Maktub ge Irmiya ne njaŋge hon naa ge páál ma
29
1 No a maktub ge Irmiya ne njaŋge na ne Ursalima diŋ ndwara teme mbo hon naa ga̰l ma ne naa ge ke tuwaleya ma, ne anabi ma, ne ɓase ma pet ge Nebukadnezar ne pá nama ne Ursalima go mbo suwal Babilon ya ne. 2 Teme maktub mbe go̰r ge gan Yekoniya, ma ne gan ná, ma ne naa ga̰l ge temel ma, ne naa ga̰l ge Yuda ma ne Ursalima ne ma, ne naa ge ke temel ɗalla ma, ne naa ge suwa ma, a ne ɗage ne Ursalima diŋ mbo ya go. 3 Teme maktub mbe ge Eleyasa ge Chafan vya ma ne Gemariya ge Hilkiya vya tok go, swaga ge Sedekiyas, gan ge Yuda ne ne teme nama mbo suwal Babilon ge Nebukadnezar gan ge Babilon ne ta ya go. Maktub mbe fare janna ma go:4 «Bage ɗiŋnedin, Bage naa ge mbal pore ma ne, Dok ge Israyela ne jan naa ge na ne é go a pá nama ne suwal Ursalima go mbo Babilon ya ma go: 5 Sḭ me zok ma, ka me nama zi, ɗḭ me uwara ma, zá me nama tolla ma. 6 Sá̰ me gwale ma, tó me vya ma, Sá̰ me gwale ma hon aŋ vya ge sonmo ma, ho̰ me aŋ vya ge zaab ma kat yàl me, ne da pe nama tó vya ma se, zuli me ta se swaga mbe go, yá̰ me aŋ pehir dageya to. 7 Ke me viya̰ go suwal ge Bage ɗiŋnedin ne teme aŋ na ya mbe, na ka kwaɗa, kaɗe me Bage ɗiŋnedin ne na pe, ne da pe kat kwaɗa ge aŋ ne mbo da ne kwaɗa ge suwal mbe ne ta.
8 Bage ɗiŋnedin, Dok ge Israyela ne jan go: ‹Ya̰ me aŋ anabi ma ge a ne ka ne aŋ buwal zi ma ne aŋ naa ge é waɗal ma ya̰me aŋ to, é me aŋ haŋgal ma ge kiya̰r ge ne jan aŋ ma pal to. 9 Ago nama fare ge a ne waage aŋ ne mbi dḭl ma, a fare ge hale ma ne, mbi mbe teme nama ya ne to. Ka̰l ge Bage ɗiŋnedin ne.› 10 Ndi, Bage ɗiŋnedin jan go: ‹Swaga ge del wara ɓyalar ne mbo mbyatɗa suwal Babilon pal, mbi mbo dwat ne aŋ, mbi wi mbi wak tuli ge mbi ne ke ne aŋ pe, mbi mbo gwan ne aŋ ya aŋ swaga katɗa go. 11 Ago mbi kwa kaŋ ge mbi ne ke ne aŋ pe kwa, ka̰l ge Bage ɗiŋnedin ne. A be kaŋ ge sone ne to, amma a ge kwaɗa ne, ne da pe, ne dam ge zḛ ge ma pe, mbi hon aŋ kaŋ ge aŋ ne é aŋ jobreya ne na pala. 12 Go no, swaga ge aŋ ne mbo tol mbi ya, aŋ mbo ɓol viya̰ mborra, swaga ge aŋ mbo kaɗe mbi ya, mbi mbo za̰ aŋ. 13 Aŋ mbo ɓyare mbi pe, aŋ mbo ɓol mbi, ago aŋ mbo ɓyare mbi pe da ne dulwak ɗu, 14 mbi mbo ya̰ tene aŋ ɓol mbi, ka̰l ge Bage ɗiŋnedin ne. Mbi mbo gwan ne aŋ naa ge páál ma ya, mbi mbo kote aŋ ne suwal ge mbi ne ɓarse aŋ nama ya ma go ma ya digi pet, ka̰l ge Bage ɗiŋnedin ne. Mbi mbo gwan ne aŋ ya ge aŋ suwal go, na ge mbi ne é naa pál aŋ ne na go.›
15 Né jo̰ aŋ jan go: ‹Bage ɗiŋnedin ho̰ i anabi ma ne suwal Babilon ya ne ɗe,› 16 Zá̰ me fare ge Bage ɗiŋnedin ne jan gan ge ne ka ne hool gan ge Dawda ne pal, ma ne ɓase ge ne gá katɗa ne Ursalima diŋ ma, ndwara go nama ge a ne pá nama to ma pet. 17 Bage ɗiŋnedin, Bage naa ge mbal pore ma ne jan go: ‹Mbi mbo teme pore mballa ma, ne baktar ma, ne mbogom ma ya nama pal, mbi mbo saŋge nama dimma ne fere hubul ge ndu ne day zam nama to, ne sone ge nama pe go. 18 Mbi mbo yan nama pe ne pore mballa ma, ne baktar ma, ne mbogom ma, go no naa ge ne suwar pal ma pet, swaga ge a ne mbo kwar nama ya, vo mbo wan nama. Pehir ge ɗogle ma, nama ge mbi ne mbo é nama dḛ ya pál nama ma, a mbo ka vḛne wak ta pal, ko ne sal ta ma, ne cot ta ma, ne jan ta fare asar ma ne nama dḭl. 19 Ne da pe, a be zá̰ mbi fare janna ma to, ka̰l ge Bage ɗiŋnedin ne. Ne jo̰ mbi ka teme mbi dore anabi ma ya nama ta ɗaɗak puy ɗe, a be zá̰ nama to, ka̰l ge Bage ɗiŋnedin ne.› 20 Aŋ ge mbi ne é go, a pá aŋ ne Ursalima go mbo Babilon ya ma, za̰ me fare janna ge Bage ɗiŋnedin ne.
21 Za̰ me fare ge Bage ɗiŋnedin, Bage naa ge mbal pore ma ne, Dok ge Israyela ne ne jan Achab ge Kaleya vya ma ne Sedekiyas ge Maaseya vya pal, nama ge a ne waage fare ne mbi dḭl hale pal ma. Mbi mbo ɓyan nama ge Nebukadnezar, gan ge Babilon ne tok go, na sḛ mbo hun nama ge aŋ ndwara go. 22 Naa ge Yuda ma, nama ge a ne pá nama mbo Babilon ya ma pet, a mbo ga ke fare sḭ ne nama ta janna go: ‹Ya̰ Bage ɗiŋnedin na mḛre mo dimma ne Sedekiyas ma ne Achab ge gan ge Babilon ne ne swa nama ol zi go.› 23 Kaŋ mbe no mbo ɓol nama, ne da pe, a ke kaŋ ge sone kakatak ge suwal Israyela go. Ago a ka fi da ne bama kaam ma gwale ma, ko ne jo̰, mbi be hon nama mbi wak ne to puy ɗe, a ka waage fare ne mbi dḭl hale pal. Mbi da ne na kwarra, mbi sayda, ka̰l ge Bage ɗiŋnedin ne.»
Maktub ge Chemaya ne, ne fare gwanna ge Irmiya ne Chemaya fare janna pal
24 Jya̰ Chemaya, ndu ge suwal Nehelam ne go. 25 Bage ɗiŋnedin, Bage naa ge mbal pore ma ne, Dok ge Israyela ne jan go: «Mo teme maktub ne suwal Babilon ya ne mo dḭl hon Sofoniya ge bage tuwaleya Maaseya vya, ne naa ge ke tuwaleya ma pet, ne naa ge ne gá ne Ursalima diŋ ma pet janna go: 26 Bage ɗiŋnedin é mo bage tuwaleya Yehoyada byalam go, ndwara go, mo dó mo ndwara ndil naa ge a ne kare fare ge dale ma, nama ge a ne tol ta go bama anabi ma ne ma pal, go no, mo ba ka vwal nama ne zul, mo ba ka fet nama se. 27 Se no ɗe, mo te mḛre Irmiya, ndu ge suwal Anatot ne, na ge ne tol tene go na anabi ne ne aŋ buwal zi to kyaɗa ɗaa? 28 A mbe go no, na sḛ teme i maktub ge Babilon ya janna go: Aŋ kat mo̰r zi kaal gale. Sḭ me zok ma, ká me nama zi, ɗḭ me uwara ma, zá me nama tolla ma. 29 Bage tuwaleya Sofoniya isi anabi Irmiya maktub mbe.»
30 Bage ɗiŋnedin jan Irmiya go: 31 «Dó temel mbo jan naa ge ne paal zi ya ma pet go, Bage ɗiŋnedin jan fare Chemaya, ndu ge suwal Nehelam ne pal go: Fare ge Chemaya ne waage aŋ, a be mbi teme na ya ne to, é aŋ, aŋ é aŋ jobreya ma fare ge hale ma pal. 32 Ne jo̰ ke mbe go, mbi Bage ɗiŋnedin, mbi jan go: Mbi mbo mḛre Chemaya, ndu ge suwal Nehelam ne, ma ne na hir ma mwaɗak. Ndu a̰me ɗu ne na hir ma buwal zi mbo kat ɓase mbe ma no buwal zi ge kwar kwaɗa ge mbi ne mbo ke mbi ɓase ma ya to bat, ka̰l ge Bage ɗiŋnedin ne. Ago na fare janna ma é naa ke ho̰l ne Bage ɗiŋnedin.»