Swaga yál ma zi, mbi dwat da ne mo kaŋ ajab ma
77
1 Ne naa ge mbal kaŋ ma ga̰l pe: Ne ka̰l ge Yedutun ne. Kaŋ mballa ge Asaf ne.
2 Mbi fyal Dok ta ne ka̰l ndaar,
Mbi fyal Dok ta ne ka̰l ndaar, na só na togor za̰ mbi.
3 Mbi dam yál ma zi, mbi ɓyare mbi Bageyal pe,
ɗaal zi, mbi tyare mbi tok ma na pe digi be ɗigliya,
mbi kuri laar iyalla.
4 Swaga ge mbi ne saare Dok pal, mbi ka sun tene,
Swaga ge mbi ne gwan dwat, mbi sḛ iyal tiliŋ. Ɗigliya
5 Mo tele mbi be ge mbi ndwara gumi dam,
mbi ya iigiya zi, mbi wak ge jan fare to.
6 Mbi ka saare dam ma ge ne kaleya ma pal,
ge del ma ge dḛ zaŋgal ma pal.
7 Ɗaal zi, kaŋ ge mbi ne ka mballa so ya mbi pal zi,
Mbi ka dwatɗa, mbi ka ele tene go:
8 Bageyal da ne pool dol ndu uzi ɗiŋnedin ɗaa?
Mbo gwan kat ne kwa a̰se to’a?
9 Na kwa a̰se da ne pool á go rerege ɗaa?
Na fare ge ne jan da ne pool gul uzi doŋ pe ma ne doŋ pe ma ɗaa?
10 Dok da ne pool vyale kwar a̰se ge na ne ɗaa?
Laar ol ge na ne zi, da ne pool dibi na dulwak be ge kwar naa a̰se ɗaa? Ɗigliya
11 Mbi jan go: «Fare ge ne ke mbi yál,
ago Bage ne digi zi ya gwan ke dimma ne ge dḛ zaŋgal go to.»
12 O Bage ɗiŋnedin, mbi mbo ka dwat ne kaŋ ge mo ne ke ma,
Mbi mbo ka dwat ne mo kaŋ ajab ge mo dḛ ne ke ma.
13 Mbi mbo ka saare kaŋ ge mo ne ke ma pal,
mbi mbo ka dwat mo kaŋ ajab ma pal.
14 O Dok, mo kaŋ kerra ma mbegeya,
dok a̰me ge ɓaŋlaŋ dimma ne mo go to!
15 A mo Dok ɗu kikit mo ke kaŋ ge ajab ma ne,
mo ŋgay pehir ma mo pool ne.
16 Ne pool ge mo ne, mo zu mo ɓase ma,
ndwara go, Yakub vya ma ne Yusuf vya ma. Ɗigliya
17 O Dok, mam ma kwa mo,
a kwa mo, vo wá̰ nama,
a ndá ne bama pul se ya.
18 Pḭr puwale mam swarra ne digi ya,
ne digi ya mam ka ba̰yya,
mo kajamle ma ka sya swaga ma go ɗew me ɗew me.
19 Ŋgoreya ge mo ba̰yya ne
mam serra sé suwar pal pet,
suwar abe ndatɗa.
20 Mo ɓá viya̰ maŋgaɗam ga̰l yuwam pul go,
mo dó mo koo pul mam ge ɓaŋlaŋ pul go,
ndu a̰me be kwa mo koo to.
21 Mo é Musa ma ne Aaron pole mo ɓase ma
dimma ne gii ma go.