Hosiya, gan ge Israyela ne
17
1 Swaga ge Ahaz, gan ge Yuda ne ne ke del wol para azi na gan zi go ɗe, Hosiya ge Ela vya ame gan suwal Israyela pal, ge Samariya go. Ke na gan zi del lamaɗo. 2 Ke kaŋ ge sone ma Bage ɗiŋnedin ndwara se, go no puy ɗe, be ke dimma ne gan ge Israyela ma ne, ge ne kale na ndwara zḛ ma go to. 3 Salmanasar, gan ge Asiriya ne mbo ya det Hosiya pore mballa, hál na. Hosiya gwan ne na pala na pe se, gá tyare kaŋ hon na. 4 Swaga ge gan ge Asiriya ma ne ne kwa go Hosiya ɗage ho̰l ya ne na, na teme naa ya mbo ɓol gan ge Masar ne ge suwal Sayir ya, na gá ya be tyare kaŋ hon na me ɗe, gan ge Asiriya ne wan na, kan na zul, dol na daŋgay zi.Palla ge Israyela ne
5 Gan ge Asiriya ne ame suwal Israyela mwaɗak, mbo ya det Samariya pore, ver na se ɗiŋ del ataa. 6 Swaga ge Hosiya ne ke del lamaɗo na gan zi go ɗe, gan ge Asiriya ne ame Samariya, pál Israyela ma mbo Asiriya. Hon nama swaga katɗa ge babur ge Halas ne go, ne maŋgaɗam Habor ge ne suwal Gozan go wak go, ne suwal ma ge Mede ma ne go me.
Kaŋ ma ge ne é go a pá Israyela ma
7 Yál mbe ma no, a dé Israyela vya ma pal, ne da pe, a ke sone Bage ɗiŋnedin Dok ge bama ne, ge ne ndage nama ne suwal Masar diŋ ya zum ndwara se, na ge ne zu nama ne yál njotɗa ge Faraon, gan ge Masar ne tok zi ya. Uwale a ho̰ dok ge ɗogle ma ga̰l. 8 A ka bole hada ge naa ge Bage ɗiŋnedin ne ya̰ nama nama ndwara zḛ ma ne, ne bole kaŋ ma ge gan ge Israyela ma ne ke. 9 Israyela vya ma ke kaŋ ge ndu ne mbya kerra to ma hon Bage ɗiŋnedin, bama Dok, a sḭ swaga sḭḭm ma bama suwal ma go pet, ne bama swaga njole naa ge ho̰l ma go ɗiŋ det ya suwal ga̰l ma diŋ. 10 A nṵsi njal ma ne ɗur uwara ne sḭḭm Achera pe njal ma pala digi ne uwara ge rubiya se dadab ma pe zi pet. 11 A ka til dukan ma ge swaga sḭḭm mbe ma go dimma ne naa ge Bage ɗiŋnedin ne ya̰ nama nama ndwara zḛ ma ne ka kerra go. A ka ke kaŋ ge kakatak ma, kaŋ ge ne é Bage ɗiŋnedin laar hotɗa ma. 12 A ka uware sḭḭm ma ge Bage ɗiŋnedin ne tele nama go, nama uware nama to ma.
13 Bage ɗiŋnedin zwa naa ge Israyela ne ma, ne ge Yuda ne ma togor na anabi ma wak zi pet, ne na naa ge ne kwa ɗimil ma wak zi pet, jya̰ nama go: «Saŋge me ta ya se ne aŋ kaŋ kerra ge sone ma go, koy me mbi wak honna ma, ne mbi eya ma, eya ge mbi ne ho̰ aŋ bá ma na pal pet, nama ge mbi ne ho̰ aŋ nama ne mbi anabi ma wak zi.» 14 Amma a be za̰ na wak to, a ka pala ndaar dimma ne bama bá ma ge a ne ho̰ fareba Bage ɗiŋnedin Dok ge bama ne ta to go. 15 A kuri na eya ma, ne na wak tuli ge ne ke ne nama bá ma, ne togor zwalla ma ge ne zwa nama. A ho̰ ta ke kaŋ ge baŋ yak ma, nama sḛ ma saŋge ta naa ge yak ma me. A bole kaŋ kerra ge pehir ge ɗogle ma ne, nama ge Bage ɗiŋnedin ne tele nama go, nama ke nama to ma. 16 A kuri wak honna ge Bage ɗiŋnedin Dok ge bama ne ma uzi mwaɗak, a ɗeere nday vya ma azi ne fool kaal ne bama sḛ pe, a ɗur uwara ma ne sḭḭm Achera pe, a ka gur bama koo ma kaŋ ge ne pḭr digi ma ndwara se, ne ke uwareya hon dok Baal me. 17 A tyare bama vya ge sonmo ma ne ge gwale ma tilla ol zi, ne ele sḭḭm ma. A ho̰ ta ke kaŋ ge sone Bage ɗiŋnedin ndwara se, ndwara é na laar hotɗa. 18 Da ne pe no, Bage ɗiŋnedin laar vḛne ge be to Israyela pal no, ya̰ na mbo uzi ya kaal ne na ndwara se no. A pehir ge Yuda ne ga ne ɗeŋgo.
19 Yuda me, be koy wak honna ma ge Bage ɗiŋnedin Dok ge na ne to. A ka bole hada ge Israyela ne ka kerra ma. 20 Da ne pe no, Bage ɗiŋnedin kuri pehir ge Israyela ne no, ndi na kaŋ senna, ho̰ nama naa ge paal ma tok go, ya̰ nama ne na ndwara se uzi ya kaal no.
21 Swaga ge Bage ɗiŋnedin ne caɗe Israyela ne muluk ge Dawda ne ta uzi, naa ge Israyela ne ma é Yerobowam ge Nebat vya bama gan, na sḛ é Israyela saŋge Dok na go̰r, ne é nama wat sone ge kakatak zi. 22 Israyela vya ma bole sone ge Yerobowam ne ke ma mwaɗak, a be abe ta uzi to. 23 Da ne pe no, ya̰ Israyela uzi ya kaal ne na ndwara se no, dimma ne na ne ya̰ fare na anabi ma wak zi go, a pá Israyela mbo Asiriya ya kaal ne na suwal no, gá ne ya go no ɗiŋ ma̰ no.
Pe dolla ge Samariya ma ne
24 Gan ge Asiriya ne abe naa ne Babilon ya, ne Kuta ya, ne Avva ya, ne Hamat ya, ne Sefarvayim ya, e nama katɗa suwal ma ge Samariya ne ma go, Israyela vya ma byalam go no. A gá katɗa Samariya go, ne na suwal ma go no pet. 25 Swaga ge a ne e pe kat suwal mbe ma go, a be ka uware Bage ɗiŋnedin to, da ne pe no, Bage ɗiŋnedin ka̰ sonne ma ya nama ta hun nama no. 26 A mbo jan gan ge Asiriya ne no go: «Naa ge mo ne gene nama ya kanna suwal ma ge Samariya ne go mbe ma kwa dok ge suwal mbe ne to. A go no, dok mbe ka̰ sonne ma nama ta hunna no, ne da pe, a kwa dok ge suwal mbe ne to.» 27 A go no, gan ge Asiriya ne ho̰ na wak no go, a teme bage tuwaleya a̰me ɗu ne naa ge a ne pá nama ne suwal Samariya go ma buwal zi mbo katɗa Samariya go, ne da pe, na hate nama dok kerra ge suwal mbe ne. 28 A go no, bage tuwaleya a̰me ɗu ge a ne pá na ne Samariya go, mbo katɗa Betel go no ndwara hate nama viya̰ ge uware Bage ɗiŋnedin no.
29 Amma pehir ge ɗogle mbe ma nṵsi bama dok ma, a e nama ge zok sḭḭm ge Samariya ma ne sḭ ma zi no. Naa mbe ma ka ke mbe go no, ge suwal ge daage pet ge a ne ka go. 30 Naa ge a ne pá nama ne Babilon ya ma ke dok Sukot-Benot, naa ge Kuta ma a ka ke dok Nergal, naa ge Hamat ma ka ke dok Achima, 31 naa ge Avva ma ka ke dok Nibhaz ma ne Tartak, naa ge Sefarvayim ma ka tyare bama vya ma tilla ne bama dok Adrammelek ma ne Anammelek pe. 32 Uwale, a ka uware Bage ɗiŋnedin me. A ka tal naa a̰me ma ne bama buwal zi e nama bama naa ge ke tuwaleya ma, ndwara ke tuwaleya bama swaga sḭḭm ma go. 33 A ka uware Bage ɗiŋnedin me, a ka ke sḭḭm ge bama suwal ma ne temel mo̰r me.
34 Ɗiŋ ma̰ no, a mbo ya hada ge bama ne ma ge zaŋgal ma pal. A hon Bage ɗiŋnedin ga̰l to, a ke mborra eya ma, ne hada ma, ne wak honna ma ge Bage ɗiŋnedin ne ho̰ Yakub vya ma, na ge ne ho̰ na dḭl Israyela ma pal to. 35 Bage ɗiŋnedin ke wak tuli ne Yakub vya ma, ho̰ nama na wak no go: «Aŋ mbo uware dok ge ɗogle ma to bat, aŋ mbo gur aŋ koo ma nama ndwara se to bat, aŋ mbo ke nama temel mo̰r to bat, aŋ mbo tyare tuwaleya hon nama to bat me. 36 Amma, aŋ mbo uware Bage ɗiŋnedin ɗeŋgo, na ge ne ndage aŋ ne suwal Masar diŋ ya zum ne pool ge na ne, aŋ mbo gur aŋ koo ma na ndwara se, ne tyare tuwaleya hon na ɗeŋgo. 37 Aŋ mbo koy eya ma, ne wak yuwaleya ma, ne wak honna ma ge na sḛ ne njaŋge aŋ nama, aŋ ka ke mborra nama pal ɗaɗak, aŋ mbo uware dok ge ɗogle ma to bat. 38 Aŋ mbo vyale ne wak tuli ge mbi ne ke ne aŋ to bat, aŋ mbo uware dok ge ɗogle ma to bat. 39 Amma aŋ uware Bage ɗiŋnedin Dok ge aŋ ne, a na sḛ ɗeŋgo mbo zur aŋ ne aŋ naa ge ho̰l ma tok go ne.»