kool ma maŋgaɗam wak go. A mbo ɓol sii ma pe hini hini mam mbe se baŋneya bindik dimma ne maŋgaɗam ga̰l yuwam se go. 11 Amma mam mbe tok ma ne na baal ma mbo saŋge tuli to, a mbo gá swaga ke yuwam. 12 Mam mbe wak le ma go jwak, uwara ge zamma ma pe hini hini a mbo don go, nama gaar ma mbo looɗe to bat, a mbo ka tolla ɗaɗak. Saba ge daage pul zi, a mbo ka tolla, ago a mam ge ne só ne zok ge mbegeya zi ya kan nama pe zi ne. Nama tolla ma mbo kat kaŋzam, nama gaar ma jam ge zon naa me.»

Warbe ge suwal Israyela ne

13 Bageyal Bage ɗiŋnedin jan go: «No a warbe ge suwal ne ge aŋ ba var na Israyela vya ge wol para azi ma buwal zi ne, amma aŋ mbo hon Yusuf joo pe azi. 14 Aŋ mbo var ta suwal joo mbyat ta cecḛ. Ago mbi guni tene hon aŋ baŋ ma na joo. Suwal mbe gá aŋ joo. 15 Suwal mbe warbe no: Na le ge kuu ge mbo ɗage da ne maŋgaɗam ga̰l yuwam wak ya, her viya̰ ge ne mbo Hetlon ya, ne Lebo-Hamat, ne Sedad ya. 16 Mbo kale mbo Berota, ne Sibrayim, na ge ne suwal Damas ma ne suwal Hamat buwal zi, kale mbo Haser-Tikon ya, na ge ne warbe ge suwal Havran ne ya. 17 Warbe mbe mbo ɗage ne maŋgaɗam ga̰l yuwam wak se ya ɗiŋ det mbo suwal Hasar-Enan ya. Suwal Damas ma ne Hamat mbo kat na warbe le ge kuu ge. 18 Na le ge ham ge mbo ɗage ne suwal Havran ma ne Damas buwal zi ya, mbo suwal Galaad ma ne suwal ge Israyela ne buwal zi ya, maŋgaɗam Urdun mbo kat warbe, mbo det ɗiŋ maŋgaɗam ge sya ge pal ya. No a warbe ge le ge ham ne. 19 Na le ge mbii, warbe mbo ɗage ne suwal Tamar go mbo det Mam Meriba ge ne Kades go pal ya, mbo her mam pul, ɗiŋ mbo det maŋgaɗam ga̰l yuwam pal ya. No a warbe ge le ge mbii ge ne. 20 Na le ge sya ge, maŋgaɗam ga̰l yuwam mbo kat warbe ne mbii ɗiŋ mbo det Lebo-Hamat ya. No a warbe ge le ge sya ge ne.

21 Aŋ mbo var ta suwal mbe se ne aŋ pehir ma go. 22 Aŋ mbo var ta suwal joo se ne uusi baare ta. aŋ mbo var vya gwasal ge ne ka ne aŋ buwal zi, ge ne tó vya ma suwal diŋ ma me. Aŋ mbo ke ne nama dimma ne vya twala go, dimma ne Israyela vya go. A mbo ɓol joo pehir ge Israyela ne ma buwal zi. 23 Vya gwasal ge daage mbo ɓol na joo ge pehir ge na ne ka ne nama buwal zi ma buwal zi, ka̰l ge Bageyal Bage ɗiŋnedin ne.»