Wak tuli ge ɗogle ma ne zurra ge Israyela vya ma ne pe
33
1 Swaga ge Irmiya ne ka daŋgay zi gan yapul go, Bage ɗiŋnedin gwan jan na fare ge ndwara azi go: 2 «Bage ɗiŋnedin, a Bage ne ke kaŋ ma ne, ge ne nṵsi nama ne, é nama nama swaga ma go, na dḭl Bage ɗiŋnedin: 3 Tó mbi, mbi mbo gwan ne mo vinna, mbi mbo ben mo kaŋ ɗimil ge ɓaŋlaŋ ge mo ne kwar nama to ma pe zum. 4 Bage ɗiŋnedin, Dok ge Israyela ne, jan fare zok ge ne suwal mbe no diŋ ma, ne zok ge gan ge suwal Yuda ne ma, nama ge a ne gú nama se ndwara pili ta ne naa ge ho̰l ma swaga torra ma ne nama kasagar ma pe ma pal. 5 Mbal pore ne kaldeya ma a yál ke ta ne baŋ, na no é aŋ wi aŋ suwal ne siya ma, nama ge mbi ne mbo hun nama ya pore juliliya ne laar ol ge mbi ne zi ma. Ne sone ge suwal mbe ne ke ma pe, mbi her mbi ndwara ya ne nama pal uzi. 6 Amma mbi mbo é suwal mbe ɓol zonna, mbi mbo zon na, mbi mbo hon naa swaga katɗa ge kwaɗa ne ge halas. 7 Mbi mbo gwan ne suwal Yuda ma ne Israyela naa ge paal ma ya, mbi mbo gwan sin nama digi, dimma ne ge dḛ zaŋgal go. 8 Mbi mbo hat nama harcal ne ya̰l ge a ne ke ne mbi ma go pet, mbi mbo pore nama sone ma, ne wak za̰ya to ge nama ne ma pet 9 Go no, mbi mbo gá uware tene ne suwal Ursalima dḭl. Na sḛ mbo kat kaŋ ge hormo, ne siŋli ge naa ge ne suwar pal ma pet ndwara zi. Swaga ge a ne mbo za̰ kwaɗa ge mbi ne mbo ke na ya, a mbo ndat, nama sḛ mbo wan vo ne kaŋ kwaɗa ma ge mbi ne ho̰ nama ma pe.»10 Bage ɗiŋnedin jan go: «Aŋ ge Yuda ma, aŋ jan go aŋ suwal burmi ya go, naa dasana ma, ko kavaar ma puy, nama be ge gwan gá ne go to. A fareba, ma̰ ne se no, suwal ge Yuda ne ma ne viya̰ pul ge Ursalima ne ma gá ya suli, naa dasana ma ne kavaar ma ne go to. Ago ge suwal mbe go, naa mbo gwan za̰ 11 ko̰r vḛso ma, ne laar saal kerra ma, ne kaŋ mballa ge ɗame gwale giya̰l ma, ne kaŋ mballa uwareya ge naa ne go: ‹Uware me Bage ɗiŋnedin, Bage naa ge mbal pore ma ne, ago Bage ɗiŋnedin kwaɗa, kwar a̰se ge na ne ɗiŋnedin.› Ne kaŋ mballa ma ge naa ge ne mbo ya zok ge Bage ɗiŋnedin ne zi ke tuwaleya ma. Ago mbi mbo gwan ne naa ge paal ge suwal mbe ne ma ya, mbi mbo gwan ne nama ya nama byalam go dimma ne ge dḛ zaŋgal go, Bage ɗiŋnedin jan ne.»
12 Bage ɗiŋnedin, Bage naa ge mbal pore ma ne jan go: «Ge swaga ge burmiya, ge naa dasana ma, ko kavaar ma ne na go to mbe no go, ne na suwal ma go pet, ɗyagarta ge naa ge koy gii ma ne mbo gwan kat nama go, a mbo ka é bama gii ma fí ɗigliya nama zi. 13 Ge suwal ge ne le njal digi ma go, ne suwal ge ne le babur pul go ma go, ne suwal ge ne le mbii go ma go, ne suwal ge Bayami ne ma go, ne suwal ge ne Ursalima ziyar go ma go, ne suwal ge Yuda ne ma go pet, naa ge koy gii ma mbo gwan ɓol gii ge koyya ma, a mbo isi nama, Bage ɗiŋnedin jan ne.
14 Ndi, dam ma mbo ya go, ka̰l ge Bage ɗiŋnedin ne, mbi mbo wi wak tuli ge mbi ne ke ne naa ge Israyela ma ne ge Yuda ma pe. 15 Swaga ge dam mbe ma ne mbo mbo ja, mbi mbo é hir ge dosol tolla ne Dawda hir zi ya, na sḛ mbo ke kaŋ ge jwap ma ne ge dosol ge suwal diŋ. 16 Dam mbe ma pul zi, suwal Yuda mbo ɓol zurra, Ursalima mbo kat swaga halas me. Ndi, dḭl ge a ne mbo hon Ursalima ya: ‹Bage ɗiŋnedin i dosol ne!›»
17 Bage ɗiŋnedin jan go: «Dawda mbo woɗege ne vya ge kat hool muluk ge Israyela ne pal to. 18 Uwale, Levi vya ma, naa ge ke tuwaleya ma mbo woɗege ne vya ge er nama ke tuwaleya ma, ne til dukan ma ɗaɗak mbi ndwara se to bat.»
19 Bage ɗiŋnedin gwan jan Irmiya go: 20 «Bage ɗiŋnedin jan go: kadɗa aŋ da ne pool gul eya ge mbi ne ge mbi é gyala ma ne ɗaal, aŋ er nama swaga ma ge a te ya mbo ya go tem ma, 21 go no me, aŋ da ne pool gul wak tuli ge mbi ne ke ne mbi dore Dawda, ge na sḛ gwan ɓol vya ge kat na hool gan pal to. Uwale, ne wak tuli ge mbi ne ke ne Levi vya ma, naa ge ke tuwaleya ma, nama ge a ne ke mbi temel mo̰r ma. 22 Mbi mbo zuli hir ge mbi dore Dawda ne se ceɗed, ne hir ge Levi vya ma, naa ge ne ke mbi temel mo̰r ma ne se ceɗed me, dimma ne guwa̰r ma ge naa ne mbyat ge isi nama to ma go, ko ne kafeɗem ge ne maŋgaɗam ga̰l yuwam wak go ge ndu ne mbyat ge ŋgay nama to go.»
23 Bage ɗiŋnedin gwan jan Irmiya go: 24 «Mo zá̰ fare ge naa ne jan ne go to’a? A jan go, hir ge azi ge mbi ne tá nama mbe ma, mbi dol nama ya uzi. Da ne pe no, a ndil no go, nama be hir a̰me ne to, a sen nama no.»
25 Bage ɗiŋnedin jan go: «Te go mbi be hon gyala ma ne ɗaal mbi eya ma to, ko mbi be hon digi ma ne suwar mbi eya ma to, 26 mbi te ya dol hir ge Yakub ne ma, ne hir ge mbi ne dore Dawda ne ma uzi, ko mbi te ya kuri go mbi gwan her na vya ke muluk ge hir ge Abraham ne, ne ge Isaku ne, ne ge Yakub ne pal to. Ago mbi mbo gwan ne nama naa ge paal ma ya, mbi laar mbo gwan wan nama.»