Irmiya 36

Yoyakim til maktub ge Irmiya ne uzi

1 Swaga ge Yoyakim ge Yozias vya ne ke del anda na gan zi, suwal Yuda pal ɗe, Bage ɗiŋnedin jan Irmiya go: 2 Hé maktub, mo njaŋge fare ge mbi ne jya̰ mo nama ge Israyela ma ne Yuda, ne pehir ge ɗogle ma pal pet na zi, ne dam ge mbi ne é pe jan mo fare ne zaman ge Yozias ne ya day ɗiŋ ma̰ no. 3 Swaga ge naa ge Yuda ne ma, ne mbo zá̰ fare ge yál ge mbi ne vḭ tene ke nama na mbe ma ya, tamekyala ndu ge daage mbo saŋge ya se ne na kaŋ kerra ge sone ma go, go no, mbi mbo pore nama ya̰l ma ne nama sone ma.

4 Irmiya tol Baruk ge Neriya vya, jan na fare ge Bage ɗiŋnedin ne jya̰ na ma mwaɗak, Baruk njaŋge na fare mbe ma maktub go. 5 Go̰r go, Irmiya hon Baruk na wak go: «A tele mbi tele, mbi day mbo zok ge Bage ɗiŋnedin ne zi ya to. 6 Mo sḛ mbo ne, ne mbo ndwara, mo ba mbo isi maktub ge mbi ne jya̰ mo fare ma ɗo, mo njaŋge nama no, ge ɓase ma ta, zok ge Bage ɗiŋnedin zi, dam asiyam go. Mo mbo isi na uwale ge naa ge Yuda ma, nama ge a ne mbo ne bama suwal ma ya ma ta pet me. 7 Tamekyala, a mbo á ta kaɗe Bage ɗiŋnedin, a ya̰ bama kaŋ kerra ge ne na viya̰ go to ma. Ago Bage ɗiŋnedin da ne tiiɗiya, ne laar hotɗa ge be to na ɓase ma pal.»

8 Baruk ge Neriya vya ke wak honna ge anabi Irmiya ne pal tem, mbo ne maktub ge fare ge Bage ɗiŋnedin ne mbo isiya ge zok ge Bage ɗiŋnedin ne zi.

9 Swaga ge Yoyakim ge Yozias vya, gan ge Yuda ne, ne ke del anuwa̰y na gan zi go, ge saba lamaɗo ge del ne go, a hon wak ne asiyam kerra pe Bage ɗiŋnedin ndwara se, ne naa ge ne Ursalima diŋ ma pe pet, ne naa ge ne mbo ne suwal ge Yuda ne ma ya Ursalima diŋ ma pe pet me. 10 Baruk mbo isi fare ge Irmiya ne ma ge na ne njaŋge nama ne maktub zi, ge ɓase ma togor zi, zok ge Bage ɗiŋnedin ne zi. Na sḛ ká Gemariya ge Chafan vya, bage njaŋgeya zok zi, ago zok mbe ka ge zok ge Bage ɗiŋnedin ne yapul ge ga̰l go, viya̰ wak ge giya̰l ziyar go gwa.

11 Mika ge Gemariya vya, ge Chafan báŋ za̰ fare ge Bage ɗiŋnedin ne ma pet ge ne maktub mbe zi ma, 12 mbo gan diŋ ya, wat zok ge bage njaŋgeya ne zi, zok ge na naa ga̰l ma ne kote na zi go, ɓol bage njaŋgeya Elichama, ne Delaya ge Chemaya vya, ne Elnatan ge Akbor vya, ne Gemariya ge Chafan vya, ne Sedekiyas ge Hananiya vya, ne na naa ga̰l ge may ma mwaɗak. 13 Mika wan nama fare ge na ne za̰ ma pe mwaɗak, swaga ge Baruk ne ka isi maktub hon ɓase ma go.

14 Naa ga̰l ge temel ma teme Yehudi ge Netaniya vya, ge Chelemiya báŋ, ge Kuchi báŋ kon mbo tol Baruk, na mbo ne maktub ge na ne isi ɓase ma na ya na tok go. Baruk ge Neriya vya he maktub, mbo ya nama ta. 15 Nama sḛ ma, jan na go: «Ka seɗe, isi i maktub mbe.» Baruk isi nama maktub mbe. 16 Swaga ge naa ga̰l ge temel ma ne za̰ fare mbe ma, nama sḛ wan vo mwaɗak, a jan Baruk go: «A ŋgat go, i wa̰ gan fare mbe ma pe.»

17 A ele Baruk go: «Jya̰ i gale! Ka jan mo fare mbe ma jan ɗo, mo ka njaŋge nama no ɗaa?» 18 Baruk gwan ne nama jan go: «Ka jan mbi fare ma jan ne wak, mbi ka njaŋge nama ne aliŋ maktub zi no.»

19 Naa ga̰l ge temel ma jan Baruk go: «Mbo ɓol Irmiya, aŋ woy ta, ndu a̰me na kwa swaga ge aŋ ne woy ta go to.» 20 Go̰r go, a mbo ɓol gan na yapul ya, a ya̰ maktub ge zok ge bage njaŋgeya Elichama ne zi, a wan gan fare mbe ma pe mwaɗak.

21 Gan teme Yehudi na mbo ɓyare na maktub mbe ne zok ge bage njaŋgeya Elichama ne zi ya. Yehudi mbo her na ya, isi na gan ndwara se, ne naa ga̰l ge temel ma ge a ne mḛ ver gan se ma ndwara se mwaɗak me. 22 Ne jo̰ a ka saba ge lamaɗo go ɗe, gan ka na zok ge swaga ne ke iyalam zi, ol ka sorra na ziyar go. 23 Swaga ge Yehudi ne isi maktub pul ataa ko anda go ɗe, gan ka kun na ne na wa̰le, ka dol na ol zi. Ka ke mbe go ɗiŋ á maktub mbe ol zi mwaɗak. 24 Gan ma ne na naa ga̰l ge temel ma za̰ fare ge maktub mbe ne ma mwaɗak, amma vo be wan nama, ko a wan kḭḭmi ne na pe to bat. 25 Ne jo̰ Elnatan ma ne Delaya ma ne Gemariya ma, a kaɗe gan ne á ta go na tí maktub mbe to puy ɗe, gan mbe be zá̰ nama to. 26 Gan hon na vya Yerameel ma ne Seraya ge Azriyel vya, ma ne Chelemiya ge Abdeel vya ma na wak go, nama wa̰ na bage njaŋgeya Baruk ma ne anabi Irmiya. Amma Bage ɗiŋnedin woy nama.

27 Go̰r swaga ge gan ne tí maktub ge Baruk ne njaŋge na fare janna ge Irmiya ne pal go ɗe, Bage ɗiŋnedin gwan jan Irmiya go: 28 «Hé maktub ge ɗogle, mo njaŋge fare ma ge ne ka maktub ge zaŋgal ge Yoyakim, gan ge Yuda ne ne tí na uzi mbe ma na go mwaɗak. 29 Jya̰ Yoyakim gan ge Yuda ne go, Bage ɗiŋnedin jan go: Irmiya njaŋge go, gan ge Babilon ne mbo mbo ya, mbo burmi suwal mbe no uzi, mbo hun naa dasana ma ne kavaar ma uzi kucup me. Mo Yoyakim, mo mḛre Irmiya, mo tí maktub mbe uzi no. 30 Ne no pe, Bage ɗiŋnedin jan Yoyakim gan ge Yuda ne go: ‹Mo hir a̰me mbo gwan kat hool gan ge Dawda ne pal to bat. Mo siya mbo gá dolla gyala ndwara go war, ne iyalam ndwara go ɗaal zi me. 31 Mbi mbo ke ho̰l ne mo, ne mo hir ma, ne mo naa ga̰l ge temel ma, ne sone ge aŋ ne ke ma pe. Mbi mbo zwal yál ge mbi ne waage aŋ na, ge aŋ sḛ ma ne ndi na solom ya aŋ pal, ne naa ge ne Ursalima diŋ ma pal, ne naa ge ne suwal Yuda go ma pal pet me.›»

32 Go no, Irmiya her maktub ge ɗogle hon bage njaŋgeya Baruk ge Neriya vya, na sḛ gwan njaŋge fare ge Irmiya ne jan na ma mwaɗak maktub mbe zi. Njaŋge fare ge ne ka maktub ge gan Yoyakim ne ti na uzi mbe ma na zi mwaɗak, gwan njaŋge fare ge dimma ne ge zaŋgal mbe go ma na wak go ta uwale.