Esdras 8

Naa ge a ne Esdras ma ne gwa̰ ya ma dḭl

1 Ga̰l ge vuwal pe ma ne ma ge a ne isi nama, ge a ne gwa̰ ne Babilon ya dagre ne mbi Esdras, ge muluk ge gan Artazerzes ne zi ma no.

2 Gerchom, ne vuwal pe ge Pineyas ne zi,

Danyel, ne vuwal pe ge Itamar ne zi,

Hattuch, ne vuwal pe ge Dawda ne zi,

3 Ne Chekaniya vya ma buwal zi,

Zakariya, ne vuwal pe ge Paros ne zi, poseya ne naa sonmo kis para wara anuwa̰y (150),

4 Elyohenay ge Zeraya vya, ne vuwal pe ge Pahat-Mowab ne zi, poseya ne naa sonmo kikis azi (200),

5 Chekaniya ge Yahaziyel vya, ne vuwal pe ge Zattu ne zi, poseya ne naa sonmo kikis ataa (300),

6 Ebed ge Yonatan vya, ne vuwal pe ge Adin ne zi, poseya ne naa sonmo wara anuwa̰y (50),

7 Isaya ge Ataliya vya, ne vuwal pe ge Elam ne zi, poseya ne naa sonmo wara ɓyalar (70),

8 Zebadiya ge Mikayel vya, ne vuwal pe ge Chefatiya ne zi, poseya ne naa sonmo wara tiimal (80),

9 Obadiya ge Yehiyel vya, ne vuwal pe ge Yowab ne zi, poseya ne naa sonmo kikis azi ne para wol para tiimal (218),

10 Chelomit ge Yosifiya vya, ne vuwal pe ge Bani ne zi, poseya ne naa sonmo kis para wara myanaŋgal (160),

11 Zakariya ge Bebay vya, ne vuwal pe ge Bebay ne zi, poseya ne naa sonmo wara azi para tiimal (28),

12 Yohanan ge Hakkatan vya, ne vuwal pe ge Azgad ne zi, poseya ne naa sonmo kis para wol (110),

13 Elifelet, Yeyel ne Chemaya, naa jabso ma ne vuwal pe ge Adonikam ne zi, poseya ne naa sonmo wara myanaŋgal (60),

14 Utay ma ne Zabud, ne vuwal pe ge Bigvay ne zi, poseya ne naa sonmo wara ɓyalar (70).

Nṵsiya ne gwanna mbo Ursalima pe

15 Mbi kote nama ya gwa ne maŋgaɗam ge ne sya mbo le Ahava ya. I goɗe se katɗa dam ataa swaga mbe go. Mbi dol mbi ndwara ndil ɓase ma ne naa ge ke tuwaleya ma, amma mbi ɓol Levi vya a̰me swaga mbe go to. 16 Mbi tol ga̰l ma ya: Eliyezer, Ariyel, Chemaya, Elnatan, Yarib, Natan, Zakariya, ne Mechullam, ne naa ge hate naa ma azi: Yoyarib ma ne Elnatan. 17 Mbi hon nama wak go, nama mbo ɓol Iddo, ga̰l ge ne suwal Kasifiya go. Mbi ya̰ fare nama wak zi, nama mbo jan Iddo ma ne na ná vya ma, naa ge a ne ho̰ nama ne temel ge zok ge Dok ne zi pe kerra ma, nama ge ne suwal Kasifiya ya ma. Ne da pe, nama teme naa ge ke temel zok ge Dok ne zi ma ya. 18 Ne jo̰ Dok ge i ne ndwara ka i pal ɗe, nama sḛ ma teme i Cherebiya, ge ne vuwal pe ge Mali ne zi, ne hir ge Levi ne zi, na ge Israyela vya, ndu ge hal siŋli ya poseya ne na vya ma, ne na ná vya ma, naa wol para tiimal (18), 19 ne Hachabiya poseya ne Isaya, ne vuwal pe ge Merari ne zi, poseya ne bama vya ma, ne bama ná vya ma naa wara azi (20), 20 a mbo ya dagre ne naa ge Dawda ma ne ga̰l ma ne ho̰ nama ne mbar Levi vya ma ke temel ge zok ge Dok ne zi ma naa kikis azi ne para wara azi (220), pet a tó nama da ne bama dḭl ma.

21 Ge maŋgaɗam Ahava wak go, mbi hon wak go i ke asiyam ndwara gwan ne i pala Dok pe se, ne da pe na kwa i a̰se, na ɗame i, ne i vya ma, ne i kaŋ ma mwaɗak viya̰ go be fare. 22 Ago, ka ke mbi saaso ge mbi ele gan go na ho̰ i asagar ma ne naa ge ne tisi ma ndwara ɗame i viya̰ go ne i naa ge ho̰l ma pe. Ago i jya̰ gan go: «Dok ge i ne ndwara dó dol ge naa ge ne ɓyare na pe ma pal ne ke nama kwaɗa pe, amma pore juliliya ge na ne ya nama ge a ne saŋge na bama go̰r ma pal.» 23 Da ne pe, i wa̰ asiyam, ne ɓyare Dok ge i ne pe no, na sḛ za̰ i no me.

24 Go̰r go, mbi tal naa wol para azi ne ga̰l ge naa ge ke tuwaleya ma ne ma buwal zi, poseya ne Cherebiya ma ne Hachabiya ne bama kaam ma naa ta wol me. 25 Mbi ŋgay dṵṵl ge fool kaal ne, ne ge dinar ne, ne ge kaŋ ma ge gan ma, ne na naa ge yuwaleya ma, ne na naa ga̰l ge temel ma, ne Israyela vya ge ne gá ne suwal Babilon go ma ne tyare nama ne zok ge i Dok ne pe nama ndwara go. 26 Mbi hon nama fool kaal talent kikis myanaŋgal ne para wara anuwa̰y, ne kaŋ ge ne ɗeere ne fool kaal ma talent kis, ne ge ne dinar ma talent kis me, 27 ne seɗe ge dinar ma wara azi, nama dṵṵl darik dubu ɗu, ne fal ge ne ɗeere ne fool ŋgirma ge siŋli dimma ne dinar go azi me. 28 Mbi jan nama go: «Aŋ mbege mbege ne Bage ɗiŋnedin pe, kaŋ mbe ma no, a mbege nama mbege me. Fool kaal ma ne dinar mbe ma no, a bobo ma ne ne Bage ɗiŋnedin Dok ge aŋ bá ma ne pe. 29 Dó me aŋ ndwara kaŋ mbe ma pal kwaɗa, swaga ge aŋ ne det ya Ursalima ya, aŋ ba ŋgay na dṵṵl naa ge ke tuwaleya ma, ne Levi vya ma, ne ga̰l ge vuwal pe ge Israyela vya ma ne ma ndwara go, ge zok ge Bage ɗiŋnedin ne zi.» 30 Naa ge ke tuwaleya ma ne Levi vya ma abe fool kaal ma, ne dinar ma, ne kaŋ ge a ne ŋgay nama dṵṵl ma inna mbo Ursalima, ge zok ge i Dok ne zi ya.

Detɗa ge Esdras ma ne ya Ursalima go

31 I ɗage ne maŋgaɗam Ahava wak ya, dam wol para azi ge saba ge zḛ ge ne go, ndwara mbo Ursalima. Ne jo̰ Dok ge i ne dó na ndwara i pal ɗe, be ya̰ i naa ge ho̰l ma, ne naa ge fiiri viya̰ ma det i pal viya̰ go to. 32 Swaga ge i ne dé ya Ursalima go, i ɗigli ta dam ataa. 33 Dam ge anda go, i mbo ŋgay dṵṵl ge fool kaal ma, ne dinar ma, ne kaŋ ge ne zok ge i Dok ne zi ma. I hon nama bage tuwaleya Meremot ge Uriya vya, ma ne Eleyazar ge Pineyas vya, poseya ne Levi vya ma, ndwara go Yozabad ge Juswa vya, ma ne Nodiya ge Binwi vya ma tok go. 34 A isi kaŋ mbe ɗu ne ɗu, a njaŋge nama dṵṵl ma mwaɗak maktub zi swaga mbe go.

35 Naa ge ne gwa̰ ne paal zi ya ma, a tyare tuwaleya ge tilla uzi hon Dok ge Israyela ne: nday digli wol para azi ne Israyela vya ma pe pet, ne gamla wara lamaɗo para myanaŋgal, ne tame vya ma wara ɓyalar para ɓyalar, ne bemjere ma wol para azi ne sone pe. Kaŋ mbe ma no pet, a tyare nama tuwaleya ge tilla uzi ne Bage ɗiŋnedin pe. 36 A hon gan paca ma ne naa ge ne dó ndwara ne suwal ge ne maŋgaɗam Efrat le may ya ma pal ma, nama ge ne mbar ɓase ma ne temel ge zok ge Dok ne pe maktub ge gan ne.