Vya dore
5
1 Mbi mbo mbi gaaso zi,mbi ná vya ge gwale, mbi kondore.
mbi yel mbi mir ma ne sugur ge hur tuli ma.
Mbi zam mbi daaram fegem ma ne mbi daaram ma.
Mbi njot mbi oyo̰r jiya̰l ma ne mbi pam ma.
Kaam vya ma
Kaam vya ma, zá me, njó me, fere me ta,
mbi naa ge laar wanna ma.
Mbi ɓyare swaga fi se, ndu ge hage mbi zok wak to
Vya kale
2 Mbi ka fí dam, amma mbi haŋgal be fí se to.
Mbi za̰ mbi ndu ge laar wanna pot zok wak.
Vya dore
Mbi ná vya ge gwale, mbi kondore,
mbi maale, mbi ndu ge ɗeŋger, hage mbi zok wak.
Mbyar son mbi pala ya se gyatap,
mbi pala susu lwaɗe ya ne mam njagab.
Vya kale
3 Mbi fage mbi ba̰r ya digi,
mbi ke gyana mbi ba gwan kan na ɗaa?
Mbi usi mbi koo ya go,
mbi ke gyana mbi ba gwan fat na ɗaa?
4 Mbi ndu ge laar wanna pá na tok ya zok ndwala zi,
mbi dulwak kṵ ɓat.
5 Mbi ɗage digi mbo hage mbi ndu ge laar wanna zok wak,
num mir sore ne mbi tok go se,
ne mbi tok vya ma ta, num mir sore se
son zok wak tok ge wanna.
6 Mbi hage mbi ndu ge laar wanna zok wak,
amma na sḛ saŋge mbi na go̰r, mbo ya swaga.
Mbi wá ya zum na fare janna pal,
mbi ɓyare na pe, amma mbi be ɓol na to,
mbi oy na, amma na sḛ be vin mbi to.
7 Naa ge ne koŋle suwal se koyya ma,
nama ge ne koy gulum ga̰l ma ɓo mbi,
a iya mbi, a ho̰ mbi jwaŋ ma,
a abe mbi ba̰r lar pala ne mbi pal uzi.
8 Vya kale ge Ursalima ne ma, mbi guni tene janna go:
Kadɗa aŋ ma̰ ɓol mbi ndu ge laar wanna ya ɗe,
aŋ jan na ma̰ gyana ɗaa?
Ago Laar wanna dol mbi ya moy.
Vya kale ma
9 Mo ndu ge laar wanna waɗe ge may ma waɗe ɗaa?
Kale ma gan, jya̰ i gale.
Mo ndu ge laar wanna waɗe ge may ma waɗe ɗo
mo e i guni ta no ɗaa?
Vya kale
10 Mbi ndu ge laar wanna saal vovol, a káál purcut,
a hini cat ne naa dubu buwal zi.
11 Na pala dinar ge siŋli ne,
na pala susu ma fiya ta pal,
pisil ɗeɗel dimma ne ga̰a̰ saam go.
12 Na ndwara ma dimma ne maale ma ne kat ne mam wak go go,
son tene pam pal,
ka ya kaŋ ma zuliya bindik buwal zi.
13 Na gasa dimma ne swaga ge a ne ɗḭ sugur ge hur tuli ma ne go go,
kan hurra ge tuli zum.
Na wak dimma ne sugur ge ne ya̰ idir mir ɓulla ya se go.
14 Na tok ma dinar fegem wiya ne fool krisolit,
na duur andalam kiya̰r so̰meya ne fool safir.
15 Na koo ma dimma ne ŋgoo saal go,
dusiya ge dinar ge siŋli ma pal.
Na ndwara dore dimma ne njal Liban go,
a hini cat dimma ne uwara sedre go.
16 Na wak tuli,
kaŋ ge ne na ta ma pet a siŋli.
Vya kale ge Ursalima ne ma,
no a mbi ndu ge laar wanna ne,
no a mbi kondore ne.