Yoyahaz, gan ge Israyela ne
13
1 Swaga ge Yowas ge Ahaziya vya, gan ge Yuda ne, ne ke del wara azi para ataa na gan zi go ɗe, Yoyahaz ge Yehu vya ame gan ge Israyela go, suwal Samariya diŋ. Za gan del wol para ɓyalar. 2 Amma ka ke kaŋ ge sone ma ge Bage ɗiŋnedin ndwara se, ka bole sone ge Yerobowam ge Nebat vya ne ke ma, ne ge ne é Israyela vya ma kerra ma me. 3 Bage ɗiŋnedin laar vḛne Israyela pal, ɓyan nama ge Hazayel, gan ge Siriya ma ne, ma ne na vya Ben-Hadad tok go, del ma ge nama muluk ne zi mwaɗak.4 Yoyahaz kaɗe Bage ɗiŋnedin ne á tene, Bage ɗiŋnedin za̰ na, ne da pe, kwa yál njotɗa ge Israyela ne ka njot Siriya ma gan tok go. 5 Bage ɗiŋnedin hon Israyela bage máya a̰me ɗu, ndu mbe zur Israyela ne Siriya ma tok go, a gá katɗa bama yàl ma diŋ halas dimma ne ge dḛ zaŋgal go. 6 Go no puy ɗe, a be abe ta uzi ne sone ma ge Yerobowam ma ne na hir ma ne é Israyela vya ma kerra go to. A hon ta bole nama koo pul. Uwale ge suwal Samariya diŋ, a ya̰ uwara sḭḭm Achera ne ɗurra digi. 7 Yoyahaz asagar ma gá naa ge ne tisi ma naa wara anuwa̰y, ne pus pore wol, ne naa ge mbal pore ne koo ma naa dudubu wol me. Ago gan ge Siriya ne hṵ naa ge may ma uzi kucup, saŋge nama dimma ne kuci ge naa ne ndal na naa koo pul ma se go. 8 kaŋ ge Yoyahaz ne ke ge may ma, na pateya ma, a njaŋge nama ya Maktub Maana ge Gan ge Israyela ma ne zi. 9 Yoyahaz su na báŋ ma pe ya, a mbul na suwal Samariya diŋ. na vya Yowas er na byalam hool gan pal.
Yowas, gan ge Israyela ne
10 Swaga ge Yowas, gan ge Yuda ne ne ke del tapolɗu para ɓyalar na gan zi go ɗe, Yehowas ge Yoyahaz vya ame gan ge Israyela go, suwal Samariya diŋ. Za gan del wol para myanaŋgal. 11 Ke kaŋ ge sone ma Bage ɗiŋnedin ndwara se. Be ya̰ sone ge Yerobowam ge Nebat vya ne é Israyela vya ma kerra uzi go ŋgeɗo to bat, ka bole na koo pul. 12 Kaŋ ge Yowas ne ke ge may ma, na pateya ma, na pore ge ne ke ne Amasiya, gan ge Yuda ne ma, a njaŋge nama ya Maktub Maana ge Gan ge Israyela ma ne zi. 13 Yowas su na báŋ ma pe ya, a mbul na ge suwal Samariya diŋ, siim pala ge gan ge Israyela ma ne go. Yerobowam er na byalam hool gan pal.
Siya ge Ilisa ne
14 Swaga ge Ilisa ne ɓó moy ge ba mbo ne na siya zi go ɗe, Yehowas, gan ge Israyela ne mbo na ta ya, dol tene na ko̰o̰l zi ne fyaso ka janna go: «O mbi bá, mo ɗu kikit mo mbya da ne pus pore ge Israyela ne ma, ne na tisi ma!» 15 Ilisa jan na go: «Hé kajamle!» Yehowas he kajamle. 16 Ilisa gwan jan gan ge Israyela ne go: «Wa̰ kajamle!» Swaga ge gan ne wa̰ kajamle ɗe, Ilisa e na tok ma na tok ma pal, jan na go: 17 «Hage fenetre le ge ham ge go!» Na sḛ hage na. Ilisa jan na go: «Mbá!» Swaga ge gan ne mbá kajamle, Ilisa jan na go: «A kajamle ge ne ŋgay halla ge Bage ɗiŋnedin ne ho̰ aŋ ne, halla ge Siriya ma pal. Mo mbo hal Siriya ma ge Afek go, mo mbo burmi nama pe uzi.» 18 Ilisa gwan jan na go: «Abe kajamle ge ɗogle ma!» Na sḛ abe nama. Ilisa jan gan ge Israyela ne go: «Mbá nama suwar zi!» Gan mbal ndwara ataa, mḛ baŋ. 19 Ndu ge Dok ne laar vḛne na pal, jan na go: «Ke ya kwaɗa, mo te ya mbal ndwara anuwa̰y, ko ndwara myanaŋgal, go no mo mbo hal Siriya ma, ɗiŋ mo mbo burmi nama pe uzi. Se no ɗe, mo mbo hal nama dḛ ndwara ataa gagak.» 20 Ilisa su, a mbul na.
Del ne del, Mowab ma, naa ge fiiri viya̰ ma a ka mbo ya suwal Israyela go. 21 Dam a̰me ɗu, naa a̰me ma ka mbul siya, a kwa naa ge fiiri viya̰ mbe ma mborra ya, a dol siya mbe Ilisa taal se ya. Swaga ge siya mbe ne dé Ilisa kal ma pal, tan digi mḛ ne na koo.
22 Muluk ge Yoyahaz ne zi mwaɗak, Hazayel, gan ge Siriya ma ne ke Israyela vya ma yál. 23 Bage ɗiŋnedin kwa nama a̰se, so nama ko̰r ne wak tuli ge na ne ke ne Abraham, ne Isaku, ne Yakub, be ɓyare burmi nama pe uzi to, ko yan nama ne na ndwara se uzi ya kaal to.