Ezekel 3

1 Jan mbi go: «Mo ndu dasana, kaŋ ge mo ne ɓó na mbe no, zá na, za maktub worgeya mbe, mbo jan Israyela vya ma fare.» 2 Mbi hage mbi wak, e mbi zam maktub worgeya mbe. 3 Jan mbi go: «Mo ndu dasana, wá tene, huri mo laar ne maktub worgeya ge mbi ne ho̰ mo na mbe no.» Mbi zam na, kat mbi wak zi tuli ne daaram go.

4 Jan mbi go uwale: «Mo ndu dasana, mbo Israyela vya ma ta, mo jan nama mbi fare ma. 5 Mbi teme mo mbo naa ge wak mbidgil, ge wak farra dṵṵl ma ta to, amma ge Israyela vya ma ta. 6 A be ge pehir ge nama wak mbidgil, ko ge nama wak farra dṵṵl, ge mo ne za̰ nama to ma ta to. Mbi te teme mo mbo nama ta, a te ya za̰ mo. 7 Amma Israyela vya ma ne dwatɗa ge za̰ mo to, ago nama sḛ ma ne dwatɗa ge za̰ mbi to. Israyela vya ma mwaɗak, a naa ge pala ndaar ma ne, a naa ge dulwak togreya ma ne. 8 Ndi, mbi saŋge mo tele dimma ne nama go, pala ndaar dimma ne nama go me. 9 Mbi mbo saŋge mo pala ndaar dimma ne go̰y go, ndaar waɗe ŋgoo, mo mbo sya nama vo to, mo mbo ŋgwabe nama ndwara se to me. Ago a naa ge za̰ wak to ma ne.» 10 Gwan jan mbi go: «Mo ndu dasana, fare ge mbi ne jan mo ma no pet, za̰ nama ne mo togor kwaɗa, koy nama mo dulwak zi. 11 Mbo ge mo pehir ge ne paal zi ma ta ya, mo jan nama fare. Ko nama za̰ mo, ko nama za̰ mo to, jya̰ nama go: ‹Bageyal, Bage ɗiŋnedin jya̰ ne.›»

12 O̰yom hé mbi digi, mbi za̰ ka̰l pyanna ge ɓaŋlaŋ ne mbi go̰r ya go: «Uwareya hon Bage ɗiŋnedin, na ge ne ŋgay hormo ge na ne na swaga katɗa zi.» 13 Mbi za̰ ko̰r ge kavaar mbe ma ganwak ma ne dabe ta, ne ko̰r ge pus koo ma ne, ne ko̰r pyanna ge ɓaŋlaŋ ne me. 14 O̰yom hé mbi digi, mbo ne mbi. Mbi mbo ne laar vḛneya ne pore juliliya, ago pool ge Bage ɗiŋnedin ne wa̰ mbi ndaar ge be to. 15 Mbi mbo ya naa ge paal ma ta suwal Tel-aviv go, a ka maŋgaɗam Kebar wak go, no a nama swaga katɗa ne. Mbi gá katɗa ne ajab nama buwal zi ɗiŋ dam ɓyalar.

Ezekel bage huli swaga ne

(33:1-9)

16 Swaga ge dam ge ɓyalar mbe ne mbya go, Bage ɗiŋnedin jan mbi go: 17 «Mo ndu dasana, mbi e mo bage huli swaga ne Israyela vya ma pe. Swaga ge mo ne mbo za̰ fare ya ne mbi wak zi, mo mbo waage nama mbi fare mbe. 18 Swaga ge mbi ne mbo jan ndu ge sone ya go: ‹Mo mbo su›, kadɗa mo waage na ya to, mo jan ndu ge sone na saŋge ya se ne na kaŋ kerra ge sone ma zi ya, ndwara ɓol máya to, kadɗa ndu ge sone mbe su ya ya̰l ge na ne zi, mbi mbo ele na siya ne mo tok go. 19 Amma kadɗa mo waage ndu sone ya, saŋge ya se ne na sone zi ya, ko ne na kaŋ kerra ge sone ma zi ya to, na sḛ mbo su na ya̰l zi, mo me, mo mbo má tene. 20 Kadɗa ndu ge dosol ya̰ na dosol kerra ya, gwan’a ke ya̰l, mbi mbo e kaŋ syal koo na ndwara zḛ, na sḛ mbo su. Kadɗa mo be waage na to, su na sone zi no, ndu mbo gwan dwat na kaŋ kerra ge dosol ge ne ke ma pal to. Mbi mbo ele na siya ne mo tok go. 21 Amma kadɗa mo waage ndu ge dosol ya go na gwan ke sone to, na sḛ ya̰ sone be kerra no, mbo má, ne na ne ɓó waageya pe. Mo me, mo mbo má tene.»

Dok tele Ezekel be ge jan fare

22 Pool ge Bage ɗiŋnedin ne gwan wan mbi, jan mbi go: «Ɗage digi, mbo baal pul se ya, mbi ba jan mo fare.» 23 Mbi ɗage, mbi mbo baal pul se ya. Ndi, hormo ge Bage ɗiŋnedin kat swaga mbe go, dimma ne hormo ge mbi ne kwa na maŋgaɗam Kebar wak go go, mbi kubi mbi pul se. 24 O̰yom wat mbi zi, e mbi mḛya digi, jan mbi go: «Mbo dibi mo zok wak mo pal. 25 Mo ndu dasana, ndi, a mbo vwal mo se ne taal, a mbo twar mo, mo mbo gwan wat ya nama ndwara zum to bat. 26 Mbi mbo tat mo ɗel ne mo din, mo mbo gá katɗa wak ɗamal, mo mbo gwan gá ndu ge mḛre nama to, ago a naa ge be za̰ wak to ma ne. 27 Swaga ge mbi ne mbo jan mo fare ya, mbi mbo hage mo wak, mo ba jan nama fare ge mbi Bageyal Bage ɗiŋnedin ne jya̰. Naa ge za̰ya ma mbo za̰, naa ge kuriya ma mbo kuri, ne jo̰ a naa ge za̰ wak to ma ne.