Pachehur vwal Irmiya uwara ta
20
1 Swaga ge Bage Tuwaleya Pachehur ge Immer vya, ga̰l ge naa ge ndil kaŋ ge ne zok ge Bage ɗiŋnedin ne zi ma ne, ne za̰ Irmiya jan fare mbe ma no ɗe, 2 Pachehur iyal anabi Irmiya, wan na, vwal na ge uwara ge ne viya̰ wak ga̰l ge Bayami ne ziyar go tá, na ge naa ne her na mbo zok ge Bage ɗiŋnedin ne zi ya go. 3 Dam ge kwap ge go, Pachehur sá Irmiya digi ne uwara ta, Irmiya jan na go: «Bage ɗiŋnedin mbo gwan tol mo Pachehur to, a mbo ga tol mo ‹Magor-Misabib› ndwara go ‹vo swaga ma go pet›.4 Za̰ fare ge Bage ɗiŋnedin ne jan: Mbi mbo kan vo mo zi, ne aŋ ne mo kaam ma zi pet. Nama naa ge ho̰l ma mbo hun nama, mo mbo kwar nama ne mo ndwara. Mbi ɓyan suwal Yuda ya pet gan ge suwal Babilon ne tok go, mbo pál nama mbo suwal Babilon ya, mbo hun nama uzi ne kasagar. 5 Uwale, mbi ɓyan kaŋ gan ma pet ge suwal mbe ne ma ya ge nama naa ge ho̰l ma tok go, poseya ne nama kaŋ ɓolla ma, ne kaŋ kwaɗa ge gan ge Yuda ne ma pet, a mbo pál nama, a abe nama mbo suwal Babilon. 6 Mo, Pachehur, poseya ne naa ge ne mo yadiŋ ma pet, aŋ mbo mbo mo̰r zi. Swaga ge mo ne mbo detɗa Babilon ya, mo mbo su, a mbo mbul mo ya go me, poseya ne mo kaam ma ge mo ne waage nama fare ge hale ma.»
Yo̰re tene ge Irmiya ne
7 O! Bage ɗiŋnedin, mo lase mbi lase,
mbi ya̰ tene laseya no.
Mo wa̰ mbi ne pool,
mo waɗe mbi pal no.
Dam ma mwaɗak,
mbi ga ya kaŋ maam,
ne kaŋ cotɗa naa ta pet,
8 Ɗaɗak swaga ge mbi ne ɗage jan mo fare naa ta,
ago mbi tol swaga a sya mbi ko̰r,
a yál njotɗa ne njoyya ne.
Fare ge Bage ɗiŋnedin ne saŋge mbi ya kaŋ senna,
ne kaŋ maam dam ma mwaɗak.
9 Swaga ge mbi ne jan tene go:
«Mbi gwan dwat fare no pal to,
mbi gwan jan fare ne na dḭl to»,
mbi dulwak ka sat mbi sat
dimma ne ol ne til mbi ne go,
wat diŋ mbi kal wak ma zi.
Mbi lwage tene swaga wanna go,
mbi day ge wan tene to.
10 Mbi ka za̰ fare asar ma ne naa wak zi jan mbi.
A gá tol mbi go: Vo swaga ma go pet.
A gá jan go: Fú me na pe zum,
fú me nee na pe zum!
Mbi kaam ge i ne nama ne ka tuli ma pet,
a gá huli detɗa ge mbi ne ne huli.
A jan ta go: Tamekyala mbo ya̰ tene laseya,
go no nee mbo wan na, nee gele ta ne na.
11 Amma, mo Bage ɗiŋnedin,
mo pool waɗeya, mo dagre ne mbi.
Ne pe no, mbi naa ge ho̰l ma pet,
a mbo pugi detɗa,
a ne pool ge hal mbi pal to bat.
Saaso ge nama ne mbo kat ɗiŋnedin,
ndu mbo vyale na to bat.
12 Bage ɗiŋnedin, Bage naa ge mbal pore ma ne,
mo kugi ndu ge dosol kugi,
a mo hale dulwak ma ne dwatɗa ge naa dasana ma ne ne.
Mbi jobre geleya ge mo ne mbo gele
mbi ya ne mbi naa ge ho̰l ma.
Mbi yá̰ fare ge mbi ne ma ya mo tok go.
13 Siya̰le me Bage ɗiŋnedin!
Uware me Bage ɗiŋnedin!
Ago zur ndu ge woɗegeya ya go ne naa ge sone ma tok go.
14 Wak vḛneya na ka dam ge mbi ne tó go pal,
dam ge mbi ná ne sya na koo tol mbi go,
wak busu na ka dam mbe pal to.
15 Wak vḛneya na ka ndu ge ne mbo waage mbi bá fare,
é na ke laar saal go, a tó na vya son pal.
16 Ya̰ ndu mbe na saŋge dimma ca
ne suwal ma ge Bage ɗiŋnedin ne burmi nama
be ge kwa nama a̰se to go.
Cya̰wak pala, na za̰ lulu,
gyala pala me, na za̰ ko̰r pore.
17 Te go na ya̰ mbi suya mbi ná laar zi,
mbi gale ne be ge tolla ya se,
mbi ná te ya kat mbi taal siya,
te ya gá in mbi emel ɗiŋnedin.
18 Mbi te tó ne mbi ná laar zi ya se kyaɗa ɗaa?
Mbi tó ya da ne yál njotɗa ma ne
wak nonna ma pe ɗeŋgo,
ko ne á dam ma ge mbi ne ma saaso zi ɗaa?