Moy ne zonna ge Ezekiyas ne
(Isa 38:1-8, 2Maa 32:24)
20
1 Dam mbe ma pul zi, Ezekiyas det moy daŋ pul ge siya. Anabi Isaya ge Amoz vya mbo ya na ta, jan na go: «Bage ɗiŋnedin jan go: Ho̰ mo yàl mo wak siya, ago mo su su, mo má to.» 2 Ezekiyas saŋge na ndwara babaŋre zi kaɗe Bage ɗiŋnedin, jan go: 3 «O! Bage ɗiŋnedin kwa mbi a̰se! Mo kwa kwa tyatyat go mbi ke mborra mo ndwara se fareba zi, ne dulwak ɗu, mbi ke kaŋ ge kwaɗa ma mo ndwara se.» Uwale, Ezekiyas fyal, kan mḭḭm gḛ ge be to.4 Isaya wat ne zok zi ya zum, gale ne be det yapul ge ga̰l zum ya to, Bage ɗiŋnedin jan na go: 5 «Gwa̰ mbo jan Ezekiyas, ga̰l ge mbi ɓase ma ne go, Bage ɗiŋnedin, Dok ge mo báŋ Dawda ne jan go: Mbi za̰ mo kaɗeya, mbi kwa mo mḭḭm, ago mbi mbo zon mo. Dam ge ataa go mo mbo mbo zok ge Bage ɗiŋnedin ne zi ya. 6 Mbi zwal mo dam ya zḛ del wol para anuwa̰y. Mbi mbo zur aŋ ne mo suwal ne gan ge Asiriya ne tok go. Mbi mbo koy suwal mbe ne mbi dḭl pe, ne mbi dore Dawda pe.» 7 Isaya jan go: «He me fere mbwatɗa kumar.» A he fere mbwatɗa kumar, a tubi na Ezekiyas jwaŋ ma wak zi. Ezekiyas zon.
8 Ezekiyas jan Isaya go: «A ma kaŋ ge ne ŋgay ne go, Bage ɗiŋnedin mbo zon mbi, dam ge ataa go mbi mbo mbo zok ge Bage ɗiŋnedin ne zi ya ɗaa?» 9 Isaya jan na go: «No a kaŋ ŋgayya ge Bage ɗiŋnedin ne ho̰ mo ne go na mbo wi na wak tuli. Mo ɓyare go soŋgoy nda uzi ya koo isiya wol, ko na gwa̰ ya go̰r koo isiya wol ɗaa?» 10 Ezekiyas gwan ne na janna go: «A fogor ge soŋgoy ndar zḛ koo isiya wol ge gwan’a ne go̰r. Mbi ɓyare na gwa̰ ya ne go̰r koo isiya wol.» 11 Anabi Isaya kaɗe Bage ɗiŋnedin, Bage ɗiŋnedin gwan ne soŋgoy go̰r koo isiya wol, koo isiya ge Ahaz ne pal, ne swaga ge soŋgoy ne dé ya go.
Gan ge Babilon ne teme naa ya ɓol Ezekiyas
(Isa 39)
12 Dam mbe ma pul zi, Merodak-Baladan ge Baladan vya, gan ge suwal Babilon ne teme maktub ma ne bobo ma ya hon Ezekiyas, ne da pe, zá̰ go na ka moy, na ɓó zonna no. 13 Ezekiyas ame na temeya ma ne laar saal, ŋgay nama swaga ge na kaŋ kwaɗa ma ne go mwaɗak, fool kaal ma, ne dinar ma, ne dukan ma, ne idir ma, ne na kaŋ pore ma, ne kaŋ ge daage ge ne na yadiŋ ma mwaɗak. Kaŋ a̰me ɗu ge Ezekiyas ne ŋgay nama na to ne na yadiŋ, ko na muluk zi be ga to. 14 Go̰r go, anabi Isaya mbo ya ɓol Ezekiyas, ele na go: «Naa mbe ma jya̰ mo gyana, a mbo da ne ma suwal ya ɗaa?» Ezekiyas jan na go: «A mbo da ne suwal ge kaal ya, ne suwal Babilon ya.» 15 Isaya gwan jan na go: «A kwa ma kaŋ ma ne mo yadiŋ ɗaa?» Ezekiyas jan na go: «A kwa kaŋ ma ge ne mbi yadiŋ ma mwaɗak, mbi be woy nama mbi kaŋ gan a̰me ɗu to.» 16 Isaya jan Ezekiyas go: «Za̰ fare janna ge Bage ɗiŋnedin ne: 17 Ndi, dam ma mbo ya go, ge a mbo abe kaŋ ge ne mo yadiŋ ma pet, poseya ne kaŋ ma ge mo bá ma ne ɓó ma, a mbo gene nama mbo Babilon. Kaŋ a̰me ɗu mbo gá to, Bage ɗiŋnedin jya̰ ne. 18 A mbo pál mo vya a̰me ma, ge a ne ndage ne mo zi ma, a mbo gá ajibaŋ ge gan ge Babilon ne yapul diŋ.» 19 Ezekiyas jan Isaya go: «Fare ge Bage ɗiŋnedin ne ge mo ne jya̰ no a kwaɗa.» Gwan jan go uwale: «I mbo kat halas be ge ɓol iigiya mbi dam ma zi ko’a?»