Verra ne zurra ge suwal Ursalima ne
29
1 Woo Ariyela! Woo Ariyel!Suwal ge Dawda ne mbo ya mbal na!
Mo koy mo dam vḛso ma del ma ne del ma.
2 Ariyel, mbi mbo ke mo mbi tok go lilit,
mo mbo kat kḭḭmi, ne mḭḭm zi,
mo mbo kat mbi ta dimma ne Ariyel go,
ndwara twal tuwaleya pala ge tuwaleya ne til ne go.
3 Dimma ne Dawda ne ke go,
mbi mbo mbo ya ver mo zi,
mbi mbo ver mo zi ne asagar ma,
mbi mbo tor suwar ver mo zi.
4 Mo pala mbo cwage se,
mo mbo gá farra ne suwar se ya,
mo ka̰l mbo gá ndageya ne suwar pe se ya digi.
Mo mbo gá farra ne suwar se ya ne ndu ge ne tá̰ tan digi go.
Mbo ka̰l mbo gá ndage ne suwar pe se ya
dimma ne ndu ne emse na wak farra ne na duwa̰r zi go.
5 Ne jo̰ mo naa ge ho̰l ma ɓase gḛ dimma ne kuci go,
ko naa ge ne ke mo yál ma dimma ne mboor ge saam ne kwal na go puy ɗe,
ndi baŋ tukcuk,
6 Bage ɗiŋnedin, Bage naa ge mbal pore ma ne mbo sya mo ko̰r,
ne mam ba̰yya ma, ne suwar ndatɗa ma, ne ka̰l ba̰yya ge ɓaŋlaŋ,
ne saam labreya ma, ne ol ge ɗaabeya me.
7 Mbo kat ge pehir ge ɓase mbe ma ta,
nama ge a ne ka ne go det mo ma,
ge a ne go ke mo ho̰l ma,
ge a ne ka ne go ke mo yál ma, o Ariyel,
dimma ne kiya̰r ne jan naa ɗaal go.
8 Mo kat dimma ne ndu ge kyamal ne ke na,
kiya̰r jan na go na zam ne go kaŋ zam,
swaga ge ne kore digi, na laar kat pṵṵl go,
ko dimma ne ndu ge mam njuwal ne wan na,
kiya̰r jan na go, na njot ne go mam,
swaga ge ne kore digi na pool kat to, na ka̰l pe kat fiya̰l go.
Mbo kat go no ca ne pehir ge ɓase,
ge ne ke ho̰l ne njal Siyona mbe ma no.
Ndwara dameya, ne fereya
9 Ke me ajab, e me aŋ tok aŋ wak ma go,
aŋ ndwara ma nama dame digi, ka me ɓaal baŋ,
fere me, amma ne oyo̰r jiya̰l to,
muli me, amma a be go aŋ njó jiya̰l to.
10 Ago Bage ɗiŋnedin ka̰ o̰yom ge be kwar fare to aŋ zi,
anabi ma, dame aŋ ndwara ma dame,
naa ge kwa ɗimil ma, la aŋ ndwara ma se lar.
11 Daalam ge kaŋ mbe ma no pet ne, ne aŋ ta a dimma ne maktub ge a ne fé na fet go. Swaga ge a ne hon ndu ge ne kwar kaŋ isiya na isi na, na sḛ gwan ne janna go: «Mbi day isi na to, fé fet.» 12 Amma swaga ge a ne hon na ndu ge ne kwar kaŋ isiya to, na isi na, na sḛ gwan ne janna go: «Mbi kwar kaŋ isiya to.»
13 Bageyal jan go:
«Ɓase mbe ma mbo ya mbi ndwara se da ne bama wak baŋ,
a mbo ya uware mbi da ne bama wak wala ma baŋ,
amma nama dulwak ma kaal ne mbi.
syaya ge a ne sya mbi vo, a hada ne, ne nama ta baŋ.
14 Ne no pe, mbi mbo ka gwan
é nama ke ajab ne mbi kaŋ ŋgayya ma.
Zwama ge naa ge zwama ma ne mbo ban uzi,
Fare kwarra ge naa ge ne kwar fare ma ne mbo woy tene.»
15 Woo! A woy bama kaŋ kerra ma Bage ɗiŋnedin ndwara zḛ
A ke bama kaŋ ma tṵ zi,
A ka janna go: «A wuɗi kwar i ne go ne ɗaa?
A wuɗi kwar kaŋ ge i ne ke ne go ne ɗaa?»
16 Te ma daal ke aŋ ne go ɗaa!
Ndu ge sin il da ne pool saŋge njiyal ɗaa?
Kaŋ ge a ne sḭ na sin da ne pool jan bage ne sḭ na go:
«Mo be sin mbi ne to ɗaa?»
Il da ne pool jan bage ne sḭ na go:
«Mo kwar kaŋ sinna to ɗaa?»
Bage ɗiŋnedin mbo er katɗa ge na naa ma ne
17 Dam ma ta ŋgeɗo,
murum ge suwal Liban ne mbo saŋge
gaaso ge uwara ge zamma ma ne,
gaaso ge uwara ge zamma ma ne
mbo saŋge murum.
18 Dam mbe go,
naa ge gisil ma mbo zá̰ fare ge maktub ne,
swaga watɗa ne tṵ zi ya zum go,
naa ge ɓaal ma ndwara mbo ga kwar swaga.
19 Naa ge woɗegeya ma mbo ɓol laar saal,
ge waɗeya Bage ɗiŋnedin zi,
naa ge a̰se ne naa buwal zi ma,
a mbo ka ke laar saal fafa̰y
ge Bage mbegeya ge Israyela ne zi.
20 Ago naa ge ne ke muluk ne ke naa yál pe ma, pe mbo á,
naa ge cot naa ma pe mbo burmi,
nama ge ne kat ne sone kerra pe ma pet, nama pe mbo pur uzi.
21 Poseya ne nama ge ne zam naa tamay pal ma,
ne nama ge ne é kaŋ syal koo ne naa ge kun sarya ma pe ma,
ne nama ge ne kun sarya ge hale ge ndu ge dosol pal ma.
22 Ne pe no, Bage ɗiŋnedin, na ge ne zú Abraham jan pehir ge Yakub ne go:
«Ne ga ne zḛ no, saaso mbo gwan ke Yakub vya ma to bat,
ne ga ne zḛ no, nama ndwara mbo gwan su se leɗet to bat.»
23 Ago, swaga ge a ne bama vya ma ne mbo
kwar kaŋ ge mbi ne ke bama buwal zi ma ya,
a mbo uware mbi, mbi Bage mbegeya uzi hini cat ge Yakub ne,
a mbo gá sya mbi, Dok ge Israyela ne vo.
24 Nama ge ne ka kwar fare to ma,
a mbo gwan e pe kwar fare,
nama ge pala ga̰l ma,
a mbo vin go a hate bama.