Máya ge ɗiŋnedin
51
1 Zá̰ me mbi, aŋ ge ne yan dosol pe ma,aŋ ge ne ɓyare Bage ɗiŋnedin pe ma!
Dó me aŋ ndwara ge njal ge a ne ce aŋ ne na pal,
ge tuul ge a ne ndage aŋ ne na zi ya pal.
2 Ndi aŋ bá Abraham,
ndi me aŋ ná ge ne tó aŋ Sara.
Swaga ge mbi ne tó Abraham, na sḛ ka ɗu kikit,
mbi é mbi wak busu na pal,
mbi zuli na pehir se no ceɗed.
3 Bage ɗiŋnedin mbo iyal Siyona laar,
mbo iyal na swaga ge ne gu se ma pet laar.
Mbo saŋge na ful pul dimma ne gaaso ge Eden ne go,
mbo saŋge na babur pul dimma ne gaaso ge Bage ɗiŋnedin ne go.
Laar saal, ne fafa̰y mbo kat na go,
gugu, ne kaŋ mballa mbo kat na go.
4 Aŋ mbi naa ma, zá̰ me mbi kwaɗa,
aŋ mbi ɓase ma, so me aŋ togor zá̰ mbi.
Ago eya ma ne wak yuwaleya ma mbo da ne mbi ta ya,
ne hon mbi ɓase ma kwaya̰l pe.
5 Mbi zurra gá gwa,
mbi máya dyan ja zum.
Mbi mbo kun sarya ɓase ma pal ne pool ge mbi ne,
naa ge ne til zi ya ma mbo é bama jobreya mbi pal.
a mbo kan bama saareya pool ge mbi ne pal.
6 He me aŋ ndwara digi ndil pḭr gale,
dó me aŋ ndwara se ndil suwar gale!
Ago pḭr mbo borwe uzi dimma ne ol swama go,
suwar mbo sabe dimma ne ba̰r go.
Naa ge ne suwar pal ma mbo su dimma ne susu go.
Amma máya ge mbi ne mbo kat ɗiŋnedin,
zurra ge mbi ne pe mbo á to bat.
7 Zá̰ me mbi, an ge ne kwar dosol ma,
ɓase ge ne koy eya ge mbi ne bama dulwak zi ma!
Sya me sáso ge na dasana ma ne vo to,
ka̰ me aŋ tok digi ne cotɗa ge nama ne pe to.
8 Wagal mbo zam nama dimma ne ba̰r go,
wagal mbo zam nama dimma ne ba̰r tame susu go.
Amma zurra ge mbi ne mbo kat ɗiŋnedin,
máya ge mbi ne mbo kat doŋ pe ma ne doŋ pe ma.
Bage ɗiŋnedin, ŋgay pool ge mo ne
9 Kore digi, kore digi!
O Bage ɗiŋnedin, ke mo temel ne pool ge mo ne
kore digi dimma ne dam ma ge dḛ zaŋgal ya ma go,
dimma ne zaman ma ge ne kale ya ma go.
Te be mo há kavaar ga̰l Rahab,
kavaar ga̰l ge ne maŋgaɗam ga̰l yuwam se ne to’a?
10 Te be mo fya̰ maŋgaɗam ga̰l yuwam,
mam ge ɗugul helek ne to’a?
Te be mo do viya̰ maŋgaɗam ga̰l yuwam pul se ne,
mo ya̰ naa ge mo ne zu nama kaleya no to’a?
11 Naa ge Bage ɗiŋnedin ne zu nama, a mbo gwan’a,
a mbo gwan’a Siyona go ne laar saal,
laar saal ge ɗiŋnedin mbo wi nama teret.
Laar saal, ne fafa̰y mbo sululi nama pal.
Sun ta ma, ne laar pisil mbo á.
Bage ɗiŋnedin mbo iyal na naa laar
12 A mbi, mbi Bage iyal aŋ laar ne.
Mo te sya ndu dasana,
na ge ne su uzi baŋ vo kyaɗa ɗaa?
Na sḛ a sugur ne baŋ.
13 Kyaɗa mo ka vyale Bage ɗiŋnedin, na ge ne dó mo,
na ge ne dó digi ma ne suwar ɗaa?
Kyaɗa mo ba ka ndatɗa rarag dam ne dam
ge pore juliliya ge ndu ge ne ke mo yál ndwara zḛ,
dimma ne na ne mbya burmi uzi go ɗaa?
Pore juliliya ge ndu ge ne ke mo yál mbe ne ya da ɗaa?
14 Bage a ne fé na ne daŋgay zi,
ta ŋgeɗo a mbo dol na digi.
Na sḛ mbo su na daŋgay zi to bat,
mbo woɗege ne kaŋzam to bat.
15 A mbi Bage ɗiŋnedin, Dok ge mo ne,
ge ne iigi maŋgaɗam ga̰l yuwam digi, na sḭḭl abe juliliya.
Mbi ndil Bage ɗiŋnedin, Bage naa ge mbal pore ma ne.
16 Mbi ya̰ mbi fare ma mo wak zi,
mbi mbege mo mbi fápul zi.
Mbi dó pḭr ma ne suwar ne,
mbi jya̰ Siyona go: «Aŋ mbi naa ma ne!»
17 Kore digi, kore digi,
O Ursalima ɗage digi!
Mo ge ne ame kop pore ne Bage ɗiŋnedin tok go njotɗa.
Mo njó na ɗiŋ aya mwaɗak, ɗiŋ mo pala hat miili mo.
18 Ne mo vya ge mo ne tó nama ma buwal zi mwaɗak,
a̰me ɗu ge ɗame mo to bat.
Ne mo vya ge mo ne wá nama ma buwal zi mwaɗak,
a̰me ɗu ge wan mo tok to bat.
19 Yál mbe ma no jwak, a dé mo pal,
purra ma ne burmiya,
kyamal ma ne pore mballa.
A wuɗi sṵ mo ndwara ne ɗaa?
A wuɗi mbo ya iyal mo laar ne ɗaa?
20 Ge viya̰ kiya̰r ma go pet,
mo vya ma ka̰ ya suwar zi fiya
dimma ne boy ne wan kore dolla suwar zi go.
A ya pore ge Bage ɗiŋnedin ne zi,
ge mḛreya ge mo Dok ne zi.
21 Ne pe no, mo ge a̰seya, za̰ gale,
mo fere fere, amma ne oyo̰r njiyal to.
22 Mo Bageyal, Bage ɗiŋnedin, Dok ge mo ne,
Bage ne ɗaŋge na ɓase ma pe jan go:
«Ndi mbi ame kop ge ne miili naa pala ne mo tok go ya uzi,
kop ge mbi pore ne, mo mbo gwan njot na to bat.
23 Mbi mbo hon na ge naa ge ne ke mo yál ma tok go,
nama ge a ne ka jan mo go, mo kubi mo pul se,
mo ya̰ bama mborra mo pal ma.
Mo ho̰ mo goŋ go nama mbo viya̰ na go,
dimma ne naa ne mbo ne viya̰ pul go go.»