Ezekel 2

Dok teme Ezekel mbo Israyela vya ma ta

1 Jan mbi go: «Mo ndu dasana, mḛ digi, mbi ɓyare jan mo fare.» 2 Swaga ge ne jya̰ mbi fare, o̰yom wat mbi zi, e mbi mḛya digi, mbi ka za̰ bage ne ka jan mbi fare. 3 Na sḛ jan mbi go: «Mo ndu dasana, mbi teme mo mbo Israyela vya ma ta, ge naa ge be za̰ wak to ma ta, nama ge ne za̰ mbi wak to ma ta, a ne bama bá ma ya day ɗiŋ ma̰ no, a ke ho̰l da ne mbi. 4 Mbi tene mo mbo vya ge pala ndaar, ge dulwak togreya mbe ma ta. Mbo jan nama go: ‹Bageyal, Bage ɗiŋnedin jan go:› 5 Ko nama za̰ mo, ko nama za̰ mo to, ago a naa ge be za̰ wak to ma ne, a mbo kwa go anabi ya bama buwal zi. 6 Amma mo ndu dasana, sya nama vo to, sya nama fare janna ma vo to me, ko ne jo̰ mo ya kore ma ne gumi ma buwale zi, ko mo ka ya hurtu ma pal, sya nama fare janna ma vo to, ŋgwabe tene nama ndwara se to, ago a naa ge be za̰ wak to ma ne. 7 Jya̰ nama mbi fare ma, ko nama za̰ mo, ko nama za̰ mo to, ago a naa ge za̰ wak to ma ne.

8 Amma mo ndu dasana, za̰ fare ge mbi ne jan mo. Za̰ wak to dimma ne naa ge be za̰ wak to mbe ma no go to. Hage mo wak, zá kaŋ ge mbi ne hon mo na no.»

9 Mbi ndil swaga, mbi kwa tok ne maktub worgeya tyareya ya mbi ndwara zi. 10 Worge na se mbi ndwara go, mbi kwa kaŋ njaŋgeya na pul go ne na go̰r go, a njaŋge ne na zi sḭ ma, ne sun ta ma, ne yo̰re ta ma.