Hormo ge Ursalima ge giya̰l ne
62
1 Ne Siyona pe, mbi mbo zane to bat,ne Ursalima pe, mbi mbo ya̰ tene ɗigliya to bat,
ɗiŋ dosol ge na ne dyan ne swaga ko̰yya go ɓya,
máya ge na ne zen dimma ne gil ne ɗaabe ol go ɓya.
2 Pehir ge ɗogle ma mbo kwa dosol ge mo ne,
gan ma mwaɗak, a mbo kwa hormo ge mo ne.
A mbo tol mo dḭl ge giya̰l
ge Bage ɗiŋnedin ne mbo syal mo na ya.
3 Mo mbo kat balme ge serra cicim ge Bage ɗiŋnedin tok pul zi,
kadmul ge gan ma ne ge Dok ge mo ne tok pul zi.
4 A mbo gwan tol mo: «Baŋneya», to.
a mbo gwan tol mo suwal: «Kḭḭmi», to.
Amma a mbo tol mo go: «Laar wanna»
a mbo tol mo suwal go: «Gwale ge sanna.»
Ago Bage ɗiŋnedin mbo ɓol tuli mo zi,
suwal ge mo ne mbo san obe.
5 Dimma ne vya dore ne san vya kale go,
mo vya ma mbo gwan kat mo suwal go.
Dimma ne gwale giya̰l ne ke na obe sḛ tuli go,
mo mbo ke Dok ge mo ne sḛ tuli me.
6 O Ursalima, ge mo gulum ma pala digi,
mbi é naa ge koyya ma ya go.
Ɗaal ne gyala, a mbo zane to bat.
«Aŋ ge ne vot Bage ɗiŋnedin pala ne Ursalima pe ma,
ɗigli me ta to bat.
7 Ya̰ me na viya̰ ɗigli tene to,
ɗiŋ na gwan ne Ursalima na byalam go gale ɓya,
na hat Ursalima kaŋ uwareya suwar pal gale ɓya.»
8 Bage ɗiŋnedin guni tene ne pool ge na ne janna go:
«Mbi mbo gwan ya̰ mo naa ge ho̰l ma zam mo gḛme
ge mo ne ga na ne ṵwa̰se ge mo ne to bat,
mbi mbo gwan ya̰ gwasal ma njot mo oyo̰r jiya̰l
ge giya̰l ge mo ne ɓó na ne yál to bat.
9 Amma nama ge a ne mbo syat bama gḛme ma ya,
a mbo zam nama, a mbo uware Bage ɗiŋnedin.
Nama ge a ne mbo yel bama oyo̰r ma ya,
a mbo njot bama oyo̰r jiya̰l ma ge mbi zok ge mbegeya yapul go.»
10 Kale me, kale me zok wak pala zum,
Cé me viya̰ ne mbi ɓase ma pe,
ɗaɗe me, ɗaɗe me viya̰ pul,
abe me njal ma ne viya̰ go uzi,
ɗḭ me piripiri digi ne ɓase ma pe.
11 Ndi, naa mbo za̰ ka̰l ge Bage ɗiŋnedin ne
ɗiŋ mbo suwar pe ndegɗe ya, janna go:
Jya̰ me naa ge ne Siyona go ma go:
«Ndi, mo bage máya yan ja,
mbo ya da ne na vaswa na tok go,
ne na tok-koyom na ndwara zḛ me.»
12 A mbo tol nama pehir ge mbegeya ma,
Naa ge Bage ɗiŋnedin ne zú nama.
Mo Ursalima, a mbo gwan tol mo go: «Suwal ge baŋneya» to,
amma a mbo gá tol mo go: «Laar wanna.»