Ezekel 46

Eya ge ɗogle ma ne gan pe

1 Bageyal Bage ɗiŋnedin jan go: Gulum ge zi ge wak ge ne saŋge ndwara le ham mbo kat dibiya dam ge myanaŋgal ge naa ne ke temel nama go ma pul zi mwaɗak, amma dam ɗigliya go, mbo kat hageya se, mbo kat hageya saba wak ma go me. 2 Gan mbo wat ne viya̰ wak ge yapul ge zum ge ne ya, mbo mbo ya mḛya gwa ne viya̰ wak keŋ. Bage ke tuwaleya ba tyare na tuwaleya ge tilla uzi ma, ne tuwaleya ge ba̰a̰n ne ma. Mbo gur na koo viya̰ wak pal, ba ɗage wat ya zum. Viya̰ wak mbe mbo gá hageya ɗiŋ gasamal. 3 Naa ge ne suwal diŋ baŋ ma mbo mbo ya gur bama koo viya̰ wak mbe pal Bage ɗiŋnedin dam ɗigliya ma ne saba wak ma go.

4 Dam ɗigliya go, gan mbo tyare tame vya ge be saaso ma myanaŋgal ne gamla ge be saaso ɗu tuwaleya ge tilla uzi hon Bage ɗiŋnedin. 5 Mbo gwan tyare swáma peɗem Efa pul ɗu ge gamla pal, amma ne tame vya ma pe ɗe, na sḛ mbo tyare swáma peɗem laar ɓyareya ge na ne pal. Mbo tyare num Hin pul ɗu ge Efa pul ge daage pal. 6 Saba wak ma go, mbo tyare nday dalu ɗu, ne tame vya ma myanaŋgal, ne gamla ɗu me, pet a mbo kat be saaso. 7 Mbo gwan tyare swáma peɗem Efa pul ɗu ne nday dalu pe, ne gamla pe me, amma ne tame vya ma pe ɗe, na sḛ mbo tyare swáma peɗem laar ɓyareya ge na ne pal. Mbo tyare num Hin pul ɗu ge swama Efa pul ge daage pal me. 8 Swaga ge gan ne mbo ya, mbo wat ya zi da ne viya̰ wak ga̰l, mbo gwan zum da ne viya̰ wak mbe. 9 Amma swaga ge naa ge ne suwal diŋ baŋ ma ne mbo ya Bage ɗiŋnedin ndwara se dam vḛso ma go, naa ge ne wat ya zi ne viya̰ wak ge kuu ge ma mbo wat zum da ne viya̰ wak ge mbii ge, nama ge ne wat ya zi ne viya̰ wak ge mbii ge ma mbo wat zum da ne viya̰ wak ge kuu ge. Ndu mbo gwan zum ne viya̰ wak ge na ne hé na ya wat ya zi to bat, amma mbo wat zum da ne viya̰ wak ge ne na kon ndwara zi. 10 Gan mbo wat ya zi dagre ne ɓase ma, mbo wat zum dagre ne nama me.

11 Dam vḛso ma, ne dam ɓol ta ge ga̰l ma go, tuwaleya ge swáma peɗem ne mbo kat Efa pul ɗu ne nday dalu ge daage pe, Efa pul ɗu ne gamla ge daage pe me, amma ne tame vya ma pe ɗe, mbo kat laar ɓyareya ge na ne pal. A mbo kan num Hin pul ɗu ne swama Efa pul ge daage pe me. 12 Kadɗa gan mbo tyare tuwaleya ge tilla uzi, ko tuwaleya ge ba̰a̰n ne hon Bage ɗiŋnedin laar ɓyareya ge na ne pal ɗe, a mbo hage na viya̰ wak ge ham ge. Mbo mbo ya tyare na tuwaleya ge tilla uzi ma ne tuwaleya ge ba̰a̰n ne dimma ne na ne ke na dam ɗigliya go go. Swaga ge ne watɗa zum, a mbo dibi viya̰ wak mbe ya digi na pe go.

13 Dam ge daage go, aŋ mbo ka tyare tame vya ge del ɗu ge be saaso ɗu tuwaleya ge tilla uzi hon Bage ɗiŋnedin. Aŋ mbo ka tyare na cya̰wak. 14 Cya̰wak ɗaɗak, aŋ mbo ka tyare swáma peɗem Efa pul ɗu ne myanaŋgal zi, ne num Hin pul ɗu ne ataa zi kanna swama pal. No a tuwaleya ge swáma peɗem ne ne Bage ɗiŋnedin pe, mbo ka ke mbe go ɗaɗak, mbo kat eya ge ɗiŋnedin. 15 Cya̰wak ɗaɗak aŋ mbo ka tyare tame vya, ne swáma peɗem, ne num tuwaleya ge tilla uzi.

Joo ge gan vya ma ne

16 Bageyal Bage ɗiŋnedin jan go: Kadɗa gan hon na vya swaga joo a̰me ya, na joo mbe mbo gá ge nama ne na vya ma ne dedet. 17 Amma kadɗa gan hon na dore a̰me swaga joo ya, joo mbe mbo gá ge na ne ɗiŋ na dam gá digi suli go, go̰r go mbo gwan ne swaga joo mbe hon gan. A swaga ge a ne hon gan vya ɗeŋgo, gá na joo ne ndwara ne. 18 Gan mbo ame swaga ge naa ge ne suwal diŋ baŋ ma ne, ndwara ban nama ne nama joo go to bat. Mbo hon na vya ma swaga joo ge na joo zi ɗeŋgo, ne da pe, na kaage mbi ɓase ma ndage digi ne bama joo go to.

Swaga ke kaŋzam ge zok ge mbegeya zi ne ma

19 Ndu mbe wat ne mbi ya zok ge mbegeya ge naa ge ke tuwaleya ma ne ma zi ne viya̰ wak ge ne le kuu ya, ge le ge sya ge ya, le hṵsi se ya ŋgay mbi swaga a̰me. 20 Jan mbi go: No a swaga ge naa ge ke tuwaleya ma ne sḭ́ duur ge kavaar ge a ne tyare nama ne poreya pe ma ne, a mbo sḭ́ tuwaleya ge kaŋ kyarga ma ne swaga mbe go me. Ne da pe, na kaage nama mbo ne nama ya yapul zum ɗo, nama mbege ɓase ma to. 21 Gwan ne mbi ya yapul ge zum ge go, gene mbi ge gulum keŋ ge anda ma go. Ge keŋ mbe ma go, swaga ma ve ya go. 22 Ge keŋ ge anda mbe ma go, swaga verra mbe ma ka gorse, nama twala ma ka tok pyaso ŋgayya wara andanda, nama fiyal ma tok pyaso ŋgayya tapolɗu ɗu me. Keŋ mbe ma anda mwaɗak, nama pul ma ka mbyat ta. 23 A ka verra digi ne gulum anda mwaɗak, a sḭ sagar ma gulum kiya̰r ma go me. 24 Ndu mbe jan mbi go: A sagar ma ne, naa ge ne ke temel ne zok ge mbegeya zi ma sḭ́ duur ge kavaar ge ɓase ma ne tyare nama swaga mbe ma go.