Irmiya gwan mbo kat Gedaliya ta suwal Mispa ya
40
1 Swaga ge Nebuzaradan ga̰l ge naa ge koy gan ma ne ne ya̰ Irmiya ne suwal Rama ya, Bage ɗiŋnedin jan Irmiya fare. Swaga ge a ne wa̰ Irmiya go, a ká̰ na zúl dagre ne naa ge a ne pá nama ne Ursalima ma ne Yuda suwal ge may ma ya ndwara gene nama mbo Babilon ya. 2 Ga̰l ge naa ge koy gan ma ne wan Irmiya jan na go: «Bage ɗiŋnedin, Dok ge mo ne waage go, yál mbe no mbo det suwal mbe no pal. 3 Se no, kaŋ mbe ma dé ya kerra dimma ne Bage ɗiŋnedin ne waage go. Ago aŋ ke sone Bage ɗiŋnedin ndwara se, aŋ be zá̰ na wak to, da ne pe, yál mbe ma dé ya aŋ pal no. 4 Ndi ma̰ no, mbi fage zúl ma ya ne mo tok ma zi uzi. Kadɗa mo ɓyare go nee mbo Babilon ya, mbo ya, nee mbo, mbi ma̰ dol mbi ndwara mo pal. Amma kadɗa mo ɓyare kare mbi pe mbo Babilon ya to, gá go go. Ndi mo swaga ge mo ne ɓyare mbo go, mo mbo». 5 Ne jo̰ Irmiya ke dṵṵl be ge gwan ne na fare janna pal, Nebukadnezar jan na go: «Gwa̰ Gedaliya ge Ahikam vya, Chafan báŋ ge gan ge Babilon ne ne é na suwal Yuda pal ta ya. Mo kat na ta, ge mo naa ma buwal zi. Kadɗa to, ndi mo swaga ge mo ne ɓyare mbo go, mo mbo.» Uwale, ga̰l ge naa ge koy gan ma ne hon na kaŋ zam ma, ne bobo ma, ya̰ na mborra. 6 Irmiya gwan Gedaliya vya ta suwal Mispa ya, gá katɗa ge na naa ge ne gá suwal diŋ ma buwal zi.Koteya ge Yuda ma ne ya Gedaliya ta
7 Swaga ge ga̰l ge asagar ma ne ma, ne bama asagar ma pet, ge a ne ɓarse se ma, a ne za̰ go gan ge Babilon ne é Gedaliya ge Ahikam vya ya gan suwal pal, ge naa sonmo ma, ne naa zaab, ne naa jabso ge a ne ya̰ nama be palla mbo Babilon ya to ma pal ɗe, 8 a mbo ɓol Gedaliya ge suwal Mispa ya. A Ismayel ge Netaniya vya, Yohanan ge Yonatan vya, ne Kereya vya ma, ne Seraya ge Tanhumet vya, ne Efay ndu ge suwal Netofa ne vya ma, ne Yezaniya ndu ge suwal Maaka ne, ɓanna ne bama asagar ma. 9 Gedaliya ge Ahikam vya, Chafan báŋ guni tene nama ndwara se pet go: «Sya me vo ge gwan ne aŋ pala Kaldeya ma pe se to, ka me suwal diŋ, gwa̰ me aŋ pala gan ge Babilon ne pe se. Mbo kat kwaɗa ne aŋ pe. 10 Mbi ɗe, mbi gá katɗa ge suwal Mispa go, ndwara ke temel hon Kaldeya ma, nama ge ne mbo ya ɓol nee ma. Aŋ ge may ma ɗe, gwa̰ me mbo katɗa aŋ suwal ma go, kote me aŋ oyo̰r ma, pe me aŋ uwara ma, ke me num ma, kote me nama digi aŋ pal.»
11 Uwale, Yuda ma pet ge a ne sya mbo woy ta ge suwal Mowab ya ma, ne Ammon ma suwal ma ya ma, ne suwal Edom ya ma, ne suwal ge ne nama ziyar go ge may ma ya ma, a zá̰ go gan ge Babilon ne ya̰ naa a̰me ma mbut ya suwal Yuda go, na é Gedaliya ge Ahikam vya, Chafan báŋ ya gan suwal Yuda pal me, 12 a gwan ne bama swaga ma ge bama ne ɓarse se ma ya Yuda go, ge Gedaliya ta suwal Mispa go. A ɓol oyo̰r ma ne uwara tolla gḛ ge be to.
Siya ge Gedaliya ne
13 Dam a̰me ɗu, Yohanan ge Kereya vya ma ne ga̰l ge asagar ma ne ge may ma ge ne gá ful zi ya ma, a mbo ya Gedaliya ta Mispa go. 14 A ele na go: «Mo da ne kwarra go Baalis, gan ge Ammon ma ne é Ismayel ge Netaniya vya go na hṵ mo ɗaa? Gedaliya ge Ahikam vya vin nama fare mbe to.» 15 Yohanan ge Kereya vya mbo ɓol Gedaliya ge suwal Mispa ya sèlè, jan na go: «Ya̰ mbi mbo hun Ismayel ge Netaniya vya. Ndu a̰me kat ne kwarra ma̰ to. Mo ya̰ na hun mo gyana baŋ ɗar ɗaa? Katɗa ma̰ hun mo ya, Yuda ge a ne kote ya mo ta ma, a ma̰ gwan ɓarse se, naa ge mbut ma ge a ne gá ne suwal Yuda go ma pe mbo burmi uzi.» 16 Gedaliya ge Ahikam vya jan Yohanan ge Kereya vya go: «Ke kaŋ ge go to, fare ge mo ne jan Ismayel pal mbe no, a hale.»