Bage ɗiŋnedin, gwa̰ ne i ya mo ta
5
1 Bage ɗiŋnedin, dwa ne fare ge ne ɓó i,ndi sáso salla ge a ne sal i.
2 Pehir ge ɗogle ma ame i joo ya go,
naa ge pe baŋ ma ga ya ne i yàl ma.
3 I gá ya kya̰le, i bá ma ne go to,
i ná ma gá ya ne kumur ma go.
4 I gá yat i tub ma mam yat njotɗa,
i gá yat i uwara ma yat.
5 Naa ge ne ke i yál ma, a ka yan i pe.
I lwage ya go, i ɗigliya to.
6 I kaɗe i tok suwal Masar ma ne Asiriya pe go
na ma̰ kat ge i ɓol kaŋzam zamma de.
7 I bá ma ke sone, a ne go to,
i gá in dṵṵl ge nama ya̰l ma ne ne.
8 Mo̰r ma gá ke muluk ne i pal ne,
ndu a̰me ge zur i ne nama tok go to.
9 I gá hon ta siya ge naa ge fiiri viya̰
ge ne babur pul go ma wak zi,
i ba ɗage ɓol kaŋzam zamma.
10 Kyamal piibi i bol ya pisil muɗud
dimma ne ol fur ne piibi kaŋ go.
11 A gá ya fí ne naa zaab ma Siyona go,
a gá ya fí ne vya kale ma Yuda suwal ma go.
12 A gá kan táál naa ga̰l ge temel ma ka̰l zi hunna,
ndu ge hon sabar ma hormo to.
13 A gá e bool ma nan swara,
dore ma gá pugi detɗa ne uwara dṵṵl.
14 Sabar ma gá ya be mbo kat
gulum wak zum ya nṵsi fare,
bool ma gá ya be mbal bama kaŋ ma.
15 Laar saal be gwan gá ne i dulwak zi to,
i kaŋ ndalla ma saŋge ya kḭḭmi kerra.
16 I balme fage ya ne i pala digi se,
Woo ge i ne, i ke sone!
17 Kadɗa i da ne tiiɗiya ne i dulwak zi,
kadɗa mḭḭm ɓa i ndwara ma ya go,
18 da ne zok ge mbegeya ne ne saŋge ya babur viŋ pe,
da ne na ne saŋge ya swaga katɗa ge ha̰na ma ne pe.
19 Mo Bage ɗiŋnedin, mo ya go katɗa ɗiŋnedin,
mo hool gan ya go doŋ pe ma ne doŋ pe ma.
20 Kyaɗa mo ba vyale i uzi go dedet ɗaa?
Kyaɗa mo ba saŋge i mo go̰r go dedet ɗaa?
21 Bage ɗiŋnedin, gwa̰ ne i ya mo ta,
go no i ba gwan’a!
Gwa̰ ne i ya dimma ne i dḛ ne ka zaŋgal go.
22 Mo saŋge i mo go̰r dedet ɗaa?
Mo laar hot i pal gḛ mat ɗaa?