Irmiya 44

Fare waageya ne Yuda ge ne so suwal Masar ya ma pe

1 No a fare ge Dok ne jya̰ Irmiya ne Yuda ge ne mbo kat suwal Masar ya ma pe ne. A ka suwal Migdol, ne Tapanes, ne Nof, ne Patros go. Jya̰ nama go: 2 «Bage ɗiŋnedin, Bage naa ge mbal pore ma ne, Dok ge Israyela ne jan go: Aŋ kwa yál ma mwaɗak ge mbi ne zwá nama ya suwal Ursalima ma ne suwal ge Yuda ne ma pal mwaɗak. Ma̰ ne se no, a burmi ya uzi, ndu ge gwan kat nama go to bat. 3 Yál mbe ma dé ya nama pal da ne sone ge a ne ke, a é mbi laar hotɗa no. Ago a ka mbo til dukan ma ne uware dok ge ɗogle ma, nama ge nama sḛ ma, ko aŋ, ko aŋ bá ma ne kwa nama to ma. 4 Ne jo̰ mbi ka teme mbi dore anabi ma ya aŋ ta ɗaɗak jan aŋ go aŋ ke kaŋ ge seŋgre kakatak ge mbi laar ne ɓyare nama to mbe no to puy ɗe, 5 aŋ be za̰ mbi to, aŋ be ke haŋgal to, aŋ be saŋge ya se ne sone kerra ge aŋ ne go to, aŋ be ya̰ be ge tyare dukan ma hon dok ge ɗogle ma to. 6 A go no, laar ol, ne pore juliliya ge mbi ne dé ge suwal ge Yuda ne ma pal, ne suwal Ursalima viya̰ ma go no, ti nama uzi no, dimma ne aŋ ne kwar na ma̰ ne se no go, a gá ya kaŋ burmiya, ne babur viŋ.»

7 Se no, Bage ɗiŋnedin, Bage naa ge mbal pore ma ne, Dok ge Israyela ne jan go: «Aŋ te ke ta yál go gyana ɗaa? Aŋ te ɓyare burmi hir ge Yuda ne gyana ɗaa? Aŋ te á naa sonmo, ne naa zaab, ne naa jabso, ne vya kaare ma pe gyana, ge ndu gwan gá go̰r go go ɗu kikit to ɗaa? 8 Aŋ kaŋ kerra ma é mbi laar hotɗa. Tyareya ge aŋ ne tyare dukan ma hon dok ge ɗogle ge ne suwal Masar go ma, na ge aŋ ne ká mbay ne na go, aŋ ɓyare á ta pe, aŋ ɓyare go aŋ gá kaŋ senna, ne kaŋ saaso ge pehir ge ɗogle ma buwal zi ɗaa? 9 Aŋ vyale sone ge aŋ bá ma ne ma, ne sone ge gan ge Yuda ne ma, ne bama gwale ma, ne sone ge aŋ ne ma, ne ge aŋ gwale ma ne ma, sone ge ne ke suwal Yuda go ma, ne ge viya̰ pul ge Ursalima ne ma go ma ya go ɗaa? 10 Ɗiŋ ma̰ no, ndu a̰me ge gwan ne na pala se to, ndu a̰me ge sya mbi vo to, ndu a̰me ge ke mborra mbi eya ma, ne mbi wak yuwaleya ma ge mbi ne ho̰ aŋ, ne aŋ bá ma pal to bat.»

11 Ne no pe, Bage ɗiŋnedin jan go: «Ndi mbi saŋge mbi ndwara ja aŋ pal ke aŋ yál, mbi mbo burmi Yuda pehir ma uzi. 12 Mbi mbo abe pehir ge Yuda ne ge ne gá, ge a ne sya baale mbo kat suwal Masar ya ma, mbi mbo hun nama uzi pet. Pore ma ne kyamal mbo hun nama ne jyale go diŋ mbo ga̰l. A mbo su uzi pet, a mbo gá kaŋ senna ne kaŋ saaso, naa mbo ga vḛne wak ta pal, ko jan ta fare ge sone ma ne nama dḭl. 13 Mbi mbo mḛre naa ge ne mbo kat suwal Masar ya ma dimma ne mbi ne mḛre naa ge ne ka suwal Ursalima go ma ne pore, ne kyamal, ne mbogom go. 14 Ne naa ge a ne gá ne pehir ge Yuda ne zi, ge a ne mbo kat suwal Masar ya ma buwal zi, nama ge a ne dwatɗa ge gwanna ya katɗa suwal Yuda go ma, ndu a̰me mbo ɓur, ko kat ne ndwara to bat. A mbo gwan’a to, a naa cabra̰y mbo gwan’a ne baŋ.»

Tuwaleya kerra hon dok ge ɗogle ma

15 Swaga mbe go, pet nama ge a ne kwa go bama gwale ma ke tuwaleya hon dok ge ɗogle ma, poseya ne naa zaab ge ne kote swaga mbe go ma mwaɗak ndwara go, pet nama ge ne ka suwal Masar go ma, ge suwal Patros diŋ ma, a gwan ne Irmiya janna go: 16 «I za̰ mo fare ge mo ne jan i ne dḭl ge Bage ɗiŋnedin ne to. 17 Ago i mbo ke kaŋ ma pet wak tuli ge i ne ke pal, i mbo kat til dukan ma ne tyare oyo̰r jiya̰l ma hon sḭḭm gan gwale ge ne digi zi ya dimma ne i, ne i bá ma, ne i gan ma, ne naa ga̰l ge temel ma ne ka kerra suwal ge Yuda ne ma go, ne Ursalima viya̰ ma go go. Swaga ge i ne ka kerra dḛ mbe go, i ka zam kwaɗa, i ka tuli, yál a̰me be det i pal to. 18 Ne swaga ge i ne ya̰ be ge til dukan ma, ne tyare oyo̰r jiya̰l hon sḭḭm gan gwale ge ne digi zi ya go day, kaŋ ma pet a woɗege i ya go, pore ma ne kyamal á i pe ya go. 19 Swaga ge i ne til dukan ma, ne tyare oyo̰r jiya̰l hon sḭḭm gan gwale ge ne digi zi ya, i obe ma te da ne kwarra go, i sat katugum ge ne na dir ma, ne tyare na oyo̰r jiya̰l ma ya go to’a?» 20 Ɓase ma pet, naa sonmo ma ne naa zaab ma, nama ge a ne jya̰ fare mbe ma no, Irmiya gwan ne nama janna go: 21 «Dukan ge aŋ ne aŋ bá ma, ne aŋ gan ma, ne aŋ naa ga̰l ge temel ma, ne ɓase ma pet ne tí nama ge suwal ma ge Yuda ne go, ne viya̰ ge Ursalima ne go ma, aŋ dwat go Bage ɗiŋnedin dwat nama pal to, ko be koy nama ne na laar zi to ɗaa? 22 Ago aŋ kaŋ kerra ge sone ma, ne ge seŋgre ma mbya Bage ɗiŋnedin sḛ, da ne pe no, aŋ suwal burmi uzi no, gá ya babur no, kaŋ senna, ge ndu ne gwan kat na go to, dimma ne aŋ ne kwar na ma̰ ne se no go. 23 Yál mbe dé ya aŋ pal ma̰ no, ne da pe, aŋ ti dukan ma hon dok ge ɗogle ma, aŋ ke ya̰l Bage ɗiŋnedin ndwara se, aŋ be za̰ Bage ɗiŋnedin wak to, aŋ be ke mborra na eya ma, ne na wak honna ma, ne na njaŋgeya ma pal to.»

24 Irmiya gwan jan ɓase ma ne naa zaab ma pet go: «Yuda ma, aŋ ge ne suwal Masar diŋ ma pet, zá̰ me fare ge Bage ɗiŋnedin ne. 25 Bage ɗiŋnedin, Bage naa ge mbal pore ma ne, Dok ge Israyela ne jan go: Aŋ ne aŋ gwale ma, aŋ ndage ne aŋ wak zi janna go, aŋ mbo koy wak tuli ge aŋ ne ke ne sḭḭm gan gwale ge ne digi zi ya, aŋ mbo ka til dukan ma ne tyare oyo̰r jiya̰l ma hon na. Koy me wak tuli ge aŋ ne ke cemet. Ke me dimma ne aŋ ne ke wak tuli go no tem. 26 Ne da pe no ɗe, Yuda ma, aŋ ge ne ka ne suwal Masar go ma pet, zá̰ me fare ge Bage ɗiŋnedin ne jan: Ndi, mbi guni tene ne dḭl ge mbi ne ge ɓaŋlaŋ: Ge suwal Masar go pet, ndu a̰me ɗu ne Yuda ma buwal zi, mbo gwan tol mbi dḭl ne na wak zi janna go: ‹Ne dḭl ge Bageyal Bage ɗiŋnedin ge ndwara ne zi,› to bat. 27 Mbi mbo saŋge mbi ndwara ya nama pal, a be ne ke nama kwaɗa pe to, amma ne ke nama yál pe. Yuda ma ge ne suwal Masar go ma pet, pore, ko kyamal mbo hun nama, ɗiŋ pur nama pe uzi kucup. 28 Naa ge ŋgeɗo, ge a ne mbo ɓurra ne pore zi ya ma, a mbo gwan ne Masar ya mbo ya suwal Yuda go. Go no Yuda ma, ge ne mbo gá ya ne ndwara ma, a mbo kwar go, ko na mbi fare janna ma, ko ge aŋ ne ma wak wi ne de. 29 Ndi, kaŋ ŋgayya no, ka̰l ge Bage ɗiŋnedin ne, ge ne mbo é aŋ kwarra go, mbi saŋge mbi ndwara ja aŋ pal swaga mbe no go. Aŋ mbo kwa go fare janna ge mbi ne jya̰ go mbi mbo ke aŋ yál, mbi mbo wi na wak ŋgat no: 30 Bage ɗiŋnedin jan go: Ndi, mbi mbo ɓyan Faraon Hofra gan ge Masar ne ge na naa ge ho̰l ma tok go, naa ge a ne ɓyare hun na ma tok go, dimma ne mbi ne ɓya̰ Sedekiyas gan ge Yuda ne ge na ndu ge ho̰l Nebukadnezar gan ge Babilon ne, na ge ne ɓyare na hunna tok go go.»