Maana ge Israyela vya ma ne be mbyat vyaleya to
78
1 Fare saareya ge Asaf ne.
Mbi pehir ma, só me aŋ togor za̰ mbi eya!
Só me aŋ togor za̰ fare ge ne mbi wak zi!
2 Mbi hage mbi wak jan fare sḭ,
mbi waage fare ɗimil ge dḛ zaŋgal ma.
3 Kaŋ ge nee ne za̰ nama,
ge nee ne kwa nama,
ge nee bá ma ne waage nee nama,
4 nee ne pool ge woy nee vya ma nama to.
Nee waage doŋ pe ge ne mbo ne go̰r ya ma,
kaŋ ma ge ne e nama uware Bage ɗiŋnedin,
ne na pool ma, ne na kaŋ ajab ge ne ke ma.
5 Ke wak tuli ne pehir ge Yakub ne,
ho̰ Israyela vya ma eya ma,
ho̰ nee bá ma wak no go nama ke nama vya ma na kwarra.
6 Ne da pe, doŋ pe ge ne mbo ne go̰r ya na kwa na,
nama ke nama vya ge ne tol ya ma na kwarra,
nama sḛ ma waage nama vya kon ma me.
7 Nama e nama saareya ma Dok pal,
nama vyale kaŋ ge Dok ne ke ma to,
nama koy na wak honna ma me.
8 Go no, a mbo bole bama bá ma koo pul to,
nama ge ne ka za̰ wak to ma, naa ge pala ndaar ma,
naa ge dulwak ɗu to ma, ge o̰yom ne Dok pal to ma.
9 Pehir ge Efrayim ne ne bama kajamle ma bama tok go,
dam pore go, a saŋge bama go̰r.
10 A be koy wak tuli ge Dok ne to,
a be ke mborra na eya ma pal to.
11 A vyale na kaŋ ge ne ke ma,
na kaŋ ajab ge ne e nama na kwarra ma.
12 Ke kaŋ ge ajab ma nama bá ma ndwara go,
suwal Masar ya, Sowan go.
13 Caɗe maŋgaɗam ga̰l yuwam se, e nama kaleya no,
e mam ma soge mḛya ne hub torra go.
14 Ka ɗame nama gyala ne pḭr lurra nama pal,
ɗaal ma mwaɗak ne kwaya̰l ge ol me.
15 Ɓá njal ma ful pul zi,
ho̰ nama mam njotɗa no baŋneya bindik.
16 E mam ɓulla ne njal zi ya,
e mam sor so̰o̰l vit dimma ne maŋgaɗam go.
17 Go no puy ɗe, a ka gwan ke sone na ndwara se,
ge ful pul ge fiya̰l no zi, a ka ke ho̰l ne Bage ne digi zi ya.
18 Ne laar ɓyareya, a kugi Dok
na ho̰ bama kaŋzam ne bama sḛ pe.
19 A ka ŋgare Dok fare janna go:
«Dok da ne pool ke kaŋzam ful pul zi ɗaa?
20 A fareba, iya njal, mam ɓu ne zi ya no baŋneya bindik.
Na sḛ da ne pool hon kaŋzam,
ko hon na ɓase ma duur ɗaa?»
21 Swaga ge Bage ɗiŋnedin ne za̰,
saŋge pore no,
ka juliliya Yakub vya ma pal no,
saŋge pore Israyela vya ma pal no.
22 Ne da pe, a be hon fareba Dok ta to,
a be ya̰ bama saareya na pal go, na ma̰ má bama to.
23 Ho̰ pḭr ne digi wak,
hage pḭr wak ma.
24 Ká̰ maan ne digi ya nama pal wal nama no,
ho̰ nama kaŋzam ge digi ge no.
25 Ndu ge daage za kaŋzam ge naa ge Poola ma ne,
teme nama ya kaŋzam baŋneya bindik.
26 Ne digi ya, Dok teme saam ne ham ya,
ne pool ge na ne, e saam kwal ne mbii ya.
27 Swá nama duur ya se dimma ne kuci go,
njoole ma ɓase dimma ne kafeɗem ne maŋgaɗam ga̰l yuwam wak go go.
28 ká̰ nama ya nama swaga katɗa go,
koŋleya nama gur ma ziyar go.
29 A za, a huri ndiŋ.
Ago Dok ho̰ nama kaŋ ge nama laar ne ɓyare.
30 A gale ne be hurra,
kaŋzam gale ne nama wak zi ɗe,
31 Dok saŋge pore nama pal,
pu naa ge pool ma ne nama buwal zi mbut,
hṵ Israyela vya ge bool ma uzi me.
32 Go no puy ɗe, a ka gwan ke sone,
a hon fareba na kaŋ ge ajab ge ne ke ma pal to.
33 Go mbe no, há nama dam ma dimma ne saam go baŋ,
a á bama del ma vo zi baŋ.
34 Swaga ge Dok ne ka hun nama, a ka ɓyare Dok pe,
a ka saŋge ta ya na ta, a ka ɓyare na pe lilit.
35 A ka gwan dwat go, na ka bama njal woy ta,
Dok ge ne digi zi ya ka bama bage zurra.
36 Amma a ka lase na lase,
a ka kun na hale.
37 Nama dulwak be kat na pal to,
a be koy na wak tuli to.
38 Amma na sḛ, ka koy laar wanna ge na ne nama ta,
ka pore nama ya̰l ma, ka ya̰ be ge burmi nama pe uzi.
Ɗaɗak, ka wan tene pore ge na ne zi,
ka ndal tene ne juliliya ge na ne go.
39 Dok kwa go, nama naa dasana ma ne bo,
saam ge ne kwal ge ne gwan’a to ne baŋ.
40 Ge ful pul zi, a ka ke ho̰l ne Dok ɗaɗak,
a ka vḛne na laar ge ful pul ge fiya̰l go ɗaɗak.
41 A ka gwan kugi Dok,
a ka e Bage mbegeya uzi hini cat ge Israyela ne laar hotɗa.
42 A be dwat ne tok pool ge na ne,
swaga ge ne zu nama ne bage ho̰l tok zi ya to,
43 ko ne kaŋ ŋgayya ge ne ke nama suwal Masar ya to,
ko ne na kaŋ ajab ge ne ke nama suwal Sowan go ma to.
44 Saŋge nama maŋgaɗam ma ne nama mam so̰o̰l ma swama,
a be gwan day njot nama to.
45 Ka̰ far ma nama ta, a ka mbal nama no,
ka̰ móy ma nama ta, a ka vḛne nama no me.
46 Ka̰ tere ma nama gaaso ma ta,
ka̰ tere baktar ma nama kaŋ kyarga ma ta.
47 Karge nama gaaso oyo̰r ma uzi ne tuwar ndaar,
vḛne nama fere ma uzi ne iyalam me.
48 Ka̰ tuwar ndaar kavaar ma ta,
ba̰y nama vog ge kavaar ma ne ne mam me.
49 ka̰ na pore juliliya, ne na laar ol ge bibilu masar ma ta,
ka̰ na maleka ge ke naa yál ma nama ta me.
50 Ka̰ pore ge na ne digi,
be ya̰ nama be ge hunna to.
Amma ka̰ mbogom nama ta.
51 Hṵ masar ma vya pul soy ma no mwaɗak,
pehir ge Cham ne ma vya ge zḛ ge ge a ne tó nama pool ge bama ne zi ma.
52 Abe na ɓase ma ya poleya na ndwara zḛ dimma ne gii ma go,
ka pole nama na ndwara zḛ ful pul zi dimma ne kavaar ma go.
53 Ka koy nama cwacwagat, be ge a̰me ke nama vo to,
mam somɗe nama naa ge ho̰l ma se ya mwaɗak.
54 Gene nama ya na suwal ge mbegeya go,
ge njal ge na ne maŋge na ne pool ge na ne go.
55 Yá̰ pehir ge ɗogle ma nama ndwara zḛ,
va nama nama suwal ma joo se,
e pehir ge Israyela ne ma kat gur ge nama ne ma zi me.
56 Amma a kugi Dok ge ne digi zi ya,
a pili ta ne na,
a be koy na eya ma to.
57 A saŋge na bama go̰r, a ka lase na dimma ne bama bá ma go,
a sele uzi dimma ne kajamle ge taal ŋgobol ne mbal go.
58 A gumi pore ge Dok ne digi ne bama swaga siim ma,
a e na ke yil ne bama kaŋ cerra ma.
59 Swaga ge Dok ne kwa no, saŋge pore,
saŋge Israyela vya ma na go̰r no.
60 Saŋge na zok ge ne Silo go,
na ge ne ɗu ne naa dasana ma buwal zi na go̰r no.
61 Ɓya̰ nama hormo naa ge ho̰l ma tok go,
ya̰ nama sandu wak tuli mbo paal zi.
62 Ɓya̰ na ɓase ma pore wak zi,
saŋge pore na joo ta.
63 Ol til nama bool ma ya swaga,
ndu ge mbal kaŋ ɗame nama vya kale ma to.
64 Pore zam nama naa ge tuwaleya ma ya swaga,
nama kumur ma pool ge fyalla to.
65 Bageyal kore digi, dimma ne ndu ge ne fi dam go,
dimma ne ndu ge pateya ge oyo̰r jiya̰l ne fere na go,
66 dé nama naa ge ho̰l ma ne go̰r go,
ká̰ saaso ge ɓaŋlaŋ nama pal ɗiŋnedin.
67 Amma cigi Yusuf vya ma uzi,
be tal pehir ge Efrayim ne to.
68 Tá pehir ge Yuda ne,
njal ge Siyona ne ge na laar ne wa̰ na.
69 Sḭ na zok digi dimma ne njal pala njeel go,
dimma ne suwar ge na pe ne dó ne go dol ɗiŋnedin go.
70 Tá na dore Dawda,
wá̰ na da ne gii ma pe ya.
71 Wá̰ na da ne kavaar ma pe ya ndwara mbo ya koy na ɓase, Yakub vya ma,
na joo, Israyela vya ma.
72 Dawda koy nama ne dulwak ɗu,
koy nama ɗeŋger zi.