Esdras 7

Gwanna ge Esdras ne ya Ursalima go

1 Go̰r kaŋ mbe ma no go, muluk ge Artazerzes gan ge Perse ne zi, Esdras ge Seraya vya, ge Azariya baŋ, ge Hilkiya baŋ kon, 2 ge Challum baŋ kon, ge Sadok baŋ kon, ge Ahitub baŋ kon, 3 ge Amariya baŋ kon, ge Azariya baŋ kon, ge Merayot baŋ kon, 4 ge Zeraya baŋ kon, ge Uzzi kaŋ kon, ge Bukki baŋ kon, 5 ge Abichwa baŋ kon, ge Pineyas baŋ kon, ge Eleyazar baŋ kon, ge Aaron kep tuwaleya baŋ kon, 6 gwan ne Babilon ya. Na sḛ ka ndu ge ne kwarra gḛ eya ge Musa ne zi, na ge Bage ɗiŋnedin, Dok ge Israyela ne, ne ho̰ Musa. Ne jo̰ Bage ɗiŋnedin Dok ge na ne ka da ne na, gan hon na kaŋ ma ge na sḛ ne ele ma pet. 7 Ne Israyela vya ma mbut, ne naa ge ke tuwaleya ma, ne Levi vya ma, ne naa ge mbal kaŋ ma, ne naa ge koy zok wak ma, ne naa ge a ne ho̰ nama ne ke temel zok ge Dok ne zi ma, a gwan’a Ursalima go ge del ɓyalar ge Artazerzes gan ne zi. 8 A ne Esdras ma gwa̰ ya Ursalima go, saba anuwa̰y ge del ge ɓyalar ne go. 9 A ɗage ne Babilon ya dam ge zḛ ge ge saba ge zḛ ge ne go, a dé ya Ursalima go dam ge zḛ ge ge saba ge anuwa̰y ne go. Ago Dok ge na ne ka da ne na. 10 Ago Esdras ho̰ tene ne dulwak ɗu, hale eya ge Bage ɗiŋnedin ne pe, ne ke mborra nama pal, ne hate Israyela vya ma eya ma ne wak honna ma me.

Maktub ge Artazerzes ne ho̰ Esdras

11 Ndi maktub ge gan Artazerzes ne ho̰ bage tuwaleya ne bage njaŋgeya Esdras, na ge ne kwa eya ma ne wak honna ma ge Bage ɗiŋnedin ne ho̰ Israyela ma na no.

12 «A mbi Artazerzes, gan ge gan ma ne, mbi hon mo Esdras bage tuwaleya, ne bage njaŋgeya ge eya ge Dok ge digi ya ne maktub ne. 13 Mbi ho̰ mbi wak go, Israyela vya ma pet, ge ne mbi suwal go ma, ge ne ɓyare gwan mbo Ursalima ma, ko naa ge ke tuwaleya ma, ko Levi vya ma, ko ɓase ge may ma, nama gwa̰ dagre ne mo. 14 I ne mbi naa ge yuwaleya ge ɓyalar ma dol mo mbo Ursalima ne suwal ge ne Yuda go ma mwaɗak ya, ne da pe, mo mbo hale pe, ko naa ke mborra ya eya ge mo Dok ne, ge ne mo tok go mbe no pal ko ɓa de. 15 Uwale, ḭ fool kaal ma ne dinar ge i ne mbi naa ge yuwaleya ma ne tyare na hon Dok ge Israyela ne, na ge na swaga katɗa ne Ursalima go. 16 Go no me, abe fool kaal ma ne dinar ma pet ge naa ge ke tuwaleya ma ne ɓase ge may ma ge ne suwal ge Babilon ne go ma pet, ge a ne tyare bobo honna ne zok ge bama Dok ne ge ne Ursalima go pe ma me. 17 Ne bware mbe, yá nday pool digli ma, ne gamla ma, ne tame vya ma, ne kaŋ ge ke tuwaleya ge kaŋ kyarga ne ma, ne bama tuwaleya ge oyo̰r jiya̰l ne ma, mo ba mbo tyare nama twal tuwaleya ge ne zok ge aŋ Dok ne zi ge ne Ursalima go pal. 18 Ne bware pe ge ne gá, kaŋ ge aŋ ne mo kaam ma ne ndil na ya kwaɗa kerra, ke me na laar ɓyare ge aŋ Dok ne pal. 19 Kaŋ ge a ne ho̰ mo nama ne temel ge zok ge mo Dok ne pe ma, e nama ge zok ge mo Dok ne ge ne Ursalima go zi. 20 Ne kaŋ ge ne gá kerra ne zok ge mo Dok ne pe, abe bware ne bage ne koy gan kaŋ ma tok go, mo pot na. 21 Mbi, gan Artazerzes, mbi ho̰ naa ge koy kaŋ ma ge ne maŋgaɗam Efrat le may ya ma wak go, nama ho̰ Esdras bage tuwaleya, ne bage njaŋgeya ge eya ge Dok ge digi ya ne, kaŋ ma pet ge na sḛ ne ele ne nama ta. 22 Ɗiŋ mbo fool kaal kilo dudubu ataa, ne gḛme suwàl kikis ataa, ne oyo̰r jiya̰l litre dudubu anda, ne num litre dudubu anda, ne yuwam be ŋgayya me. 23 Kaŋ ge Dok ge digi ya ne ho̰ wak go, a ke nama ne na zok pe, na ke da ne na viya̰ go tetem, ne da pe, na kaage pore ge Dok ne na dé suwal ge gan ne ma ne nà vya ma pal to. 24 Uwale, i ke aŋ kwarra go, aŋ ame kaŋ siyal ma ne kaŋ tyare ma ne naa ge ke tuwaleya ma, ne Levi vya ma, ne naa ge mbal kaŋ ma, ne naa ge koy zok wak ma, ne naa ge a ne ho̰ nama ne temel ge zok ge Dok ne zi pe kerra ma, ko ne ndu ge daage pet ge ne ke temel ne zok ge Dok ne zi tok go to bat.

25 Mo Esdras, ne zwama ge mo ne na, e naa ge kun sarya ma ne naa ge wan gool ma, ne nṵsi naa ge ne maŋgaɗam Efrat le may ya ma, nama ge ne kwa eya ge mo Dok ne ma fare ma pe. Naa ge a ne kwa eya mbe ma to ma, hate nama na me. 26 Ndu ge daage pet ge ne mbo gwan ne na pala ya eya ge mo Dok ne ma, ko eya ge gan ne ma pe se to, a mbo hun na, ko a yan na, ko a wan na kaŋ ma dwagal, ko a dol na daŋgay zi.»

Gugu gwanna ge Esdras ne hon Dok

27 Uwareya hon Bage ɗiŋnedin Dok ge i bá ma ne, na ge ne é fare gan dulwak zi na ho̰ zok ge Dok ne ge ne Ursalima go hormo. 28 Na ge ne é gan ma, ne na naa ge yuwaleya ma, ne na naa ge pool ma kwa mbi a̰se! Ago Bage ɗiŋnedin Dok ge mbi ne ndwara ka mbi pal, mbá mbi ne, a go no, mbi abe ga̰l ge Israyela ne ma mbi pe go gwanna ya no.