Gugu ne zurra ge mbi ne pe
18
1 Ne naa ge mbal kaŋ ma ga̰l pe: Kaŋ mballa ge Dawda, dore ge Bage ɗiŋnedin ne. Mbá na swaga ge Bage ɗiŋnedin ne zu na ne na naa ge ho̰l ma, ne Sawul tok go.
2 O Bage ɗiŋnedin, mbi laar wa̰ mo wan,
mo mbi pool ne!
3 Bage ɗiŋnedin a mbi njal ne,
a mbi gulum ga̰l ne,
a bage zur mbi ne.
Mbi Dok a mbi njal ge woy tene ne,
a mbi ɓiyaar ge cage tene ne,
a tṵ ge ne ŋgay mbi halla ne,
a gulum ga̰l ge má mbi ne.
4 Mbi oy go: Uwareya hon Bage ɗiŋnedin!
Mbi má ya go ne mbi naa ge ho̰l ma tok go.
5 Siya vwa mbi zi,
ho̰ mbi vo dimma ne mam ne julili pore go.
6 Táál ge siya ma ne kole mbi zi,
faɗe ge siya ma ne ka hulla mbi koo se.
7 Swaga yál ge mbi ne zi,
mbi tó Bage ɗiŋnedin,
mbi tó Dok ge mbi ne.
Ne na zok ge mbegeya zi ya, za̰ mbi ka̰l,
mbi fyaso dé na togor zi.
8 Suwar abe ndatɗa,
njal abe ndatɗa ne na pe too se ya,
a ka ndatɗa ne da pe, Bage ɗiŋnedin saŋge pore.
9 Ol-swama ka ɗusi ne na vo̰r ma zi ya,
ol ka ɗaabe ne na wak zi ya,
ne ol kabreya me.
10 Worge pḭr sebeya uzi, kan na koo ya se,
pḭr sogeya kat na koo se.
11 Kat ge kavaar ge digi zi ya pal, ka ɗageya,
ka volweya saam ka in na ne mo jo̰ na da ne ganwak go.
12 Ke ne tṵ na swaga woy tene,
worge tene na gur zi,
ge mam ge pisil ɗeɗel se, pḭr ge sebeya zi.
13 Ge kwaya̰l ge ne ka mbo na ndwara zḛ zi,
pḭr ka inna, tuwar-ndaar ka swarra, ol wak ka kabreya me.
14 Ne pḭr zi ya, Bage ɗiŋnedin ka ba̰yya,
Bage ne digi zi ya ka ndage na ka̰l ba̰yya,
tuwar-ndaar ka swarra, ol wak yeŋgel ka kabreya.
15 Ka mbal na kajamle ma, ka ɓarse nama se,
ka ser mam gḛ, ka é nama njet so se.
16 Ge mḛreya ge Bage ɗiŋnedin ne ndwara zḛ,
ge laar ol uusiya ge na ne pul zi,
maŋgaɗam ga̰l yuwam pul ma ben ja digi,
suwar pe ndegɗe dyan ja zum.
17 Tyare na tok ne digi zi ya, wa̰ mbi no,
pwa mbi ne mam ge ɓaŋlaŋ se digi no.
18 Zú mbi ne mbi ndu ge ho̰l ge pool tok zi ya,
ne nama ge ne gage ta ne mbi,
nama ge pool gḛ waɗe mbi ma tok zi ya.
19 A mbo ya det mbi dam ge mbi ne ka yál zi go,
amma Bage ɗiŋnedin mbyale mbi.
20 Na sḛ ndage mbi ya zum, ya̰ mbi digi suli no,
ndage mbi ya zum, ne da pe na laar wa̰ mbi wan.
21 Bage ɗiŋnedin mbá mbi da ne mbi dosol pe,
gwa̰ ne mbi potɗa da ne mbi ɗeŋger pe.
22 Ago mbi koy viya̰ ge Bage ɗiŋnedin ne,
mbi be hat tene ya̰l mbi Dok ndwara se to.
23 Mbi koy na wak honna ma pet,
mbi be saŋge na eya ma mbi go̰r to.
24 Mbi ka mbyatɗa tap na ndwara se,
mbi wa̰ tene be ke ya̰l.
25 Bage ɗiŋnedin gwa̰ ne mbi potɗa dosol ge mbi ne pal,
ne harcal ge mbi ne na ndwara se pe.
26 Ne ndu ge ɗeŋger, mo ŋgay ɗeŋger ge mo ne na ta,
ne ndu ge mbyatɗa tap, mo ŋgay tene mbyatɗa tap na ta.
27 Ne ndu ge mbegeya, mo ŋgay mbegeya ge mo ne na ta,
ne ndu ge sone gwagwaraŋ, mo kat sone gwagwaraŋ na ta me.
28 Ago mo bage ne má naa ge ne gwan ne bama pala se ma ne,
amma naa ge pala ga̰l ma, mo gwan ne nama pala se ne.
29 Mo bage ne dun mbi ɗuli digi ne,
O Bage ɗiŋnedin, Dok ge mbi ne, mo zen kwaya̰l tṵ ge mbi ne zi ne.
30 Ne mo, mbi hál naa ge ne mbo ya det mbi ma hál,
ne Dok ge mbi ne, mbi yal gulum ga̰l pala yal.
31 Viya̰ ge Dok ne a mbyatɗa tap,
fare janna ge Bage ɗiŋnedin ne ɗyage ɗyage.
Bage ɗiŋnedin a ɓiyaar ne, ne nama ge ne cage ta ne na ma pe.
32 Be ge Bage ɗiŋnedin to, a wuɗi Dok ne ɗaa?
Be ge i Dok to, a wuɗi njal ne ɗaa?
33 Dok a bage ne hon mbi pool ge ke fare ne,
ɗaɗe mbi viya̰ pul ne.
34 A na saŋge mbi koo ma dimma ne bagɗe koo ma go ne,
ka e mbi mḛya swaga ge haal ma digi.
35 A na hate mbi pore mballa ne,
a na mbar mbi zwal kajamle mballa ne.
36 Dimma ne ɓiyaar go, mo má mbi ne,
mo tok matoson ka mbyale mbi me.
Swaga za̰ kaɗeya ge mbi ne go, mo hat mbi ya pool.
37 A mo e mbi koo herra mbi pe go fogor ne,
mbi koo ma ndat to.
38 Mbi yan mbi naa ge ho̰l ma pe ɗiŋ mbi wan nama,
mbi gwan’a be ge mbi pur nama pe uzi to to.
39 Mbi rot nama uzi,
a ne pool ge gwan ɗage ya digi to.
A gá detɗa mbi koo se.
40 A mo hon mbi pool ge mbal pore ne,
a mo gwan ne mbi naa ge ho̰l ma pala mbi pe se ne.
41 A mo é mbi naa ge ho̰l ma syat bama pe so mbi ndwara zḛ ne,
Mbi mbo dibi naa ge ne kwane mbi ma wak.
42 A oy swaga, ndu ge sya nama ko̰r to.
A tol Bage ɗiŋnedin puy, gwan ne nama vinna to.
43 Mbi rot nama, a saŋge dimma ne kuci go,
mbi mbo twacwage nama mbi koo zi
dimma ne naa ne ndal njiyal ne viya̰ go go.
44 Mo zu mbi ne gool ge pehir ma ne zi,
mo koy mbi kat pehir ma pal,
naa ge mbi ne kwa nama to ma,
a gwa̰ ne bama pala mbi pe se.
45 Vya gwasal ma gwan ne bama pala mbi pe se,
a ka sor bama togor za̰ mbi fare ma.
46 Vya gwasal ma duur su ya se leɗet,
a wat ne bama gulum ga̰l ma zi ya zum ndatɗa rarag.
47 Bage ɗiŋnedin da ne ndwara,
Uwareya hon njal ge mbi ne,
Komreya hon Dok, bage máya ge mbi ne.
48 A Dok ge ne gele mbi ne,
a na gwan ne naa pala mbi pe se ne.
49 A na ndage mbi ne mbi naa ge ho̰l ma tok zi ya ne.
A mo é mbi hal mbi naa ge ho̰l ma pal ne,
Mo zur mbi ne naa ge birtiŋ ma tok go ne.
50 Ne pe no, mbi mbo uware mo pehir ge ɗogle ma buwal zi,
mbi mbo siya̰le mo ne mo dḭl pe.
51 Ke kaŋ ge ɓaŋlaŋ ne zurra ge na gan ne pe,
kwa bage na ne naŋge na a̰se,
kwa Dawda ma ne na hir ma a̰se ɗiŋnedin.